Andrea Henkel

Vun Wikipedia
Zur Navigation springen Zur Suche springen
Andrea Henkel wiels de Biathlon-Weltmeesterschap in Ruhpolding 2012

Andrea Burke, borene Henkel (* 10. Dezember 1977 in Ilmenau) is en ehmalge düütsch Biathletin.[1]

De jüngere Süster vun de Langloop-Olympiasiegerin Manuela Henkel is in dat döringsch Großbreitenbach uppwussen un stunn mit veer Johr eerstmals up Langloopskie. Af 1991 hett se dat Sportgymnasium in Oberhof besöcht un dor 1996 hör Abitur maakt. In dat sülvig Johr wurr se in de Sportfördergrupp vun de Bundswehr upnommen, wo se den Rang vun en Hauptfeldwebel recken dee. Die Sportsoldatin traineer meest in Oberhof ünner de Leiden vun hör langjohrig Heimtrainer un lateren Fruen-Bundstrainer Gerald Hönig, to hör ehmalgen Trainern tellen Manfred Geyer un Harald Böse. Hör Managerin is de frühere Weltklasse-Biathletin Petra Behle. In' März 1995 geev de veerfack Juniorenweltmeesterin in' Biathlon-Weltcup hör Instand, siet de Saison 1998/1999 hörr se ahn Ünnerbreeken to dat düütsch Weltcupteam an. Hör eerste Eenzelsieg gelung hör in' Dezember 1999 in dat sloweensch Pokljuka in dat Massenstart-Rennen.

Bi de Olympisch Winterspelen vun Salt Lake City gelungen Andrea Henkel 2002 mit den Gewinn vun de Goldmedaillen in' Eenzel un in de Staffel de eerst groot Erfolge in hör Loopbahn. Nahdem dat denn dree Johr lang nich goot in de Karriere leep, hett se 2005 bi de Weltmeesterschapen in Hochfilzen unverwacht weer Gold över de 15 km un wurr dormit as eerste Biathletin Olympiasiegerin un Weltmeesterin över de Langstreck. 2007 wurr Henkel in Antholz bi de Dreefackerfolg vun de düütsch Skifruen to'n eersten Mal düütsch Massenstart-Weltmeesterin un seker sück todem eerstmals WM-Gold mit de Staffel. Mit de Gewinn vun den Gesamt-Weltcup 2006/2007 hett se hör bit dorhen spoodriekste Saison vun hör Karriere kröönt, in de se tovör all de Disziplinenwertung in' Eenzel up hör Naam schreeven harr.

Bi de Weltmeesterschapen vun Östersund reck Andrea Henkel 2008 mit hör Düppelsieg in Sprint un Verfolgung Historsches in' Biathlonsport – as eerste Athletin harr se dat schafft, in all veer Eenzeldisziplinen en WM-Titel to haalen.[2] Mit de Staffel wunn se dorto ok noch de Goldmedaille un weer dormit neben Magdalena Neuner de spoodriekste Deelnehmerin bi disse Weltmeesterschap. Dornah muss se aber fiev Johr töven, bevör se 2013 bi de Titelkämpen in Nové Město na Moravě mit Sülver över 15 km noch eenmal en Eenzelmedaille wunn, nahdem se in de beid Johren tovör in Chanty-Mansijsk un Ruhpolding to'n darten bzw. veerten Mal Staffel-Weltmeesterin wurrn weer.

Siet den 25. Oktober 2014 is Andrea Henkel mit den US-amerikaanschen Biathleten Tim Burke verheiraadt.[3] Nah hör aktiven Karriere wull se in de Vereenigte Staaten utwannern un dor as Fitnesstrainerin arbeiten.[4]

Karriere in' Biathlon-Weltcup[ännern | Bornkood ännern]

Anfänge in dat Weltcup-Team[ännern | Bornkood ännern]

Hör Debüt in' Biathlon-Weltcup geev Andrea Henkel in' März 1995 bi den Weltcup in Lillehammer. In' Eenzelwettkamp reck de 17-Johrige mit söss Straafminüüten den 30. Rang un in' Sprint den 21. Platz. Rund dreeeenhalv Johr nah de eerst Bewährungschance hett sück de intüschen veerfack Junioren-Weltmeesterin to de Saison 1998/1999 en Platz in dat düütsch Weltcup-Team rutkämpt. In Hochfilzen fier se een Dag nah hör 21. Gebortsdag as Teihnte in' Sprint en gelungenen Instand un kunn dat Ergevnis mit goot Leistungen in de folgen Rennen ünner Bewies stellen, ünner annern schaff se in Osrblie in dat Verfolgungsrennen dank en fehlerfree Scheeten mit Platz fiev hör best Saisonergevnis. Bit in den Januar rin sett sück Henkel in de wiedere Welttipp fast un leeg nah twee söbenten Platzen in Oberhof tüschendör up den sössten Rang vun de Gesamtwertung.

In Ruhpolding un Antholz hemm sück den aber eerstmals Rückslääg instellt: nahdem se in' Massenstart to'n achten mal in negen Rennen ünner de best 15 loopen weer, hett in de denn folgen veer Wettkämpen blots noch een Weltcuppunkt haalt. Vun den Damen-Bundstrainer Uwe Müssiggang wurr Henkel aber trotzdem för de Biathlon-Weltmeesterschapen in Kontiolahti nomineert, wo se in Sprint un Verfolgung to'n Insatz keem un de Plätze 12 un 18 recken dee. In Lake Placid kreeg se as Negente över de 7,5 km noch en Top-Ten-Resultat hen, bevör sück in Valcartier un bi dat Saisonfinale in Oslo tonehmend en Substanzverlust bi de jung Löperin bemarkbor maken dee. Nah en Null-Punkte-Weekenenn' in Kanada nehm se an' Holmenkollen blots noch an de in Finnland utfallen WM-Entscheedungen deel un belegg in Eenzel un Massenstart de Plätze 26 un 20. Hör eerst Weltcupsaison hett se up Positschoon 14 vun dat Gesamtklassement afslooten.

