Ole Einar Bjørndalen

Vun Wikipedia
Ole Einar Bjørndalen

Ole Einar Bjørndalen (* 27. Januar 1974 in Drammen) is en ehmalger norweegsch Biathlet un blangen bi Skilanglöper.

Sowohl nah Antall vun de Titel as ok nah de Gesamttall vun de Medaillen is he bi Weltmeesterschapen un Olympisch Winterspelen de spoodriekste Athlet (Stand: Februar 2014). Siet 2011 kann he as eerst männlich Biathlet Weltmeestertitel in all Disziplinen vörwiesen. Een vun sien gröttsten Erfolge fier Bjørndalen bi de Olympisch Winterspelen 2002, as he all veer dor utdragen Biathlon-Wettbewarfen bi de Mannlüüd winnen dee. In' Biathlon-Weltcup reck he de meesten Siege un wunn ok den Gesamtweltcup an' fakensten.

2011 kreeg he de Holmenkollen-Medaille, een vun de hööchsten Utteknungen in' Skisport. Wiels de Olympisch Winterspelen 2014 wurr he vör acht Johr in de Athletenkommission vun den IOC wählt.

Biathlon[ännern | Bornkood ännern]

Anfänge un eersten Spood[ännern | Bornkood ännern]

To'n Biathlonsport keem Ole Einar Bjørndalen dör sien veer Johr ölleren Bröer Dag. Gemeensam mit den darten Bjørndalen-Bröer Hans Anton weern se dat „Team Bjørndalen“. 1992 hett he sien eerste internatschonalen Rennen bi de Junioren-Weltmeesterschapen bestreeden. Hier keem he up Platz 23 (Eenzel) un 47 (Sprint). Mit de Staffel keem he up den sössten Platz. En Medaille kreeg he denn aber in dat Teamrennen, wo he den darten Platz schaff. Een Johr later, 1993 in Ruhpolding, fier Bjørndalen bi sien tweet Juniorenweltmeesterschapen den Dörbröök. He wunn dree Goldmedaillen in veer Rennen (Eenzel und Sprint as ok Gold mit dat Team). In de Staffel keemen de Norwegen dorgegen blots up den achten Platz.

Vun sien Öller her, harr he 1994 nochmals bi de Junioren starten kunnt, he denn aber de Deelnahm an de Olympisch Winterspelen in Lillehammer vörtrucken. Sien eerste Weltcupsaison leep Ole Einar Bjørndalen in' Winter 1992/93. Nah sien för hüm wenig spoodriek verloopen eerst Olympisch Spelen 1994 in Lillehammer hett he to'n eersten Mal in de Saison 1994/95 up sück upmarksom maakt. Bi sien eerst Weltmeesterschapen 1995 in Antholz verpass he mit Platz 4 in' Sprint blots knapp en Medaille; in' Gesamtweltcup leeg he an dat Enn' vun de Saison gliekfalls up den veerten Platz.

Sien eersten Sieg bi en Weltcup-Rennen fier Ole Einar Bjørndalen in' Januar 1996 bi dat Eenzelrennen vun Antholz, an' Enn' vun de Saison 1995/96 belegg he in den Gesamtweltcup Platz negen. Sien eerste Weltmeesterschapserfolge fier de Norweger 1997 in Osrblie mit den Gewinn vun de Staffel-Sülvermedaille un de Bronzemedaille in de Verfolgung.

Lang Tiet weern Ole Einar un Dag dat Hartstück vun de norweegsch Natschonalmannschap, mit de gröötere Erfolge vun Halvard Hanevold, Frode Andresen un Egil Gjelland geev dat aber bald kien Platz mehr för Dag.

Dörbröök un eerste Rückslääg[ännern | Bornkood ännern]

De Saison 1997/98 wurr to'n eersten grooten Erfolg in sien Loopbahn. Bi de Olympisch Spelen in Nagano wunn Bjørndalen mit de Goldmedaille in' Sprint sien eerst olympische Medaille överhoopt, mit de norweegsch Staffel wunn he todem de Sülvermedaille. Bi de as Weltmeesterschapen utdragen nicholympischen Wettbewarfen weer Bjørndalen mit de norweegsch mannschap vörn un wunn dormit sien eerste WM-Goldmedaille, de Sülvermedaille in de Verfolgung weer sien bit dorhen best Eenzelleistung bi Weltmeesterschapen. An' Enn' vun de Saison wunn Bjørndalen todem to'n eersten Mal in sien Loopbahn den Gesamtweltcup un wurr mit de Aftenposten-Goldmedaille ehrt. 1996 wunn Bjørndalen buterdem twee Medaillen bi de Sömmerbiathlon-Weltmeesterschapen in Hochfilzen.

