New River (Belize)

Vun Wikipedia
Zur Navigation springen Zur Suche springen
New River von Lamanai ut keken (2008)
Mennoniten bi’t Fischen op’n New River (bi Shipyard)
De New River dicht vör sien Münn

De New River (spaansch Río Nuevo) is en 132 Kilometer langen Stroom in de Distrikte Orange Walk un Corozal von Belize.

De Stroom hett en Afströömrebeed von üm un bi 2000 km².

Verloop[ännern | Bornkood ännern]

De Stroom hett sien Born in’n Süden von’n Distrikt Orange Walk nich wied af von de Grenz na’n Distrikt Cayo (bi Lagoon Bank). Dat Rebeed liggt üm un bi 120 Meter över de See. Von dor flütt de Stroom na Noordoosten. Von’n Oort Hill Bank bet na Lamanai billt de New River en üm un bi 24 Kilometer lange Laguun, in de de Stroom en poor hunnert Meter bet een Kilometer breed is. An dat linke Över von düsse Laguun sünd de Öörd San Carlos, Indian Church un Indian Creek un de Maya-Ruinen von Lamanai to finnen. In de Laguun münnt von links de Irish Creek in’n New River.

Na de Laguun flütt de Stroom vörbi an Fire Burn, Shipyard, Guinea Grass un Tower Hill, de all op dat linke Över liggen doot. Op dat rechte Över liggt de Oort Carmelita. Twüschen Carmelita un Tower Hill geiht de Philip Goldson Highway mit en Brügg över’n New River. De Stroom flütt an dat Rebeed von San Jose Palmar/Orange Walk/Trial Farm vörbi. Düsse Öörd sünd all op dat linke Över. Dree Brüggen gaht över’n New River: twee Maal de Ümtostraat üm Orange Walk von’n Philip Goldson Highway un een Maal de Straat von Orange Walk na Progresso.

De Stroom lett nu San Estevan op dat rechte Över liggen, tridd in’n Distrikt Corozal in un flütt an Caledonia op dat linke Över langs. Twüschen San Estevan un Caledonia deelt sik de Stroom in en 4,5 Kilometer langen linken Arm un en 9 Kilometer langen rechten Arm, de denn aver wedder tohoopfleet.

Twee Kilometer achter Caledonia deelt sik de Stroom in twee Arms, de linke is 17 Kilometer lang un de rechte 13 Kilometer. An’n rechten Arm doot gorkeen Öörd liggen un an’n linken blots de Oort Libertad. Von de Steed, an de de beiden Arms wedder tohooploopt, sünd dat noch knapp söss Kilometer bet na de Münn in de Bucht von Corozal, de Deel von de Bucht von Chetumal un de Karibische See is. De Münn liggt fiev Kilometer in’n Süden von Corozal.

Veer Kilometer vör de Münn löppt de Straat von Corozal na Progresso mit en Fähr över’n New River. De linke Arm von’n New River hett ok en Togang to de Ranchito Lagoon.

Weblenken[ännern | Bornkood ännern]

Commons-logo.svg New River (Belize). Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:18° 21′ N, 88° 23′ W