Frozen (2013)

Vun Wikipedia
Filmdaten
Plattdüütsch Titel:
Originaltitel: Frozen
Düütsch Titel: Die Eiskönigin – Völlig unverfroren
Produkschoonsland: USA
Johr vun’t Rutkamen: 2013
Läng: 101 Minuten
Originalspraak: Engelsch
Öllersfreegaav in Düütschland: FSK 0
Filmkru
Speelbaas: Chris Buck
Jennifer Lee
Dreihbook: Jennifer Lee
Shane Morris
Produkschoon: Peter Del Vecho
Musik: Christophe Beck
Robert Lopez
Kristen Anderson-Lopez
Kamera: Scott Beattie un Mohit Kallianpur
Snitt: Brian Millman
Dorstellers

Sprekers: Afsnitt in’n Artikel

Frozen (op plattdüütsch so veel as „Froren“; dt. Titel: Die Eiskönigin – Völlig unverfroren) is de Titel vun en US-amerikaanschen Animatschoonsfilm vun Walt Disney Pictures ut dat Johr 2013. Dat Dreihbook baseert groff op dat Märken Sneedronningen (dt.: Die Schneekönigin) vun den däänschen Schriever un Dichter Hans Christian Andersen. Speelbasen weern Chris Buck un Jennifer Lee. De Film weer vun’n 28. November 2013 an in de düütschen Kinos to sehn. De Weltpremiere weer an’n 10. November 2013 in New York City.

Inholt[ännern | Bornkood ännern]

Elsa, de junge Prinzessche vun’t Königriek Arendelle, kann mit ehr cryokineetsche Töverkraft Ies, Frost un Snee tügen. As se een Nacht mit ehr dree Johren jüngere Süster Anna speelt, dröpt se ehr ut Versehn mit en Töverspröök an’n Kopp. Anna blifft bewusstlos liggen. Jemehr Öllern weet sik keen annern Raat, as de Trollen üm Hülp to fragen. Jemehr Hööftling kann ehr wohrhaftig hülpen, man dorto mutt he ehr de Gedanken an Elsa ehr Töverkraft nehmen. Harr Elsa nich Anna ehrn Kopp, man dat Hart drapen, weern de Folgen aver veel sworer wesen. Üm Elsa vör de överglööschen Minschen to schulen un ehr Kräft geheem to hollen, slutt sik de Königsfamilie mehr oder minner in’t Slott in. To Anna eher un ok ehr egen Sekerheit, blifft Elsa nu de meiste Tiet in ehr Kamer – scheedt vun ehr lütten Süster, de sik dordör ut’nanner leevt. Teihn Johren later gaht de Öllern op en lange Seereis, op de se in en sworen Störm doodblievt.

Elsa warrt nu op ehr Amt vörbereit. Dree Johren wieter schall in Arendelle Elas kröönt warrn. Vele Lüüd warrt inlaadt, dorünner ok de Duke of Weselton (in de düütsche Faten de Hartog vun Pitzbühl) ut dat Naverriek, de vör allen Profit ut de Verbinnen mit Arendelle tehn will. Prinzessin Anna is hen un wech, as na de langen Tiet de Slottdoren wedder apen maakt warrt. As se över’n Markt lopen deit, dröpt se op den schönen Prinzen Hans, in den se sik foorts verkieken deit. As Hans ehr op den Empfang en Andrag maken deit, seggt se prompt to. Man, Elsa verseggt ehr ehrn Segen ünner den Vörwand, dat se sik noch nich lang noog kennen deen. In Wohrheit is se bangn, dat ehr geheemen Kräft opdeckt warrt. De beiden Süsters kriegt sik dorophen in de Plünnen, wat Elsa so wiet opregen deit, dat se ehr Töverkräft nich mehr kontrolleren kann, dat se eenfack ut ehr rutbreken doot. De Gäst warrt nu bang, un de Duke of Weselton beteken Elsa as Hex un Monster, de infungen warrn mutt.