Nah de för Bjørndalen bannig spoodriek Saison 1997/98 bleev he ok in de folgen Johren düersam spoodriek in' Weltcup. Trotz beständ goot Leistungen muss he sück aber in' Gesamtweltcup dreemal in Folg mit den tweeten Platz tofräe geven. In de Saison 1998/99 wurr he vun den Düütschen Sven Fischer, in de Saisons 1999/00 un 2000/01 vun den Franzosen Raphaël Poirée slahn. Sien slechts Weltcuprennen överhoopt is Bjørndalen to' Uptakt vun de Saison 2000/01 bi dat Eenzelrennen vun Antholz loopen: Mit twalf Scheetfehler hett he sück de meest Fehler vun all Deelnehmer in dat Feld leist, an' Enn' keem he dormals blots up Platz 95.[1]

Bi Weltmeesterschapen wunn he kien Titel; sien best Ergevnisse weern twee Sülvermedaillen mit de norweegsch Staffel (2000) un in' Massenstart (2001). Bjørndalen bleev dormit ok nah sien söbente Deelnahm ahn Eenzel-Goldmedaille bi Weltmeesterschapen.

Triumph in Salt Lake City (2001/02)[ännern | Bornkood ännern]

To en vun de gröttsten Erfolge vun den Norweger wurrn de Olympisch Winterspelen 2002 in Salt Lake City. Bevör de Biathlöonwettbewarfen anfungen harr Bjørndalen all en Langloopwettbewarf över 30 km Freestil maakt un dorbi en beachtlichen fievten Platz reckt. Mit vergliekswies düütlich Afstännen up de jewieligen Sülvermedaillen-Gewinner hett he dornah in all dree utdragen Eenzelwettbewarfen wunnen. An' 11. Februar 2002 leeg he in den Eenzelwettbewarf 36,1 Sekunn vör den Düütschen Frank Luck, twee Daag later in' Sprint 28,9 Sekunn vör den Düütschen Sven Fischer as ok an' 16. Februar n dat eerstmals bi Olympisch Winterspen utdragen Verfolgungsrennen 43,0 Sekunden vör den Franzosen Raphaël Poirée.

Nahdem Bjørndalen gemeensam mit Halvard Hanevold, Frode Andresen un Egil Gjelland an' 20. Februar ok mit de norweegsch Staffel spoodriek ween weer, gung he ut all veer bi de Olympischen Winterspelen utdragen Wettbewarfen as Sieger herut. He weer dormit de spoodriekste Athlet vun disse Winterspelen un de eerste Biathlet, de mehr as twee Goldmedaillen binnerhalv vun de glieker Winterspelen wunnen hett

Ofschons de dree Eenzelsiege bi Olympia ok as Weltcupsiege tellen deen, reck dat vör Bjørndalen an' Enn' vun de Saison 2001/02 in' Gesamtweltcup blots to'n darten Platz achter Raphaël Poirée un den Russen Pawel Rostowzew.

An' Enn' vun dat Johr wurr he to den Sportler vun dat Johr in Norwegen wählt un wunn den Fearnleys olympiske ærespris.

Nahfolgen Saisons[ännern | Bornkood ännern]

Saison 2002/03[ännern | Bornkood ännern]

Nah de Spood bi Olympia kunn Bjørndalen in de folgen Johren wiedere Erfolge fiern. Nahdem in de Johren 2000 bit 2002 de Franzoos Raphaël Poirée dreemal nahnanner den Gesamtweltcup up sien Naam schrieven kunn, schaff Bjørndalen in de Saison 2002/03 sien tweeten Weltcup-Gesamtsieg nah 1998 mit all tosommen ölf Saisonsiegen un en Vörsprung vun 107 Punkten up den Wittrussen Wladimir Dratschow. Bi de an' Enn' vun de Saison in dat russische Chanty-Mansijsk utdragen Weltmeesterschapen hett he doröver herut in Sprint un Massenstart sien eerst beid Eenzel-Goldmedaillen bi Weltmeesterschapen haalt. Buterdem weern dat sien eerst Weltmeesterschaps-Goldmedaillen siet den Sieg mit de Mannschap in dat Johr 1998.