Henkel as beständigste düütsch Biathletin[ännern | Bornkood ännern]

In de Saison 1999/2000 gelung Andrea Henkel de endgültige Dörbröök in de Welttipp, ok wenn se anners as in dat Vörjohr slecht in den Winter keem: wiel de dormals noch to de en beten slelchtere Langlöperinnen tellen Fru ut Döringen to völ Fehler in dat Scheeten ünnerleepen, verfehl se in in Hochfilzen un Pokljuka in veer Wettbewarfen gliek dreemal de Punkteränge. Bi den vun Osrblie nah Pokljuka verleggten darten Weltcup leep dat för Henkel mit dat Scheeten as begäng un se kunn sück mit en achten Platz in dat Sprintrennen noch so jüst eben för den Massenstart, in de se sück mit en Vörsprung vun 1 Sekunn up Swetlana Ischmuratowa ehrn eersten Weltcupsieg haalen kunn. In de Folg hett se sück mit bannig beständig Leistungen in de Weltstipp fastsett, in13 vun de noch utstahn 18 Saisonrennen leep se ünner de best Teihn. In' Januar wurr Henkel ünner annern twee mal Fievte in Oberhof un eenmal Sösste in Ruhpolding, bevör se in Antholz nah Rang dree över de 7,5 km in dat Verfolgungsrennen ehr tweeten Weltcupsieg fiern kunn.

Twee wiedere Top-Ten-Platzeeren reck se in Östersund een Week vör de Weltmeesterschapen in Oslo, to deren Uptakt se in Sprint un Verfolgung up Platz 8 bzw. 5 keem. Nahdem se in den Eenzelwettkamp wegen fiev Scheetfehler nich över Platz 40 herutkommen weer, wunn Henkel in de Staffel mit Sülver hör eerste WM-Medaille. In den afsluuten Massenstart verlor se mit Platz 16 de Führung in' Disziplin-Weltcup un dormit ok hör eerst Root Trikot. Nah en kört Verhalenspaus stell se sück in Lahti weer in goot Form vör un schaff as Tweet över de 15 km un Dart in de Verfolgung to'n veerten un fievten Mal in disse Saison den Sprung up dat Podest. Mit de Plätze 6, 10 un 11 seker sück Henkel bi dat Weltcup-Finale in Chanty-Mansijsk noch den fievten Rang in de Gesamtwertung un weer dormit unverwacht de Bestplatzeerte ünner de düütsch Skijägerinnen.

Dat dat kien Tofall ween weer, stell se in de Saison 2000/2001 ünner Bewies, in de se dat Ergevnis nochmal schaffen dee un hör Teamkolleginnen achter sück leet. As all in de vörherig Saison gelungen hör in' internen Vergliek de meest Top-Ten-Resultate, todem reck se as Eenzige ut de Mannschap bi all Start ok de Punkteränge. In Antholz – Ersatzutrichter vun de dree Dezember-Weltcups − verpass Andrea Henkel as Tweet vun dat Uptaktrennen över 15 km mit den letzten Schööt den mögelken Sieg. Nah mäßig Afsnieden in twee upnannerfolgen Sprintrennen keem se in de denn folgen veer Rennen immer ünner de best Teihn, in de afsluuten Verfolgung wurr se nochmal Tweet. In' Januar leep dat nich so goot, se reck as best Ergevnisse blots Platz 4 över de 7,5 km in Oberhof un as Söbente in dat Verfolgungsrennen vun Ruhpolding, wobi se dor 19 Platze goot maakt harr. Ansonsten reck se blots Platzeeren tüschen 13 und 20.

Passend to de Biathlon-WM in Pokljuka kunn Henkel hör Scheetleistungen weer stabiler to hollen, nah Platz 11 in' Sprint leeg se in de Verfolgung vör dat letzte Scheeten up Medaillenkurs, nahdem se mit en düütlichen Rückstand vun 64 Sekunn up Rang dree in dat Rennen start weer. Mit hör eenzigen Fehlschööt an dissen Dag verpass se aber dat sekere Eddelmetall un full up de Slussrunn noch achter Magdalena Forsberg un Olga Pylewa up Platz fiev torüch. Nah Platz negen in' Eenzelwettkamp wurr Henkel mit de Staffel to'n tweeten Mal Viezweltmeesterin, ehrn Startplatz för den Massenstart muss se togunsten vun Martina Beck rüümen, de in dissen Wettbewarf de Sülvermedaille wunn. Nah den Saisonhööchtpunkt reck bi de Testrennen up de Olympiastrecken vun Soldier Hollow as Darte in' Sprint noh en Podestplatz, bi de fiev wiedere Insatzen dor as ok – nah Startverzicht in Lake Placid – bi dat Saisonfinale an' Holmenkollen recck se mit Platzeeren tüschen veer un acht ok bannig goot Ergevnisse.

Düppel-Olympiasieg in Salt Lake City[ännern | Bornkood ännern]

Mit dre Podestplätzen in de eerst veer Saisonrennen weer Andrea Henkel spoodriek in den Olympiawinter rinkommen: In Hochfilzen belegg se bi den Uptaktsprint Rang twee, över de 15 km un in de Verfolgung wurr se in Pokljuka jewiels Dart. Mit en elften as ok twee sössten Plätzen ut Eenzel, Sprint un Massenstart leep Henkel in Osrblie saisonövergriepend to'n 16. Mal in Folg ünner de best Elf un rück in' Gesamt-Weltcup zp den tweeten Rang achter de domineeren Magdalena Forsberg vör. Se harr mit disse Form ok to den engeren Krink vun Favoriten för de Winterspelen in Salt Lake City tellt, aber to'n Johreswessel wurr se an en Bronchitis krank, wat hör torüchsmieten dee un de hör de Deelnahm an de Heimrennen in Oberhof kösten dee. Immer noch licht anslahn verfehl se bi hör Comeback in Ruhpolding eerstmals siet meest twee Johren de Punkteränge, as se in de Verfolgung vun Startplatz 20 up Rang 36 torüch full. To'n Anfang vun de olympisch Biathlonwettbewarfen vun Soldier Hollow funn se sück dorum in de gewohnt Rull vun de Butensiederin weer.

