Franziska Preuß

Franziska Preuß 2014

Franziska Preuß (* 11. März 1994 in Wasserburg am Inn) is en düütsch Biathletin.

Sportliche Loopbahn

Tonächst weer Preuß in de Lichtathletik aktiv, kreeg aber in' März 2009 vun hör Öllern en Gutschien för dat Programm „Biathlon erleben“ in Fritz Fischer sien Biathlon-Trainingscamp schunken. In de Folg nehm se up Anraaden vun Fischer in de Pingstferien an dat Stützpunkttraining in Ruhpolding deel.

In hör tweet Biathlonsaison 2010/11 seker se sück bi de düütsch Meesterschapen (Klassifizeeren J17) den Titel in' Sprint un doröver herut tweet Plätze sowohl in dat Eenzel as ok mit de Staffel. Sluutend wunn se ok noch de Gesamtwertung vun den Düütschlandpokal 2011 (J17) un keem dordör ok in de C/D Kader vun den Düütschen Skiverband. Hör bitlang gröttsten Erfolge gelungen Preuß in Januar 2012, as se bi de eerst Olympisch Jöögd-Winterspelen dree Gold- un een Sülvermedaille winnen kunn un to de spoodriekste Athletin vun de Wettkämpen wurr. Bi de etwa een Maand later folgen Juniorenweltmeesterschapen in dat finnisch Kontiolahti leep se in' Eenzel up den teihnten un mit de Staffel up den sössten Platz. In' Sprint reck se Platz 36 un in de Verfolgung Rang 29.

In' September 2012 seker se sück bi de Düütsch Juniorenmeesterschapen in Oberhof Platz een in' Massenstart un Platz twee in' Speziallangloop. Dör good Leistungen in' Düütschlandpokal qualifizeer se sück Anfang Januar 2013 för de Junioren-Weltmeesterschapen in Obertilliach. t'n Uptakt belegg se bi den Sieg vun hör Mannschapskollegin Laura Dahlmeier Rang fiev in' Sprint un hett sück in de ansluuten Verfolgung as ok in dat Eenzelrennen jewiels de Bronzemedaille haalt. Mit de Staffel wurr se denn noch Eerste un wunn so hör darte Medaille bi disse Veranstaltung.

Hör eersten Start in' Fruenberiek hett se in' Februar 2013 bi de Biathlon-Europameesterschapen in Bansko bestreeden. Nah en nich so gooden Eenzelwettkamp reck se in' Sprint den fievten Platz. In dat ansluuten Verfolgungsrennen kunn se sück up den tweeten Platz verbetern un wurr achter de poolsch Starterin Monika Hojnisz Viezeuropameesterin. Gröttste Spood bi de EM wurr de Staffelwettkamp, in de se mit Nicole Wötzel, Vanessa Hinz un Karolin Horchler vör dat Team ut Tschechien Europameesterin wurr. Bi de Düütsch Meesterschapen in Langdorf un Ruhpolding hett se in September 2013 jewiels den Titel in de Verfolgung, in' Eenzel un in' Massenstart haalt.

To'n Anfang vun de Saison 2013/14 wurr Preuß in den Weltcup-Kader beropen. In hör eerst Rennen, en Eenzel in Östersund, keem se up den 44. Platz. In Annecy-Le Grand Bornand gelung hör en 6. Platz in' Sprint un in' Staffelrennen schaff se as Startlöperin, tosommen mit Andrea Henkel, Franziska Hildebrand un Laura Dahlmeier, hör eersten Weltcupsieg. An' 12. Januar 2014 schaff se in Ruhpolding in de Verfolgung mit een Fehler un mit en bannig good Loopleistung den 4. Platz un somit hör best Karriereresultat.