Saison 2003/04[ännern | Bornkood ännern]

To' Uptakt vun de Saison 2003/04 kunn Bjørndalen in Kontiolahti un Hochfilzen dree vun de veer utdragen Rennen för sück entscheeden. In' Verloop vun de Saison kunn he noch zwee Weltcuprennen winnen, keem fiev Mal up den tweeten Platz un weer dree Mal Dart. Trotz sien 901 Punkten in' Gesamtweltcup an' Enn' vun de Saison reck dat blots för Platz 2; de düersam Rivale vun Bjørndalen, de Franzoos Raphaël Poirée, wunn mit 1010 Punkten to'n veerten Mal de Gesamtwertung. Ok bi de Weltmeesterschapen in Oberhof stunn Bjørndalen in' Schadden vun den Franzosen, allerdings ok swächt dör den Dood vun sien Moder. Wiels Poiree dree Goldmedaillen wunn, bleev den Norweger en Sieg verwehrt. Mit de Staffel wunn he de Sülvermedaille, in de Eenzeldisziplinen all tosommen dree Bronzemedaillen.

Saison 2004/05[ännern | Bornkood ännern]

To Anfang vun de Saison leeg Bjørndalen nah twee Siegen in Beitostølen un Oslo knapp vör den dreemal spoodrieken Düütschen Sven Fischer un den Franzosen Raphaël Poirée, full denn aber in den Gesamtweltcup up Platz fiev torüch, wiel he den folgen Weltcup in Östersund to Langloop-Vörbereitung utleet. Nah twee veerten Platzen in Oberhof hett sück de Norweger mit fiev upnannerfolgen Siegen in Ruhpolding un Antholz de Weltcup-Führung woll torüch haalt, leet dornah de olympisch Generalproov in San Sicario aber ebenso ut as de beid eerst Weltcuprennen in Pokljuka. Blots dat dor stattfinnen Massenstartrennen leep he mit un wunn ahn Scheetfehler un en Vörösprung vun över een Minüüt.

Ähnlich domineerend weer Bjørndalen bi de Weltmeesterschapen 2005 in dat öösterrieksch Hochfilzen. Anfangs wunn he dat Sprint- un dat Verfolgungsrennen un an' Enn' vun de Weltmeesterschapen dat Massenstartrennen. Doröver herut weer he ok mit de norweegsch Staffel spoodriek. Blots in dat Eenzelrennen, in dat he up Platz söss keem, geev dat mit den Tschechen Roman Dostál en annern Sieger. Dör de veer Siege hett Bjørndalen de Antall vun sien wunnen WM-Goldmedaillen up söben schraaven.

Wegen de söben utlaaten Weltcuprennen leeg Bjørndalen in' Gesamtweltcup aber för de letzte Weltcupstatschoon in Chanty-Mansijsk achter Sven Fischer un Raphaël Poirée blots up den darten Platz. Nahdem in dat Sprint- und Verfolgungsrennen sowohl Fischer as ok Bjørndalen je eenmal wunnen un eenmal den veerten Platz beleggt harrn, profiteer de Norweger in dat letzt Saisonrenne dorvan, dat Sven Fischer krank wurr. De kunn as Weltcup-Führender nich an den Start gahn un Bjørndalen belegg achter Poirée den tweeten Platz in' Massenstart. Dormit seker he sück mit en Vörsprung vun ölf Punkten to'n insgesamt darten Mal doch noch die Gesamtwertung. Betrucken up de Gesamtleistung in den tatsächlich loopen Rennen weer de Norweger aber wiet vörn: In 20 Rennen wunn he twalfmal, dorvan achtmal in Reeg, un weer in de anner rennen nie nich slechter as Platz söss.