Doch wiels de groot Favoritinnen unverwacht swaak weern, stell sück Andrea Henkel in' Eenzelwettkamp weer in best Verfaaten dor un kunn de Gunst vun de Stünn to hör eersten groot Eenzelspood – den Olympiasieg över de 15 km bruuken. Nah en „Ruhedag“ reck dat in' Sprint mit twee Straafrunnen blots to'n 25. Platz, vun de se sück in dat Verfolgungsrennen mit de fievbest Tiet bit up Rang 13 vörkämpen dee. Een Week nah hör eersten Triumph fier se in de afsluuten Staffelentscheeden den Gewinn vun de tweet Goldmedaille, to de se mit en fehlerfree Scheetleistung bidroog. Bi den letzt dree Weltcups in Östersund, Lahti un Oslo full de Großbreitenbacherin in en Formlock un rutsch mit minn 35 Punkte ut de letzt söss Wettbewarfen in de Gesamtwertung noch bit up Positschoon 13 af. In Massenstart-Weltmeesterschapsrennen an' Holmenkollen keem se mit dree Scheetfehler un meest veer Minüüt Rückstand up Platz 21.

Sportlich Daalfohrt Karrieredeept[ännern | Bornkood ännern]

Nah den eersten Karrierehööchpunkt kunn Andrea Henkel in de Saison 2002/2003 blots noch selten an hör in de vergangen dree Winter wiest Bestleistungen anknütten. Solide gung dat los in Östersund mit dree Top 15-Platzeeren ut veer Rennen, bleev aber in Osrblie düütlich achter ok hör eegen steegen Verwachten torüch: In' Sprint keem se blots up Platz 50, hör bit dorhen slechts Ergevnis in en Weltcuprennen. De Verfolgung weer nich völ beter – söss Straafrunnen un Rang 36. Dat Johr 2003 fung mit de Platzen 4 un 12 in Oberhof an, aber denn geev dat en „Achterbahnfohrt“. De Verfolgung vun Ruhpolding sloot se as Veerte af, muss dorbi aber 20 Plätze ut den Sprint uphaalen. In Antholz folg Platz 31 in' Sprint un Rang 11 in de Verfolgung.

In Lahti geev dat denn den nächsten Utrutscher nah ünnern. Nah Rang 27 över de 7,5 km ünner de nich mehr as 41 Starterinnen wurr se in' Massenstart mit acht Straafrunnen Letzte. Een Week later leep dat jüst weer anners rüm. In Oslo geev dat vör hör Platz negen un söss in Sprint un Verfolgung. Bi den Weltcup in Östersund reck dat för Platzeeren tüschen 14 un 20. För de Biathlon-Weltmeesterschapen 2003 in Chanty-Mansijsk harr se sück teamintern nich dörsetten kunnt. Se keem dor blots in dat Eenzelrennen to'n Insatz, för dat se as Olympiasiegerin en persönlich Startrecht harr. Dat Rennen hett se up Rang 16 afslooten. In' Gesamt-Weltcup belegg se an' Enn' Rang 17.

Ok de Saison 2003/2004 leep nich goot. Grund weer gesundheitlich Probleme in de Vörbereitung un ok de Umstellung up en nee Gewehr. De Saisonstart mit blots söben Punkte ut de eerst fiev Rennen gung all mal gewaltig dorneben. In Osrblie harr se wat mehr Spood. Dor wurr se in' Sprint 14 un in de Verfolgung keem se ahn Scheetfehler up Platz 6. Nahdem se krankheitsbedingt den Weltcup in Pokljuka versüümt harr, seech dat so ut, dat sück de positive Tendenz mit twee Top Ten-Platzeeren in Ruhpolding fortsetten dee, in Antholz folgten denn aber mit de Platze 29 un 43 ut Eenzel un Sprint prompt nee Rückslääg. Bi de Heim-Weltmeesterschapen in Oberhof weer se meest immer buten vör, blots in' Eenzelwettkamp gung se an den Start. Dor hett se fiev mal dorneben schaaten, so dat mehr as Platz 26 ok nich to recken weer. De letzten Rennen vun de Saison leepen ehrder dörsnittlich, hör best Ergevnisse weern twee twalfte Platzen. An' Ann' vun de Saison belegg se in den Gesamtweltcup Platz 29.

Wendepunkt in Hochfilzen[ännern | Bornkood ännern]

Nach den twee swaak Johren muss Andrea Henkel in' Vörfeld vun de Saison 2004/2005 eerstmals ernsthaft um hör Platz in dat Weltcupteam bang ween. Nahdem en interne Qualifikatschoon ünner irregulären Bedingungen stattfunnen harr, kreeg se vun Bundstrainer Uwe Müßiggang up Letzt doch noch eenmal den Vörtoog. Dat in hör sett Vertruen kunn se bi den Saisonuptakt in Beitostølen as Överraschenstweet in' Sprint un Achte in de Verfolgung tonächst rechtfertigen. Aber all in Oslo kunn se mit Ergevnissen tüschen Platz 22 un 31 nich mehr an disse Leistungen anknütten un bit den Februar rin keemen ok kien wiedere Top Ten-Platzierungen un blots veer Resultate ünner de best 15 dorto. So stunn Henkel in Pokljuka bi den letzten Weltcup vör de WM in Hochfilzen all weer ünner Erfolgsdruck. Mit en veerten Rang in de Verfolgung vun Startplatz 20 kunn se woll noch mal up sück upmarksom maken, aber eenig weer se jetzt buten vör. Eerst dat Pech vun hör Früendin Martina Beck, de hör Deelnahme mit Bronchitis un Rippenfellentzündung afseggen muss, leet Henkel doch noch in dat WM-Upgebot uprücken.

Nahdem Teamkollegin Simone Hauswald an dat Uptaktweekenenn' mit 32. Platzen nich goot afslooten harr, kreeg de eegentlich blots as Reservistin vörsehn Andrea Henkel doch noch en Insatzchance un leep över de 15 km dat villicht wichtigst Rennen vun hör Loopbahn: as all bi hör Olympiasieg schaff se en herutragend Scheetergevnis paart mit en unverwacht goot Loopleistung. Dorto keemen de Fehler vun de Konkurrenz, so dat se en unverwacht binah märkenhaft mit de Goldmedaille kröönt Comeback fiern kunn. Mit so en Ergevnis kunn man hör in de Staffel ok nich mehr buten vör laaten. Mit de Staffel wurr se denn noch Viezweltmeesterin un in' Massenstart folg en goot 7. Platz. Mit de Platzen 11 un 15 in Sprint un Verfolgung as ok den fievten Rang in' Massenstart nah tüschentietlich Führung kunn se bi dat Weltcupfinale in Chanty-Mansijsk ehrn Upwärtstrend fortsetten. An' Enn vun disse Saison stunn se up Platz 14 in de Weltcup-Gesamtwertung.

