Magdalena Forsberg

Vun Wikipedia
Zur Navigation springen Zur Suche springen
Magdalena Forsberg in Antholz 2006

Magdalena Forsberg (Nahnaam [[fɔʂbærj]], * 25. Juli 1967 in Ullånger, Gemeend Kramfors, as Magdalena Wallin) is en ehmalge sweedsch Biathletin. Mit 42 Weltcupsiegen un söss Gesamtweltcupsiegen is se en vun de spoodorieksten Biathletinnen in de Weltcuphistorie. Van 1997 bit 2002 weer se de domineerend Athletin vun den Biathlon-Weltcup.

Privatleven[ännern | Bornkood ännern]

Magdalena Forsberg is siet 1996 mit den sweedschen Biathleten Henrik Forsberg verheiraadt un hett mit hüm twee Kinner. Se wahnt in Bergeforsen.

Biathlonloopbahn[ännern | Bornkood ännern]

Magdalena Forsberg weer tonächst Liddmaat vun de sweedsch Natschonalmannschap vun de Skilanglöper un reck hör best Ergevnis mit en tweeten Platz bi en 10 km Rennen 1988 in Rovaniemi, keem aber dornah blots veer Mal ünner de Top Ten. Se hett dorum 1993 beslooten, to de Biathleten to wesseln un hörr bald to de Weltspitze in’ Biathlon, wiel se nicht blots goot loopen kunn, sonner ok en goot Schüttin weer.

Nahdem Forsberg bi de Weltmeesterschapen 1996 mit de Bronzemedaille in’ Sprint hör eerst Medaille winnen kunn, wurr se all een Johr later 1997 tweefack Weltmeesterin. In Osrblie wunn se den Eenzelwettbewarf vör Alena Subrylawa un Ekaterina Dafowska un wurr mit den Sieg in’ Verfolgungswettbewarf vör Subrylowa un Olga Romasko to de eerste Weltmeesterin in disse Disziplin. In’ Sprintwettbewarf kunn se sück todem en Bronzemedaille sekern. Bit 2001 kunn se veer wiedere Titel halen.

In’ Weltcup weer se noch spoodrieker: Sössmal nahnanner kunn se den Gesamtweltcup in’ Biathlon winnen, all tosommen wunn se 42 Weltcuprennen. Dorför wurr se mit den Titel Biathletin des 20. Jahrhunderts uttekent.

To de indrucksvullste Saison vun de sweedsch Biathletin, in de hör Dominanz besünners düütlich weer, tellt de Saison 2000/2001. Forsberg wunn mit Sprint un Verfolgung in Antholz[1][2]; Sprint, Verfolgung un Massenstart in Oberhof[3][4][5]; Sprint un Verfolgung in Ruhpolding[6][7] as ok den Sprint in Antholz[8] acht Saisonrennen in Reeg, wat bit hüüd in’ Biathlonsport noch nich weer reckt wurrn is. All tosommen wunn se in disse Saison 14 Rennen un hollt dormit bit hüüd den Rekord an Saisonsiegen in’ Biathlon. In disse Saison reck se 19 vun 25 mögelk Podestplätzen, 22 Mal weer se ünner de Top Ten. Mit 1021 Punkten in’ Gesamtweltcup in de Saison 2000/01 hull de Sweedsche den Punkterekord in’ Biathlon bit to de Saison 2011/12 in de Magdalena Neuner den Rekord vun Forsberg mit 1216 Punkten överdrapen dee - allerdings nah dat nee Punktesystem, bi de de Siegerin 40 Punkte recken kunn. Neben den Gesamtweltcup wunn Forsberg buterdem all Disziplinenweltcups.