In' Februar 2014 nehm se an de Biathlon-Wettbewarfen bi de XXII. Olympisch Winterspelen in Sotschi deel, ahn dor aber en vörderen Platz to beleggen. In de Saison 2014/15 nehm Preuß weer an' Weltcup deel un wunn as Slusslöperin in Hochfilzen, tosommen mit hör Teamkolleginnen Luise Kummer, Franziska Hildebrand un Vanessa Hinz, hör darten Staffel-Weltcupsieg. In Ruhpolding wurr Preuß in' Massenstart Tweet un wunn dormit hör eerst Weltcup-Medaille in en Eenzelrennen. Mit Franziska Hildebrand, Vanessa Hinz un Laura Dahlmeier wunn se bi de Biathlon-Weltmeesterschapen 2015 dat Damenstaffelrennen un in' Massenstart de Sülvermedaille achter Walentyna Semerenko (Ukraine) un vör Karin Oberhofer ut Italien.

Wiel Veronika Vítková un Kaisa Mäkäräinen achter hör in't Teel keemen, övernehm se as jüngste Biathletin dat root Trikot in' Massenstart. An' Enn' vun de Saison wunn se ok de Weltcupwertung in' Massenstart un keem in de Gesamtweltcup up den negenten Platz.

De Saison 2015/16 gung för Preuß ähnlich spoodriek los. Vun de eerst acht Rennen kunn se veer ünner de best Teihn afsluuten. An de Wettkämpe in Ruhpolding kunn se wegen en Hoorreet in dat Steßbeen nich mehr deelnehmen. De harr se sück all bi den eersten Weltcup in dat sweedsch Östersund totrucken, en Diagnose geev dat aber eerst later. Nah en längere Paus nehm se eerst weer in dat kanaadsch Canmore an Weltcuprennen deel. Se reck dor in‘ Sprint den sössten Rang un wunn gemeensam mit Franziska Hildebrand, Arnd Peiffer un Simon Schempp de Mixedstaffel. In Presque Isle wurr se in de Staffel gemeensam mit Luise Kummer, Miriam Gössner un Karolin Horchler Dart. Bi de Biathlon-Weltmeesterschapen 2016 in dat norweegsch Oslo wunn se in de glieker Besetten as in Canmore de Sülvermedaille mit de Mixedstaffel un gemeensam mit Franziska Hildebrand, Maren Hammerschmidt un Laura Dahlmeier Bronze in‘ Staffelwettkamp. Trotz de Tatsaak, dat se nich all Rennen bestrieden kunn, reck se in den Gesamtweltcup aber noch Platz 12 un keem in' Verfolgungsweltcup noch up Platz 9.

Mit en veerten Platz bi dat eerste Rennen vun de Saison, den Eenzelwettkamp in dat sweedsch Östersund, is se spoodriek in de Biathlon-Weltcup Saison 2016/17 un seker sück dormit ok all glieks de Nomineeren för de Weltmeesterschapen in Hochfilzen. Wegen mehrere Erkrankungen nehm se aber denn nich an de Wettkämpe in Pokljuka, Oberhof un Antholz deel. Liekers reck se, insbesünnere mit dree Top-10-Platzeeren in Nové Město na Moravě, good Ergevnisse un wunn gemeensam mit Vanessa Hinz, Maren Hammerschmidt un Laura Dahlmeier dat Staffelrennen bi den Heimweltcup in Ruhpolding. Anfang Februar muss se aber doch de Deelnahm an de Weltmeesterschapen afseggen, wiel se nah Ruhpolding noch mal an Gripp krank wurrn is, eenfack nich fit noog weer, um an de Wettkämpe deeltonehmen.

Privatleven

Preuß leevt in Albaching. Se hett de ie Staatliche Fackböverschool (FOS) in hör Gebortsoort Wasserburg am Inn besöcht un 2012 dat Fackabitur afleggt. An' 1. August 2012 wurr se in dat Toll-Ski-Team upnommen un fung en Utbillen as Zollwachtmeisteranwärterin an.

Weblenken

Franziska Preuß. Mehr Biller, Videos oder Audiodateien to’t Thema gifft dat bi Wikimedia Commons.

• Franziska Preuß in de Datenbank vun de IBU (engelsch)
• Franziska Preuß bi den Düütschen Skiverband
• Franziska Preuß bi de Bundstollverwalten
• Franziska Preuß up de Internetpräsenz vun dat Biathloncamp Fritz Fischer
• Informatschonen, sammelt Presseberichte un Ergevnisse vun Franziska Preuß up de Internetsiet vun den SC Haag