To de olympisch Saison 2005/2006 stell sück Andrea Henkel in't Loopen düütlich verbetert dor. Dat düüt sück all to'n Uptakt in Östersund an, as se nah Platz 14 in' Sprint eerstmals den darten Rang in de Verfolgung halen dee. In dat 15 km-Rennen vun Hochfilzen hull se lang Kurs up en Podestplatz, bevör se nah dree Straafminüüten bi dat letzte Scheeten noch up Platz 19 torüch full. Nah den sössten Platz över de half Distanz beleev se in Osrblie en unverwachten „Rückfall“ in slechter Tieden, as se up de Langstreck 36. wurr un sück as 67. in' Sprint eerstmals in hör Karriere nich för ei Verfolgungsrennen qualifizeeren kunn. Nah de Wiehnachtspaus leep dat weer beter. Nah twee negente Platzen in Oberhof, nah ordentlich Afsnieden in Ruhpolding stell se sück in Antholz, de letzt Statschoon vör de Winterspelen vun Turin, in löperisch Bestform vör, as se in Sprint un Verfolgung de Ränge söss un söben recken dee. Dorto keem noch Platz 2 in dat Massenstart-Rennen. Dornah gung dat in de Olympia-Vörbereitung.

Ofschons de Titelverteidigerin hör goot Loopform nicht harr hollen kunnt, leeg se bi de Olympisch Winterspelen in San Sicario över de 15 km noch bit to dat veerte Scheeten utsichtsriek in den Kamp um Eddelmetall, neh twee Fehler in't Scheeten muss se sück an't Enn mit den „undankbaren“ veerten Platz tofräe geven. Wiels Sprint un Verfolgung keem se nich to'n Insatz, wunn dornah aber mit de Staffel de Sülvermedaille. Bi den Massenstart keem se up Rang 13.

Bi de naholympisch Weltcups in Pokljuka un Kontiolahti broch sück Henkel mit deels mäßigen Scheetleistungen um betere Platzeeren, ofschons hör Resultate dank goot Looptieden mit je tweemal Rang 6 un 13 as ok eenmal Rang 18 so slecht nich weern. Bi dat Saisonfinale an' Holmenkollen gelung hör in dat Verfolgungsrennen nah en Verbetern um 16 Positschonen as Negente noch en Top Ten-Ergebnis, in' Massenstart reck se den 23. Platz un kunn den Weltcupwinter dormit up en gooden söbenten Platz in dat Gesamtklassement afsluuten.

Sieg in' Gesamt-Weltcup[ännern | Bornkood ännern]

Henkel mit den Weltcup bi de Siegerehrung in Chanty-Mansijsk

Dreemal harr Andrea Henkel in Uptaktrennen as Tweet knapp den Sprung in dat Geel Trikot verpasst, in Östersund övernehm se dat to'n Start in de Saison 2006/2007 nah en veerten Platz över de 15 km un mit den achten Rang in' folgen Sprint sogar ahn Podestplatz. In dat Verfolgungsrennen kunn se dat as Sösste mit blots minimalem Vörsprung behaupten, bevör se sück bi den Düppel-Weltcup in Hochfilzen as ernsthafte un eerste Anwärterin up den Gesamtsieg rutstellem dee, as se mit immer düütlecher Afstände vun bit to meest een Minüüt nahnanner in Sprint, Verfolgung un Eenzelwettkamp wunn un as Dart in' tweeten Sprint hör spoodriek Serie afrunnen dee. Nah den Johreswessel hett Henkel in Oberhof mit de Platzen 2 un 9 hör Vörsprung in de Gesamtwertung wieder vergröttert, hör Chancen up den Gewinn vun de groot Kristallkugel, de dat vör den Gesamtsieg gifft, swunnen aber mit een Slag, as se wegen en Bronchitis den Weltcup in Ruhpolding utlaaten muss.

Nah twee wiederen Rennen Dwangspaus in Pokljuka mell se sück woll mit en achtboren 11. Platz in den dor stattfinnen Massenstart torüch, de Afstand to de nu meest gliekup an de Tipp liggen Kati Wilhelm un Anna Carin Olofsson bedroog aber all wat mehr as 100 Punkte. Henkel hett hör Hoopen nu besünners up de WM in Antholz richt, doch tonächst ahn Spood: mit dree Straafrunnen belast keem se in' Sprint nich över den 23. Rang herut, nah Platz 10 in de Verfolgung full se över de 15 km mit de darte Straafminüüt ut de Medaillenrängen up Platz 6 torüch. In dat Massenstartrennen hett se sluutend hör letzte Chance up en Eenzelmedaille wohrnehmen kunnt, nah fehlerfree letzt Scheeten kunn se sück up de letzte gegen Martina Beck den tweeten WM-Titel in hör Loopbahn halen, gemeensam wurrn beid een Dag later nochmals eerstmals Weltmeesterin mit de düütsch Staffel.

Bi de letzt dree Weltcups leep Henkel nochmal to en Hööchstform up un seker sück in Lahti mit den fievten Saisonsieg den Gewinn vun de Disziplinenwertung in' Eenzel. Över de 7,5 bzw. 10 km keem se jewiels up den veerten Platz. Mit hör teihnten Weltcupsieg as ok en tweeten un en zehnten Rang minneseer se in Oslo hör Rückstand in de Gesamtwertung up Olofsson un Wilhelm un mit de Platzen 2 un 3 ut Sprint un Verfolgung kunn se bi dat Saisonfinale in Chanty-Mansijsk sogor to de beid upsluuten; blots söss Punkte hemm hör vör den afsluuten Massenstart vun dat punktgliek Spitzenduo trennt. In dit Rennen leep dat för Andrea Henkel ok nich besünners goot. Se harr gliek fiev Fehler bi dat eerste Scheeten, aber se entwickel en grooten Kampgeist un hett nich upgeven. Se keem up Letzt up Platz 15 in nah en restlich optimalen Leistung. Hör beid Kontrahentinnen bleven aber ok wiet ünner hör Mögelkeiten, so dat Andrea Henkel doch noch dormit den insgesamt darten düütschen Gesamt-Weltcup-Sieg fiern kunn. Se kunn to'n eersten Mal de groot Kristallkugel in Empfang nehmen.

