Mevenst
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | 218 (31. Dezember 2010) | |
| Hööchd: | 5 m över NN | |
| Postleettall: | 27726 | |
| Vörwahl: | 04792 | |
| Geograafsche Laag: | Koordinaten:53° 14′ N, 8° 58′ O53° 14′ N, 8° 58′ O | |
|
| ||
Mevenst (hoochdüütsch Mevenstedt) is en Dörp in de Gemeen Worpsweed in’n Landkreis Oosterholt, Neddersassen. Binnen de Gemeen Worpsweed billt de Oort vondaag en egen polietsche Oortschop.
Geografie
[ännern | Bornkood ännern]De Oort liggt in dat Düvelsmoor. Dat Water ut dat Rebeed warrt över’n Mevenster Schippgraven un den Umbeek na de Hamm hen afföhrt.
De Naveröörd sünd Nee Sankt Jürgen in’n Noorden, Winkelmoor in’n Noordoosten, Slussdörp in’n Oosten, Adelsdorp in’n Süüdoosten, Bargdörp in’n Süden, Oosterweed un Weyerdeelen in’n Süüdwesten un Överhamm in’n Noordwesten.
Historie
[ännern | Bornkood ännern]Mevenst is 1782 as 1,5 Kilometer lang Stratendörp un Moorkolonie in dat Düvelsmoor grünnt worrn. In dat Moor, in dat de Oort anleggt worrn is, schall dat to de Tied en See geven hebben, bi den dat veel Meven geven hett. Dorvon kummt de Naam. De twete Deel von’n Naam (-st, -stedt) is in Analogie to en Reeg Geest-Öörd in de Ümgegend billt worrn (Tarmst, Hepst, Wilst etc.) un is egentlich untypisch för en Moordörp.
In’n Eersten Weltkrieg sünd 13 Soldaten ut Mevenst fullen oder vermisst un in’n Tweten Weltkrieg söss.[1]
Verwaltungsgeschicht
[ännern | Bornkood ännern]In de Franzosentied von 1810 bet 1814 hett de Oort to de Mairie Worpsweed in’n Kanton Leendaal höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1852 to de Moorvaagdie Huttenbusch in dat Amt Otterbarg tohöört un denn von 1852 bet 1885 to dat Amt Leendaal. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en un grötteren Kreis Oosterholt tohoopgahn is.
1929 is de Gemeen Winkelmoor an Mevenst anslaten worrn. De Gemeen Mevenst is an’n 1. März 1974 mit de Gemeenreform in Neddersassen Deel von de Gemeen Worpsweed worrn. Mit dissen Dag is ut de Gemeen Mevenst denn de polietsche Oortschop Mevenst worrn, de en Oortsvörsteiher hett.
Inwahnertall
[ännern | Bornkood ännern]| Johr | Inwahners |
|---|---|
| 1791[2] | 12 Füürsteden |
| 1812[3] | 77 |
| 1824[4] | 11 Füürsteden |
| 1848[5] | 117 Lüüd, 16 Hüüs |
| 1. Dezember 1871[6] | 147 Lüüd, 21 Hüüs |
| 1. Dezember 1885[7] | 156 Lüüd, 24 Hüüs |
| 1. Dezember 1905[8] | 159 Lüüd, 23 Hüüs |
| 1. Dezember 1910[9] | 171 |
| 1925[10] | 166 |
| 1933[10] | 237 |
| 1939[10] | 211 |
Religion
[ännern | Bornkood ännern]Mevenst is evangeelsch-luthersch präägt un höört to dat Kaspel von de Zion-Kark in Worpsweed.
För de Kathoolschen gifft dat in Worpsweed de Maria-Freden-Kapell, de to de Goden-Hirt-Kark in Leendaal höört. De Goden-Hirt-Kark höört siet 1. September 2012 to de Karkengemeen von de Hillige-Familie-Kark in Oosterholt-Scharmbeek.
Oortsvörsteihers
[ännern | Bornkood ännern]- –Januar 2014: Willi Räke
- Mai 2014–: Rolf Ernst
Kultur
[ännern | Bornkood ännern]En Denkmaal för de Fullenen ut de twee Weltkrieg’ steiht in Worpsweed an de Kark.
Dat Dörpgemeenschopshuus an’e Mevenstraat is 1993 trech worrn. Dat is in dat fröhere Schoolhuus ünnerbrocht.
Verenen
[ännern | Bornkood ännern]De Heimatvereen Mevenst/Winkelmoor is an’n 19. April 1985 grünnt worrn.
Weertschop un Infrastruktur
[ännern | Bornkood ännern]Mevenst hett en egene freewillige Füürwehr, de 1943 grünnt worrn is.
Verkehr
[ännern | Bornkood ännern]De Dörpstraat dör Mevenst is de Landsstraat 153, de in’n Süden na Worpsweed un op Leendaal to geiht un in’n Westen över Düvelsmoor na Pennigbüttel bi Oosterholt-Scharmbeek an de Bundsstraat 74. Na Noorden geiht von de L 153 de L 165 af, de över Huttenbusch un Oostersood na Korlshöben löppt. Över Nee Sankt Jürgen geiht de Kreisstraat 15 na Tarms.
De Opfohrt 16 Bremen-Noord op de Autobahn 27/270 liggt so 20 Kilometer in’n Süüdwesten von Mevenst an de B 74. De Opfohrt 17 Dreeeck Bremen-Industriehavens op de Autobahn 27/281 liggt lieker wied in’n Süüdwesten.
De nächste Bahnhoff is so bi 15 Kilometer wied weg in’n Westen de Bahnhoff Oosterholt-Scharmbeek an de Bahnlien Bremen–Bremerhoben. Von 1911 bet 1978 hett dat ok op de Bahnlien Stood–Oosterholt Personenverkehr geven. De Bahnhööv Weyerdeelen-Umbeek un Nee Sankt Jürgen legen all beid dicht bi Mevenst. Weyerdeelen-Umbeek an’t Süüdenn von dat Dörp un Nee Sankt Jürgen knapp een Kilometer in’n Noorden.
Literatur
[ännern | Bornkood ännern]- Dieter Meisner: 200 Jahre Mevenstedt. 1782–1982. Borgardt, Bremervöör 1982
Footnoten
[ännern | Bornkood ännern]- ↑ Onlineprojekt Gefallenendenkmäler
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 154
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 96
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 406
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 139
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 160
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 166
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 142
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
Huttenbusch | Mevenst | Nee Sankt Jürgen | Oostersood | Slussdorp | Överhamm | Waakhusen | Worpsweed