Gibraltar

Vun Wikipedia
Zur Navigation springen Zur Suche springen
Gibraltar

Gibraltar is ene 6 km² grote Halfinsel ut naakte Felsen an de Südspitz vun Spanien in'n Oosten vun de lütte Bucht vun Algeciras un gegenöver vun de afrikaansche Havenstadt Ceuta (de noch bi Spanien höört). An de Westsiet vun de Halfinsel liggt de Kriegs- un Handelshaven un de Stadt Gibraltar mit 26.000 Inwahners.

Twüschen Gibraltar un de afrikaansche Küst liggt de Straat vun Gibraltar, de besunners siet den Bo vun den Suezkanaal ene wichtige politische Bedüden tofullen is. Aver ok al in fröhere Tieden harrn de Minschen dat op de Herrschop över Gibraltar afsehn. In de Antike weern de Karthager un Römer naenanner de Besitters, un in de Völkerwannerungstiet wurr Gibraltar vun de Vandalen un darna vun de Westgoten besett.

Ehren hütigen Naam hett de Halfinsel vun Arabers, de se „Dschebel al Tarik“ (Felsen vun Tarik) nömen na ehren Feldherrn Tarik, de mit sien Lannen 711 den Islam den Weg na Spanien bahn. Eerst 1492 wurr Gibraltar vun Spanien wedder trüchwunnen. In den Spaanschen Arvschopskrieg (1701-1714) reten de Engländer den Felsen an sik un boon em as Stüttpunkt ut. De Spanier hefft al faken versocht, de Halfinsel wedder an ehr Land antosluten, aver in en Referendum stimmen 90% vun de Inwahners darför, bi England to blieven.

De Felsen vun Gibraltar is de eenzige Stell in Europa, wo noch Apen leevt. Dat hannelt sik um ene Hood vun Berberapen, de to de Grupp vun Hundskoppapen höört. De Englänner gaht dar behott mit um. Se glöövt, dat de engelsche Herrschop över den Stüttpunkt seker is, solang disse Apen op den Fels wahnt. So warrt jümmers gau för Nawass sorgt, wenn de Tahl vun de Apen maal trüchgahn is.