Golden Daag in Östersund[ännern | Bornkood ännern]

In Kontiolahti is Andrea Henkel mit Rang 18 in' Eenzelwettkamp in de Saison 2007/2008 start, as Veerte un Tweete in Sprint un Verfolgung seech dat so ut, as wenn de Weltcup-Titelverteidigerin all fröh weer an de starke Form vun den Vörwintter anknütten kunn. In de Folgetiet harr de 30-Johrige aber tonehmend mit Unsekerheiten an' Scheetstand to kämpen. In Hochfilzen un Pokljuka verfehl se in veer Wettbewarfen 14 Schieven un rutsch in de Ergevnislisten nah un nah vun Rang söss över de Platz 10 un 11 bit up de Positschoon 20 af. Mit wiederen fievteihn Fehlschööt bleev de Trendwenn bi de Heimweltcups in Düütschland ut, nah weer en 20. Platz över de 7,5 km in Oberhof verpass de Lokalmatadorin in' Massenstart den Sprung up dat Podest as Veerte trotz fiev Straafrunn aber blots um wenig Meter. In Ruhpolding keem se up de Ränge acht un fiev, bevör se sluutend in Antholz up eenmal hör anhollen Probleme in Greep kreeg un sück in dree Wettbewarfen blots noch twee Straafrunnen infung. Nahdem se in' Sprint blots vun Kati Wilhelm dwungen wurrn weer, fier se in Verfolgung un Massenstart hör eerst beid Saisonsiege.

Henkel gelung dat, disse Form bit to de Weltmeesterschapen in Östersund to hollen. Mit fehlerfree Scheetleistungen legg se to'n Uptakt den Grundsteen för hör Titelgewinn in' Sprint – mit den se ok de Führung in' Gesamt-Weltcup övernehm – un den souveränen Start-Teel-Sieg in de Verfolgung. Över de 15 km un in' Massenstart keem se aber nich mit de böig Windverhältniss torecht un keem in beid Rennen jewiels up den 22. Platz. Mit de Damenstaffel schaff se to'n Afsluss noch de spoodriek Titelverteidigung. In dat letzt Saisondrittel keemen de Unsekerheiten an den Scheetstand torüch, bi de Weltcup-Premiere in Pyeongchang muss Henkel dat Geel Trikot nah de Platzen 17 un 5 weer afgeven. In Chanty-Mansijsk wohr se tonächst de Chance up den tweeten Gesamtsieg in Reeg as Fievte un Darte över de kört Distanzen un mit Rang 13 in' Massenstart, dat weer aber daan in dat Verfolgungsrennen vun Oslo ein, as se vun Startplatz fiev nah den Sprint um teihn Positschonen torüchfull, wodör se ok den mögelken Gewinn vun den Disziplinweltcup verpassen dee. Hör teihnte Weltcupsaison sloot se nah Platz 16 in dat afsluuten Massenstartrennen up den darten Rang in de Gesamtwertung af.

Nah de twee bannig spoodriek Winter kunn Andrea Henkel in de Saison 2008/2009 hör weer hooch ansett Teelen nich recken. In de eerst fiev Saisonrennen in Östersund un Hochfilzen keem se woll immer ünner de best 15, in Tirol eenmal as Darte ok up dat Podest, aber se harr weer to völ Scheetfehler, wat hör hinnern dee, to'n Deel völ betere Ergevnisse to haalen. Dat tweete Weekenenn' in Hochfilzen gung ganz dorneben: Platz 32 un 56 in Eenzel un Sprint un 11 Fehlschööt. In Oberhof keem Henkel över de 7,5 km to hör eersten Weltcup-Sieg in Düütschland – wenn ok mit en Verspätung vun een Maand wegen de nahderhen vörnommen Disqualifikatschoon vun Jekaterina Jurjewa. In de nächst veer Rennen reck se Resultate tüschen Platz 11 un 16. Scheeten kunn se nu weer beter, in't Loopen weer se aber nich mehr so stark as in de Maand vörher. In Antholz gung se in de Verfolgung un in' Massenstart as Darte bzw. Tweete up de Slussrunn, muss aber in beid Rennen jewiels noch dree Konkurrentinnen vorbitrecken laaten.

Bi de Weltmeesterschapen in Pyeongchang kunn Andrea Henkel kien een vun hör dree Titel vun Östersund verteidigen, wegen de Verletzung vun Sekerheitsvöröschriften wurr de Sprint-Sösste vör dat Verfolgungsrennen sogor disqualifizeert.[5] Nah Rang 10 över de 15 km wunn se mit de Mixed-Staffel Bronze un Sülver mit de Fruenstaffel. De letzte Chance up den anstreevten Gewinn vun en Eenzelmedaille hett se as Fievte in' Massenstart mit je twee Fehler in dat Stahndscheeten vergeven, nahdem se bit dorhen vörn leegen harr. Twee fievte Platzen reck se ok bi de Olympia-Generalproov in Whistler, bevör se in Trondheim mit en perfekt Scheetleistung vun Startplatz 10 ut den Sieg in dat Verfolgungsrennen schaff. Bi dat Weltcup-Finale in Chanty-Mansijsk reck se mit Platz 3 in' Massenstart noch en goot Resultat, se wunn aber weder en Disziplinweltcup noch reck se den anstreevten Platz ünner de eerst Dree in' Gesamtweltcup – hör bleev blots Platz fiev.