Ähnlich dominant verleep ok de nahfolgen Saison, in de Forsberg to’n sössten Mal in Folg den Gesamtweltcup un to’n tweeten Mal nah 2000/2001 all Disziplinenweltcups winne kunn. In dat Verfolgungsrennen vun Hochfilzen in’ Dezember 2001 gelung hör dat, en Vörsprung vun 3:13 Minuten up de Tweetplatzeerte Olena Subrylowa heruttoloopen. Se bleev as eenzig Athletin ahn Scheetfehler.[9] Dat aber ok so erfohren Athleten as Magdalena Forsberg nich för Fehler seker sünd, wies sück bi dat Sprintrennen Enn’ Dezember in Osrblie: In utsichtsriek Positschoon liggend hett se bi dat Stahndscheeten up de falsche Schiev teelt un schaaten. Se hett den Fehler aber gor nich murken un hett dat Rennen normal to Enn’ loopen un weer mit de beste Looptiet eenig up Platz 2 land. Se harr aber nu offiziell fiev Scheetfehler un harr eegentlich fiev Straafrunnen loopen musst. Weil se de aber nich loopen harr, wurr hör pro falsche Schiev 2 Straafminüüt torekent (also all tosommen teihn) un so keem se an’ Enn’ blots up den tweetletzten Platz.(Platz 95).[10][11] In disse Saison wunn se de eerst fiev Weltcuprennen nahnanner un söben vun de eerste negen Weltcuprennen.

De ganz groot Spood bi Olympisch Spelen bleev hör aber verseggt. To’n Afsluus vun hör Loopbahn wunn se in Salt Lake City 2002 twee Bronzemedaillen. Magdalena Forsberg verdankt hör Erfolge ok ehrn Trainer, den Düütschen Wolfgang Pichler. Se hett halfdags as Stüerberaderin arbeit, wiel in dat in Sweden en Sportförderung för Biathleten nich gifft.

Bit to de Saison 2006/2007 hett Magdalena Forsberg as Biathlonexpertin bi de ARD arbeit, nu is se as Wintersportexpertin bi den sweedsch Feernsehsenner Sveriges Television to sehn.

Bilanz[ännern | Bornkood ännern]

Mit söss Gesamtweltcupsiegen in Reeg in de Johren 1997 bit 2002 is Magdalena Forsberg de alleenige Tipp bi de Gesamtweltcupsiege in’ Biathlon bi de Fruen. In de Johren 1997 bit 2002 wunn se ok den Verfolgungsweltcup söss Mal as ok in de Johren 1998 bit 2002 den Sprintweltcup fiev Mal in Reeg. All tosommen hett se 17 Disziplinenweltcupwertungen wunnen, tosommen mit de Gesamtweltcupsiege also 23 Weltcupwertungen. Bi de Fruen hett dat bit nu noch kien anner henkreegen. Todem hett se dat as eerste Biathletin schafft, den Gesamt-, Sprint-, Verfolgungs-, Eenzel- un Massenstartweltcup, also all Weltcupwertungen in een Saison (2000/01), to winnn. In de dorupfolgen Saison kunn se dat sogor noch mal schaffen. Mehr Weltcupkugeln as de sweedsch Biathletin hett bit hüüd kien anner Biathletin wunnen.

All tosommen hett Magdalena Forsberg 42 Weltcupsiege schafft, womit se de spoodriekste Biathletin ist. Spoodrieker sünd blots de Biathleten Ole Einar Bjørndalen un Raphaël Poirée. Se hett 124 Top-Ten-Platzeeren reckt, dorvan weern 87 Podestplätze.

Magdalena Forsberg wunn all tosommen söss WM-Goldmedaillen in Eenzelwettbewarfen.

Utteknungen[ännern | Bornkood ännern]

  • 1997 Radiosportens Jerringpris
  • 1998 Radiosportens Jerringpris
  • 1998 Victoria Award (Sport-Award in Sweden)
  • 2000 Radiosportens Jerringpris
  • 2001 Radiosportens Jerringpris

Weblenken[ännern | Bornkood ännern]

Enkeld Nahwiesen[ännern | Bornkood ännern]

  1. Ergevnis van’ 16. Dezember 2000 in Antholz (Sprint)
  2. Ergevnis van’ 17. Dezember 2000 in Antholz (Verfolgung)
  3. Ergevnis van’ 5. Januar 2001 in Oberhof (Sprint)
  4. Ergebnis van’ 6. Januar 2001 in Oberhof (Verfolgung)
  5. Ergebnis van’ 7. Januar 2001 in Oberhof (Massenstart)
  6. Ergevnis van’ 13. Januar 2001 in Ruhpolding (Sprint)
  7. Ergebnis van’ 14. Januar 2001 in Ruhpolding (Verfolgung)
  8. Ergevnis van’ 18. Januar 2001 in Antholz (Sprint)
  9. Ergevnis van’ 9. Dezember 2001 in Hochfilzen (Verfolgung)
  10. Forsberg traf falsche Scheibe
  11. Ergevnis von Osrblie