In ehr Panik neiht Elsa ut in de Bargen un sett dorbi – ahn dat to wulln – en ewigen Winter över dat Königriek Arendelle. Nu, as all Lüdd ehr Kräft kennen doot, beslutt se, sik eensom torüch to tehn in en Palast ut Ies, den se sik beswören deit un woneem se alleen leven will. Dorbi beswöört se aver ok Olaf, en Sneemann ut ehr gemeensomen Kindheit mit Anna. Ehr Süster Anna denkt aver gor nich doran, Elsa alleen tehn to laten un löpt ehr na. Op’n Weg dröpt se den Ieshökerer Kristoff mit sien Rendeert Sven. De bringt ehr in de Bargen, woneem se op den Sneemann Olaf drapen doot, de jem na Elsa ehrn Iespalast föhren deit.

Anna versöcht ehr Süster dorto to bringen, wedder torüch to kamen un den Winter vun’t Land to nehmen. Elsa is aver bang, dat se Anna noch mol wedder wat andoon künn un wil lnich mitkamen. Wedder verlütt Elsa de Kontroll över ehr Kräft un dröpt Anna ditmol mit ehr Töveree midden in’t Hart. Anna un Kristoff warrt ut den Iespalast rutsmeten. Op’n Weg fallt Kristoff op, dat sik de Hoor vun Anna witt farvt un se sik langsom dör den Töver wanneln deit. He bringt ehr na de Trollen, man de Hööftling kann ditmol nix för ehr doon. He vertellt aver, dat blots en Akt vun wohre Leev ehr froren Hart wedder opdauen kann. Anners de Anna för jümmer infreren. So bringt Kristoff ehr torüch na Arendelle in den Gloven, dat en Söten vun Hans ehr redden kann. Hans aver hett in de Twüschentiet Elsa vun sien Lüüd infangen laten un ehr in’t Verlies smeten. He seggt ehr, dat se den Winter wedder wegmaken schall, wat Elsa aver nich kann. He maakt sik nu sien egen Plään: Wenn de Elsa as lege Hex henrichten lett, müss dat Volk em as Held ansehn. As nu ok noch Anna na em bröcht warrt, will he ok ehr langsom infreren laten, vunwegen dat he gor keen Leev för ehr hett. Ehrn Dood aver künn he wunnerbor Elsa anlasten, so dat he denn ahn Twievel den Thron vun Arendelle bestiegen künn.

Elsa kann aver ut ehr Gefängnis utbreken un dör en Sneestorm utneihn. Anna, de intwüschen in’t Starven liggt, warrt vun den Sneemann Olaf funnen, de ehr vertellt, dat sik in Owhrheit nich Hans, man Kristoff in ehr verkeken hett. Se gaht tosamen los, üm Kristoff to söken. Op’n Fjord draapt Elsa un Hans op’nanner. He vertellt Elsa, dat ehr Süster dör ehr Kraft doodbleven is. Elsa dröpt dat swoor un so lett de Sneestorm op’n Slag na, wat Anna un Kristoff de Mööglichkeit gifft, sik to drapen. As Anna aver sütt, dat Hans jüst dorbi is, ehr Süster Elsa ümtobringen, smitt se sik twüschen de beiden, üm Elsa to redden. Se früst in den Ogenblick to en Iesstatue fast. Elsa mutt dat mit ansehn un brickt in Tranen ut.

Kort dorna daut Anna aver wedder op, vunwegen dat ehr Daat, sik för ehr Süster to oppern, as ok de Truer vun Elsa en Akt vun wohre Leev dorstellen doot. De Töverkraft verlütt ehr Macht. Elsa warrt kloor, dat de Leev de Slötel is, üm ehr cryokineetschen Kräft to kontrolleren. Un dormit kann se nu ok den ewigen Winter wedder vun Arendelle nehmen un Olaf sien persönlich Mikroklima mit en egen Sneewulk geven, dat he ok de warme Tiet vun’t Johr översteiht. Hans sien Plaan dorgegen is opflagen un so warrt he to Straaf wedder torüch in sien Heimatriek verbannt. Bito brickt Elsa den Hannel mit den Duke vun Weselton för all Tieten af. De Doren vun’t Slott schüllt nu jümmers apen blieven un Kristoff warrt to’n offiziellen Ieshökerer vun Arendelle maakt. He un Anna warrt opletzt en Poor.