Staffelbronze in Whistler[ännern | Bornkood ännern]

Andrea Henkel mit hör Staffel-Bronzemedaille vun de Olympisch Winterspelen 2010

In' veerten Anloop schaff Andrea Henkel to'n Start in hör darten Olympiawinter mit Platz söss in de Verfolgung vun Hochfilzen hör eerst Top Ten-Ergebnis vun de Saison, nahdem se in de anner Rennen nich över Platz 17 rutkommen weer. Nah Platz 5 in dat Eenzel vun Pokljuka harr se mit Platz 43 in' Sprint mit veer Fehler en ganz slechten Dag, kunn dat aber wat utglieken mit de Besttiet vun den Dag bi dat Verfolgungsrennen, so dat se dor up Platz 10 lannen dee. Ähnlich weer dat nah den Johreswessel in Oberhof, över 7,5 km harr se sogor söss Scheetfehler, wat to Platz 38 führen, twee Dag later an glieker Stäe kunn se denn hör eersten Saisonsieg in' Massenstart fiern. In Ruhpolding un vör allen in Antholz schien Henkel to rechte Tiet in Olympia-Form to kommen, nah twee Top Ten-Resultaten in de Chiemgau-Arena besteeg se in Südtirol all Stufen vun dat Podest je eenmal, nah Platz dree över 15 km un Rang twee in' Sprint wunn se de Verfolgung.

Se gull as Mitfavoritin bi de Olympisch Winterspelen. In Whistler bleev se in de Eenzelwettbewarfen aber ahn Medaille. Över de kört Distanzen belegg se de Platzen 27 un 10, bevör se över de Langstreck as Sösste hör best Resultat reck. Wegen Materialproblemen keem se in' Massenstart trotz blots een Straafrunn nich över Rang negen herut. In de afsluuten Entscheidung broch se de düütsch Staffel as Slusslöperin immerhen noch up en Bronzeplatz. Bi de letzt dree Weltcups in Kontiolahti, Oslo un Chanty-Mansijsk leep se in söben Wettbewarfen noch dreemal ünner de best teihn, en Podestplatz weer aber nich dorbi. In de Gesamtwertung vun de Saison keem se up den veerten Platz. Bi dat letzt Saisonrennen, den Weltmeesterschapen in de nich-olympisch Mixed-Staffel, keem se nich mehr to'n Insatz.

Nah eenig gesundheitlich Problemen in de Vörbereitung is Andrea Henkel ahn groot Verwachten insbesünnere an hör Loopform in hör 13. Weltcupsaison start - un weer woll sülvst överrascht, dat se to'n Uptakt mit twee Top Ten-Ergevnissen in Eenzel un Sprint in Östersund losleggen dee. Wiel hör Scheetleistungen in den wiederen Verloop vun den Dezember nich up de Stand vun de eerst Rennen bleeven, geev dat weder in Hochfilzen noch in Pokljuka wiedere Platzeeren ünner de best Teihn. Pünktlich to de Heimweltcups in Düütschland weer se in Januar aber denn weer in Bestform, nah Rang dree in den Sprint vun Oberhof muss se sück in' Massenstart ünner Flootlucht nah en packend Slussrunn in' Endspurt blots Helena Ekholm slahn geven. Noch dree wiedere tweete Plätze geev dat in Eenzel, Sprint un Verfolgung vun Ruhpolding, nahdem hör dor bit dorhen noch nie in en Eenzelrennen de Sprung up dat Podest gelungen weer. In Antholz is se över de 7,5 km mit twee Scheetfehler noch up Platz veer loopen, in' Massenstart keem se mit dree Straafrunnen aber nich över Platz 15 herut.

As Weltcup-Führende kehr Henkel vun de Rennen in de USA torüch. In Presque Isle keem se in' Sprint woll blots up Platz 25 , kunn aber in de Verfolgung 20 Plätze goot maken. Mit twee Siegen över de kört Distanzen un as Tweete in' Massenstart kreeg se in Fort Kent dat Geel Trikot. Bi de Titelkämpe in Chanty-Mansijsk verlor se as 20. vun den Sprint de Führung weer, keem denn in de Verfolgung ahn Scheetfehler up Rang veer, wat gliekbedüüdend mit hör best Rennen dor weer. Över 15 km fung se sück negen Straafminüüt in, wat en persönlich Negativrekord weer. Ok in' Massenstart keem de 33-Johrige nich över Platz 13 herut. Sülver in de Mixed-Staffel un Gold mit de Damenstaffel kunn de ehrder slecht persönliche Bilanz blots deelwies överdecken. In Oslo ansluutend keem se in de Verfolgung noch mal up den darten Platz un in den Massenstart up Platz 4. In de Weltcup-Gesamtwertung keem se an' Enn' vun de Saison up den tweeten Platz.

Up den Weg nah Sotschi[ännern | Bornkood ännern]

Nah anhollen Liestenproblemen wiels de Vorbereitungstiet kunn Andrea Henkel in de Saison 2011/2012 nich an de starke Form vun dat Vörjohr anknütten. Ok wenn dat in't Scheeten in disse Saison en nee persönlich Bestmarke för hör geev, reck dat an' Enn' in den Gesamtweltcup blots to Platz 8. In den eersten Weltcup-Block in Östersund un Hochfilzen kunn se sück in fiev vun söben Rennen ünner de best Teihn platzeeren, hör best Ergevnisse reck se in de beid Verfolgungsrennen in Tirol as Veerte bzw. Sösste. Nah den Afsteker to de World Team Challenge up Schalke keem Henke bi den Heimweltcup in Oberhof up Platz fiev un hett denn up en Pressekonferenz bekanntgeven, dat se hör Karriere bit to de Olympisch Winterspelen 2014 fortsetten will. Een Dag later gelung hör in' Massenstart as Darte de eerste Podestplatzeeren vun den loopen Winter. Nah en dörwussen WM-Generalproov in Nové Město na Moravě muss se in Antholz wegen en Footbesehren in Sprint un Staffel en Paus inleggen, in' Massenstart keem se up den 13. Platz.

In Oslo hett Henkel in de Verfolgung ut Versehns een Straafrunn mehr as nödig maakt un full vun Startplatz 5 up Rang 11 torüch. In' Massenstart gelung hör de eenzige Saisonsieg, kunn dordor aber ok en Stippvisite in de Loge von König Harald V. wohrnehmen. In Kontiolahti leep se bi tweestellig Minusgraden up de Platzen 16 un 8 över de lütt Distanzen. Bi de Heim-Weltmeesterschapen in Ruhpolding kunn se nah bronzenem Uptakt in de Mixed-Staffel as ok all in dat Vörjohr bi all Eenzelstarts mit Utnahm vun dat Verfolgungsrennen nich övertüügen. Dorbi harr se ahn Scheetfehler mit de tweetbest Tiet vun den Dag reckt, keem aber trotzdem blots up Platz 11, wiel se in' Sprint all ahn Utsichten up Spood up Platz 34 land weer. Över de Langstreck wurr se mit veer Straafminüüt blots up Rang 20 noteert, wunn as Slusslöperin mit de Fruenstaffel en Goldmedaille, um bi dat Massenstartrennen up Platz 12 rintokommen. Hör veerteihntste Weltcupsaison hett se in dat sibirisch Chanty-Mansijsk mit Top Ten-Resultaten in all dree Wettbewarfen afslooten, dorünner Platz 6 över de 7,5 km.

