Gericht Nedderenn St. Jürgen
Dat Gericht Nedderenn St. Jürgen weer en lütt Patrimonialgericht in Bremen-Veern un in dat Königriek Hannover mit Seet in Sankt Jürgen binnen de Landdrostie Stood. Dat Rebeed liggt vondaag in de Gemeen Leendaal. Gerichtsherr weer de Familie von der Hude.
Dat Gericht bestünn blots ut de veer Öörd Sankt Jürgen, Nedderenn, Moorhusen un Veerhusen. Tosätzlich hett dor noch de Hoff Hagensfähr tohöört, de to de Noordsied tellt, von de de annern Hüüs aver all to dat Gericht Hu’e höört hebbt.
Geografie
[ännern | Bornkood ännern]Dat Gericht is in’n Noorden an dat Amt Oosterholt grenzt, in’n Oosten an dat Amt Leendaal, in’n Süden an dat Blockland (Stadt Bremen) un in’n Westen an dat Gericht Hu’e.
Historie
[ännern | Bornkood ännern]Dat Gericht hett to dat Dammgood in Hu’e höört. Good un Gericht hebbt de Familien von Schade un von der Hude tohöört. Nadem Friedrich August von der Hude 1774 doodbleven is, hett 1775 Georg Gröning dat Dammgood un dormit ok dat Gericht Nedderenn St. Jürgen övernahmen.
Dat Gericht harr de Zivilgerichtsborkeit un freewillige Gerichtsborkeit. För de annern Gerichtsborkeiten un för Stüürsaken weer dat Amt Leendaal tostännig.
Dat Gericht Nedderenn St. Jürgen harr tohoop mit dat Gericht Hu’e den Diekverband Hu’e-Nedderenn, de sik üm dat Ünnerhollen von Dieken un Gravens kümmert hett, wat för dat siede Land twüschen Wümm un Hamm en överlevenswichtige Saak weer.
1810 hett Frankriek ünner Napoleon dat Gericht innahmen. In disse Franzosentied hett dat toeerst bet to’n 31. Dezember 1810 to dat Departement von de Elv- un Wersermünnen in dat Königriek Westfalen höört un denn to dat Departement von de Wersermünnen un direkt to Frankriek. Dat Gericht weer in disse Tied Deel von de Mairie St. Jürgen in’n Kanton Leendaal. 1813 müssen de Franzosen dat Rebeed denn opgeven un de ole Stand is wedderkamen.
De Gerichtsherrn hebbt dat Gericht 1848 freewillig an’n Landsherrn afgeven. To’n 1. September 1848 is dat Gericht Nedderenn St. Jürgen oplööst un Deel von dat Amt Leendaal worrn.[1]
Inwahnertall
[ännern | Bornkood ännern]| Johr | Inwahners |
|---|---|
| 1823[2] | 167 Lüüd, 24 Hüüs |
| 1848[3] | 209 Lüüd, 30 Hüüs |
Footnoten
[ännern | Bornkood ännern]- ↑ Christian H. Ebhardt: Gesetze, Verordnungen und Ausschreiben für das Königreich Hannover. 1846–1850. Vandenhoeck und Ruprecht, Göttingen 1851, Sied 169
- ↑ Johann G. L. W. Ubbelohde: Statistisches Repertorium über das Königreich Hannover. Hahn, 1823, Sied 85: https://books.google.de/books?id=Rvs-AAAAcAAJ&pg=PA85
- ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 172: http://books.google.de/books?id=eOI-AAAAcAAJ&pg=PA172
