Iedereen beroemd!
| Filmdaten | |
|---|---|
| Plattdüütsch Titel: | — |
| Originaltitel: | Iedereen beroemd! |
| Düütsch Titel: | Jeder ist ein Star! Everybody’s Famous! |
| Produkschoonsland: | Belgien Nedderlannen Frankriek |
| Johr vun’t Rutkamen: | 2000 |
| Läng: | 88 Minuten |
| Originalspraak: | Nedderlandsch |
| Öllersfreegaav in Düütschland: | FSK 6 |
| Filmkru | |
| Speelbaas: | Dominique Deruddere |
| Dreihbook: | Dominique Deruddere |
| Produkschoon: | Dominique Deruddere Loret Meus u. a. |
| Musik: | Raymond Van Het Groenewoud |
| Kamera: | Willy Stassen |
| Snitt: | Nico Leunen Ludo Troch |
| Dorstellers | |
| |
Iedereen Beroemd! (op Platt so veel as „Jeedeen is beropen“; dt. Titel: Jeder ist ein Star! (Kino) oder Everybody’s famous! (DVD)) is de Titel vun en belgsch-nedderlännsch-franzöösch Filmkummedie ut dat Johr 2000.
Inholt
[ännern | Bornkood ännern]De eenfach Fabrikarbeider Jean Verreecken dröömt dorvun, en beropen Leedermaker to warrn un överdriggt dissen Droom op sien ’n beten wat pummelige Dochter Marva. Ehrn Naam hett se vun en ehmolig beropen Singersche un vun lütt op an warrt se vun eher Vadder al to Gesangswettstrieden un Karaokeveranstalten. Afgünstig kiekt Jean op de Fernsehoptreden vun Debbie, en junge Fro, de al en echten Star worrn is.
As Jean sik een Dag mol wedder en Leed utdacht hett, överrascht he dormit sien Deern bi’n Fröhstück. Marva aver reageert teemlich füünsch vun wegen den anhollend Druck dör ehrn Vadder. To glieken Tiet stüürt Jean in en Sinnkries, as de Fabrik pleiet maakt un he op’n Slag sien Arbeit verleert. As denn ok noch sien Auto den Geist opgifft, kummt utrekend de Singersche Debbie vörbi un hülpt em dat Auto to repareeren. Ahn lang Överleggen gifft he Debbie en Tee mit Slapmiddel un entföhrt ehr. Mit Debbie as Börgin versöcht he ehrn Produzenten to erpressen, ut sien nieg utdacht Leed en groten Hit un ut sien Dochter Marva en richtigen Star to maken.
Achtergrund
[ännern | Bornkood ännern]De Film sett an en eernsten Achtergrund an, mit dat eenfache Ümfeld op’n weertschopplich swacken Land un op de Basis vun de Sorgen un Drööm vun eenfache Minschen as Du un ik. To glieken Tiet arbeidt he aver – jümmers mit en Ogenplienkern – mit een ganze Reeg Klischees, de man so ut dat twüschenminschliche aver ok ut dat Showgewarf kennt. T. B. lett sik Willy, Jeans beste Fründ un Arbeitskolleeg, vun sien Leefste gründlich utnütten. Dorvör, dat se af un an mit em Sex hett, lett sik dat Leven vun Willy finanzeeren, so ok en Urlaub mit en annern Macker, wat se Willy as en böös wichtige Studienreis verköfft. Versteiht sik vun sülvst, dat ok de allgemeen Vörstellen nich fehlen dröff, dat blots en Star warrn kann, wer sik na baven slöpt.
De Ünnerhollen vun den Film grünnt sik op narrsche Szenen un Situatschoonskomik, de sik deelwies ut unöverleggt Hanneln oder snell Entsluten wergeev, bi de Naklapp nich glieks klor warrt. So verkleedt sik Jean bi en Snack mit Debbies Produzenten Michael Jensen mit en Gummimask vun Michael Jackson, verraad sik aver gliektietig dormit, dat he sien Dochter as Singersche för dat Leed vörsleit. Op disse Oort un Wies warrt veele Verhollensoorden un Klischees op’e Schipp nahmen, wat dorto föhrt, dat de Hanneln op en wollmenend Oort abasig anslahn deit.
Kritik
[ännern | Bornkood ännern]De Film weer von de Kritikers mit veel Tospraak bedacht worrn as en zyynsch, sünnerlich-narrsch un meist al britisch anmoten Kummedie, de to Recht för’n Oscar vörslahn worrn is. De Film winnt sien Tokiekers vör allen dör den Respekt un de Vörleev to de mehrstendeels bannig naiven aver even ok leeftalligen Personen in den Film. Man, üm as echte Satire gelln to künnen, hett dat de Kritikers opletzt doch an Beet fehlt. Dorför weer de Film denn doch as to tamm un harmlos instoopt. Dat weer nich toletzt grünnt in dat harmonisch Enn, wo sik all wedder goot verstaht. De Ümstand, dat een an’n Enn nich recht weet, wat de Film nu ironisch verstahn warrn wull oder even nich, weer en bedüden Kritikpunkt. Jümmerhen künn dat Enn den Indruck torüchlaten, dat Lüüd roven en goot Middel wesen künn, üm sien Problemen to lösen un an’t egen Teel to kamen.
Utteken
[ännern | Bornkood ännern]2001 is de Film för den Oscar nomineert worrn in de Kategorie Best frömdsprakig Film.
Josse De Pauw hett 2000 den belgsch Joseph-Plateau-Filmprijs as Best Schauspeler wunnen. Eva Van Der Gucht, Dominique Deruddere un de Film sülvst (as Best Belgschen Film) weern ok för de Joseph-Plateau-Filmprijzen nomineert.
Butendem hett Dominique Deruddere 2001 de Publikumspriesen vun’t Ljubljanski Mednarodni Filmski Festival un vun’t Festival du Cinéma Nordique de Rouen as ok den Sülvern Delphin in de Kategorie Best Dreihbook vun’t Festival Internacional de Cinema de Tróia (Festróia) wunnen.
Weblenken
[ännern | Bornkood ännern]- Iedereen beroemd! in de Internet Movie Database (engelsch)