Mit dree Top Ten-Ergevnissen un en Stiegern vun Rennen to Rennen is Andrea Henkel in Östersund in hör 15. Weltcup-Saison gahn. Nah Rang acht in' Eenzel harr se in Sprint un Verfolgung kien Straafrunn aftoleisten un wurr so Fievte bzw. Darte. In Hochfilzen keem se bit de lütt Distanzen tweemal up Platz 17, wat an Scheetfehler leeg. In Pokljuka keem se in disse Rennen jewiels up Platz 7 un in' Massenstart belegg se Rang 11. Nah den Johreswessel keem se in Oberhof in' Sprint up Platz 3 verlor de aber in de ansluuten Verfolgung un keem dor up Platz 7. In Ruhpolding verpass se as Veerte över de 7,5 km blots knapp dat Podest, in' Massenstart keem se mit twee Scheetfehler up Platz 13. In den letzten Weltcup vör de Weltmeesterschapen in Antholz kreeg se mit de Platzen 25 un 12 de wenigst Punkte in de eerste Saisonhälft.

As in dat Vörjohr ok reck dat bi dat Sprintrennen vun de Biathlon-Weltmesterschapen in Nové Město nah dree Straafrunnen blots för Rang 33. Dor hulp denn ok en fehlerfree Scheeten un Dagbesttiet nich, um en Medaille to recken, aber Platz 6 weer denn all en goot Fortgang vun de Wettkämpe. In' Eenzel wunn se denn ahn Scheetfehler Tweete – de överragen Tora Berger weer noch beter. Nah den Gewinn vun hör eerst nich-golden Eenzelmedaille weern veer Scheetfehler in' Massenstart to völ, so dat se dor blots up Platz 13 rinkeem.

Nah de WM reck se an' Holmenkollen de Platzen 6, 9 un 12. Dornah gung dat nah Sotschi to de Generalproov för hör veerte olympisch Spelen. Up de ansprööksvull Strecken verpass se över de 15 km mit blots een Straafminüüt as Veerte den Sprung up dat Siegerpodest knapp, denn aber in' Sprint nah veermal Vörbischeeten as 52. sogor de Punkteränge. Mit dree Top Ten-Resultaten, dorünner de tweete Platz in' Sprint, kunn se sück bi dat Saisonfinale in Chanty-Mansijsk up den bannig goot darten Rang in de Gesamtwertung behaupten.

Afscheedstournee ahn Happy End[ännern | Bornkood ännern]

Ünnerschrift

Mit en teihnten Platz över de 15 km nehm Andrea Henkel in Östersund den letzten Weltcup-Winter vun hör Loopbahn in Angreep. In de Verfolgung, in de se vun Platz 13 ut starten dee, beleev se en Rennafbröök wegen slecht Weer, bi störmisch Wind harr se bit dorhen nich mal 50 Perzent vun de Schieven drapen. Wenig Daag vör hör 36. Gebortsdag leep dat in' Sprint vun Hochfilzen ok nich beter, as se mit veer Fehler in' Stahndanslag as 55. binah de Verfolgung verpassen dee, in de se nah twee wiedere Straafrunnen 29. wurr. In de anner Richt gung dat in dat Jagdrennen vun Le Grand Bornand, wo se trotz ideale butere Bedingungen glieks fiev mal dorneben scheeten dee un so vun Rang 13 up Rang 32 torüch full. Bi den Heimweltcup in Oberhof bleev de Sportlerin ut Döringen eerstmals siet söss Johr ahn Podestplatz, keem aber in' Massenstart aber up Platz 4. Ok in Ruhpolding, licht anslahn, keem se blots up de Platzen 17 und 14. Ganz anners leep dat denn in Antholz - kien een Fehlschööt wiels das ganze Weekenenn keem se in' Sprint up den 2. Platz un vun dor ut reck se in de Verfolgung hör 22. un togliek letzten Weltcupsieg.

Bi de denn folgen Winterspelen in Sotschi geev dat för hör aber trotzdem kien Happy End. In' Sprint leeg se as 22. mit een Straafrunn, aber ok an Bronchitis krank blots een half Minüüt achter den Bronzerang. Uphalen kunn se dat in de Verfolgung nich, mit dree Fehler full se sogor noch up Platz 29 torüch. In' Eenzel is se nich antreeden. Dat hulp aber ok nich för den Massenstart. Ok wenn se meest kien Fehler an' Scheetstand harr, keem se blots up Platz 17.Ok in de Damenstaffel geev dat nah dat Malör vun de Startlöperin Franziska Preuß kien Eddelmetall. Bi de naholympischen Statschonen in Pokljuka un Kontiolahti leep Henkel in twee vun fiev Rennen ünner de best Teihn, dat schaff se as Teihnte ok in de Gesamtwertung to'n negenten Mal nahnanner un insgesamt 11. Mal in 16 Johren. Nahdem se in de Verfolgung vun Oslo as eenzige Starterin fehlerfree bleev un sück vun Rang 31 up 12 vörkämpt harr, lann se in dat Massenstartrennen up Platz 13. Dat weer denn hör 375. Eenzelrennen in' Weltcup in hör lang un spoodriek Loopbahn as Biathletin.