Kritik[ännern | Bornkood ännern]

De Kritiken to’n Film weern to’n gröttsten Deel good, wat sik ok in de Weerten op Rotten tomatoes un IMDb wiesen deit.

  • Op kino-zeit.de stünn to lesen, dat sünners de lebennigen un utriepten Figuren den Film afsluut kiekensweert maken deen. Ok de Film-Welt, de mit ehr Fjorden, Woolden un Bargen mit Afsicht an norweegsche Landschoppen anlehnt is, weer technisch opwännig maakt, wat den positiven Samtindruck afrunnen de. Tosamenfaat weer de Film rasante un kloke Kinoünnerhollen för’t Hart för Jung un Oolt, de de Tokiekers perfekt op de kolle Johrestiet instimmen de.[1]

Utteken[ännern | Bornkood ännern]

De Film hett groten Spood hat, wat ünner annern annern ok an de Priesen un Utteken to marken is. Bit Juni 2014 weer dat Wark meist söventig mol för Filmpriesen vörslahn un is mit 42 dorvun utteken worrn, so as ünner annern mit:

Stimmen[ännern | Bornkood ännern]

Rull Originalspreker Düütsche Synchronisatschoon
Anna Kristen Bell Dialoog: Yvonne Greitzke
Singen: Pia Allgaier (as Fro), Magdalena Haier (in de Jöögd), Valeska Gerhart (as Kind)
Elsa, De Ieskönigsche Idina Menzel Dialoog: Dina Kürten
Singen: Willemijn Verkaik
Kristoff Jonathan Groff Leonhard Mahlich
Olaf, de Sneemann Josh Gad Hape Kerkeling
De Hartog vun Weselton Alan Tudyk Robert Palfrader
Hans Santino Fontana Dialoog: Robin Kahnmeyer
Singen: Manuel Straube
Oaken Chris Williams Nik Hartmann

Anners wat[ännern | Bornkood ännern]

Walt Disney Pictures harr al fröher de Idee, dat Märken vun Andersen to adapteren. Man, de Plaan is 2002 opgeven worrn. Eerst 2010 weer dat Projekt wedder opgrepen. In’n Dezember 2011 geev Disney den Titel Frozen bekannt, un dat de Film in’n November 2013 rutkamen schüll.

För den Film weern tomeist de sülven Animaters insett, de ok al bi’n Disney-Film Tangled (dt.: Rapunzel – Neu verföhnt) mitarbeit hebbt. Dorop warrt ok in’n Film anspeelt, vunwegen dat Rapunzel as ok ehr Ehmann Flynn Rider en Cameo-Optritt in de Krönungsszeen hebbt.[2]

Weltwiet hett de Film bit Mai 2014 1,219 Millionen US-Dollars inspeelt, un is dormit de föfftspoodriekste Animatschoonsfilm vun all Tieten.[3] Bito is dat de spoodriekste Film vun’t Johr 2013 wesen, de vör The Lion King ok den eersten Platz beleggt vun de Spoodrieksten Animatschoonsfilmen ut de Disney Studios. [4]

Borns[ännern | Bornkood ännern]

  1. Filmkritik op kino-zeit.de, afropen an’n 20. November 2013
  2. Spotted: Rapunzel and Flynn at Elsa’s Coronation
  3. ‘Frozen’ Skates Past ‘Iron Man 3′ To Become Fifth Highest-Grossing Movie Of All Time Worldwide vun Anita Busch op Deadline.com, afropen an’n 25. Mai 2014
  4. Översicht vun de Inspeelresultaten bi boxofficemojo.com.

Weblenken[ännern | Bornkood ännern]