Mairie Drochters

De Mairie Drochters weer in de Franzosentied (1810 bet 1813) een von de fiev Mairien, in de de Kanton Freeborg indeelt weer. De Seet weer in Drochters. Se harr 3019 Inwahners.

Historie

De Ümgegend von Drochters hett vör de Franzosentied to dat Grevengericht Bützfleet un dat Amt Wischhoben in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Drochters een von de söss Mairien in’n Kanton Drochters von’n Distrikt Stood, Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Drochters weer nu een von de fiev Mairien in’n Kanton Freeborg, Distrikt Stood, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de dree Mairien Drochters, Neeland un Kruutsand (all dree in’n Kanton Drochters) höört harrn.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Drochters, Doornbusch, Blomendal, Nindörp, Krummenweg, Theisbrügg, Sietwenn, Gauensiek, Aschhoorn

• Kaiserriek Frankriek:

  Drochters, Doornbusch, Blomendal, Nindörp, Krummenweg, Theisbrügg, Sietwenn, Gauensiek, Neeland (2565 Inwahners), Kruutsand (454 Inwahners)

Vondaag sünd düsse Öörd Deel von de Gemeen Drochters un de Samtgemeen Noordkeden.