Staffelinsätze[ännern | Bornkood ännern]

In' Januar 1999 keem Andrea Henkel in Oberhof an de Siet vun Uschi Disl, Simone Greiner-Petter-Memm un Martina Zellner to hör eersten Insatz in en Weltcupstaffel un kunn glieks den eersten Sieg fiern. All in hör tweet Weltcupsaison wurr se denn Stammkraft in de düütsch Mannschap un wunn in de Johren 2000 un 2001 in Oslo un Pokljuka jewiels mit Sülver hör eerst beid Staffelmedaillen. To'n Hööchtpunkt in den eersten Deel vun hör Staffelkarriere wurr aber de Gewinn vun de olympisch Goldmedaille in Salt Lake City 2002, as se gemeensam mit Katrin Apel, Uschi Disl, un Kati Wilhelm spoodriek weer. Dat bleev aber ok eerst mal dat letzte Eddelmetall för hör, de wiels de folgen Karieredeept ruch weg twee Johr lang nich mehr in de Staffel to'n Insatz keem.

Bi de Titelkämpe vun Hochfilzen 2005 geev Henkel hör Comeback in en Weltmeesterschaps-Quartett un to hör Gold-Coup in' Eenzelwettkamp mit de Staffel denn noch de Sülvermedaille. Een Johr later tell se bi de Olympisch Winterspelen vun Turin weer to de fast Grötten in dat Team vun den langjohrigen Bundstrainer Uwe Müßiggang, dat aber weer vun de russisch Mannschap slahn wurr. Gemeensam mit Martina Beck, Magdalena Neuner un Kati Wilhelm hett Andrea Henkel denn 2007 bi de Weltmeesterschapen in Antholz gliek twee lang Dörststrecken vun de DSV-Fruen afslooten: dat eerste Staffelgold nah mehr as twee Johren ahn Sieg un dat eerste WM-Gold siet 1999. 2008 gelung dat Quartett de Titelverteidigung in Östersund, verlor aber 2009 in Pyeongchang de Goldmedaille weer an Russland un muss sück mit Sülver tofräe geven.

Ebenfalls 2009 in Pyeongchang kunn sück Henkel ok över hör eerst Medaille in de Mixed-Staffel freuen, an de Siet vun Simone Hauswald, Arnd Peiffer un Michael Greis wunn se Bronze un hett dorbi um blots teihn Sekunn verpasst, as eerste Biathletin in jede vun de to Tiet söss WM-Disziplinen mindst eenmal Gold wunnen to hemm. 2010 wunn se tosommen mit Kati Wilhelm, Martina Beck un Simone Hauswald de Bronzemedaille in de Biathlonstaffel bi de Olympisch Winterspelen in Vancouver. Een Johr later wunn se in Chanty-Mansijsk an de Siet vun Miriam Gössner, Tina Bachmann un Magdalena Neuner hör darten WM-Titel mit de Fruenstaffel, nahdem se tovör in’ Verbund mit Magdalena Neuner, Arnd Peiffer as ok Michael Greis all Sülver in de Mixed-Staffel wunnen harr. Bi de Heim-Weltmeesterschapen in Ruhpolding 2012 hett Henkel nah Bronze mit de Mixed-Staffel neben Magdalena Neuner, Andreas Birnbacher un Arnd Peiffer as Slusslöperin vun dat Fruenquartett de spoodriek Titelverteidigung in de gliek Besetten as in Sibirien perfekt maakt

Vun hör letzt Weltmeesterschaften in Nové Město keem Henkel dorgegen ahn Mannschaps-Eddelmetall torüch. Mit de Mixed-Staffel lann se to’n Uptakt wiet afslahn up Platz 13, as letzte Löperin vun dat Damen-Team, vergeev se de Medaillenchance mit twee Nahladen bi dat letzt Scheeten un reck dat Teel blots up den fievten Platz.

Ok bi dat letzt Grootereignis in hör Loopbahn, de Olympisch Winterspelen vun Sotschi, harr se kien Glück. Nahdem se all in de Mixed-Staffel nich to’n Insatz keem, kunn se de düchtig Nackenslag för de blots up Platz 11 lannen düütsch Fruenstaffel ok nich mehr afwennen, nahdem se vun de Startlöperin Franziska Preuß mit rund dree Minüüt Rückstand praktisch utsichtslos in’t Rennen schickt wurrn weer. In hör letzt Weltcup-Staffelrennen wurr se tovör in Antholz vun dichten Nebel stoppt, in’ Dezember 2013 harr se in Le Grand Bornand noch hör 24. Erfolg in de Mannschap haalt.

Utteknungen (Uttoog)[ännern | Bornkood ännern]

  • 2002 – Sülvern Lorbeerblatt
  • 2005 – Sportler vun dat Johr in Döringen
  • 2006 – Sülvern Lorbeerblatt
  • 2007 – Golden Ski vun den Düütschen Skiverband (hööchste Utteknung vun den DSV)[6]
  • 2007 – Sportler vun dat Johr in Dlöringen
  • 2008 – Golden Ski vun den Düütschen Skiverband[7]
  • 2008 – Sportler vun dat Johr in Döringen
  • 2010 – Sülvern Lobeerblatt
  • 2011 – Holmenkollen-Medaille[8]
  • 2011 – Sportlerin vun dat Johr in Döringen
  • 2013 – Golden Ski vun den Düütschen Skiverband
  • 2013 – Sportler vun dat Johr in Döringen

Enkeld Nahwiesen[ännern | Bornkood ännern]

  1. [1] Andrea Henkel heißt jetzt Andrea Burke, Augsburger Allgemeine van' 27. Oktober 2014, afropen an' 29. Oktober 2014
  2. [2] Andrea Henkel schreibt Biathlon-Geschichte, afropen an' 3. November 2012
  3. [3] Biathlon-Olymiasiegerin Andrea Henkel hat geheiratet (afropen an' 26. Oktober 2014)
  4. [4] Grande Dame Andrea Henkel hört auf, afropen an' 23. März 2014
  5. [5] Willkommen im Chaos, afropen an' 3. November 2012
  6. [6], „Goldener Ski“ an beste DSV-Athleten vergeben, afropen an 3. November 2012
  7. [7] Henkel, Neuner und Wolf erhalten „Goldenen Ski“ des DSV, afropen an' 3. November 2012}
  8. [8] Holmenkollen-Medaillen für Bjoerndalen, Greis und Henkel, afropen an 3. November 2011

Weblenken[ännern | Bornkood ännern]

Commons-logo.svg Andrea Henkel. Mehr Biller, Videos oder Audiodateien to’t Thema gifft dat bi Wikimedia Commons.