Saison 2005/06[ännern | Bornkood ännern]

Nah den Gesamtweltcup-Sieg in dat Vörjohr fung de nee Saison för Bjørndalen weer spoodriek an. Mit den Sieg in Östersund as ok en tweeten Platz in Hochfilzen övernehm he nah de beid eerst Weltcupstatschonen weer de Führung in de Gesamtwertung. Dör all tosommen söben utlaaten Rennen is he dornah aber bit up Platz 12 torüchfallen. As ok all in dat Vörjohr harr he de letzte Weltcupstatschoon vör Wiehnachten to'n Training utlaaten, to'n Johresanfang 20016 harr he en Verkollen un kun bi de beid Weltcups in Oberhof un Ruhpolding nich antreeden. Mit twee fievten Platzen as ok den Sieg in' Massenstart in Antholz, dat letzt Rennen vör de Olympisch Spelen, mell he sück dornah aber weer torüch.

De Olympisch Winterspelen in Turin verleepen för Bjørndalen aber nich so as verwacht. Mit veer Goldmedaillen weer he noch de domineeren Athlet vun Salt Lake City ween, in San Sicario wunn he nich een vun de olympisch Rennen. Tweemal leeg he in utsichtsriek Positschoon up en Goldmedaille: Bi dat Verfolgungsrennen muss he sück in' Teelsprint den Franzosen Vincent Defrasne slahn geven un wunn Sülver, in dat afsluuten Massenstartrennen broch he sück bit to dat letzt Scheeten in Führung liggend mit twee Scheetfehler sülvst um betere Chancen un wunn sluutend Bronze achter Michael Greis un Tomasz Sikora ut Polen.

Trotzen goot eegen Leistung belegg he mit de norweegsch Staffel (neben hüm: Harvard Hanevold, Stian Eckhoff un Frode Andresen) blots Platz fiev. Tosommen mit de Sülvermedaille in' Eenzel wunn he woll all tosommen dree Medaillen, stunn aber in' Schadden vun den Düütschen Michael Greis, de mit dree Goldmedaillen ähnlich spoodriek weer as Bjørndalen veer Johr vörher.

De Weltcuprennen nah Olympia leepen för Bjørndalen spoodrieker un hemm hüm ok in den Gesamtweltcup weer in en beter Positschoon brocht. Nah dree Siegen in Pokljuka un Kontiolahti leeg he vör de dree letzt Weltcuprennen in Oslo achter Raphaël Poirée up den tweeten Platz in de Gesamtwertung. Dör en överleegen Sieg in dat Sprintrennen vun Oslo, bi dat de Franzoos blots up Rang 46 rinkeem, övernehm Bjørndalen all nah dat eerst Rennen de Weltcupführung. De beid anner Rennen wunn he denn ok noch un wunn so mit en Vörsprung vun 119 Punkten to'n veerten Mal den Gesamtweltcup.

Saison 2006/07[ännern | Bornkood ännern]

Ole Einar Bjørndalen in Antholz, 2006

Nah den Gesamtweltcup-Siegen in de beid torüchliggen Johren hett Bjørndalen trotz ölf Saisonsiegen in de Saison 2006/07 dat nich schafft, den Gesamtweltcup ok en dart Mal in Reeg för sück to entscheeden.

De Saison fung för Bjørndalen mit fiev Siegen in Reeg in Östersund und Hochfilzen an. Disse Dominanz wurr eerst dör en Sieg vun Michael Greis braaken, as de Norweger de ersatzwies weer in Hochfilzen utdragen Wettbewarfen utleet un stattdessen an' Skilangoop-Weltcup in La Clusaz deelnehm. Midden Januar hett Bjørndalen in Ruhpolding twee Weltcupsiege haalt, buterdem weer he dor ok mit de norweegsch Staffel vörn. De een Week later in Pokljuka stattfinnen Rennen hett he weer to Vörbereiten utlaaten. Bjørndalen harr to dissen Tietpunkt söben vun sien loopen negen Eenzelrennen up sien Naam schrieven kunnt.

Ok bi de Weltmeesterschapen in Antholz leep dat för hüm goot mit. He wunn de Goldmedaillen in' Sprint un in de Verfolgung. Bi dat Eenzelrennen reck he nix aber mit de norweegsch Staffel de Sülvermedaille. In dat afsluuten Massenstartrennen hemm hüm veer Scheetfehler in de beid Stahndscheeten en Medaille köst, he keem an' Enn' blots up den veerten Platz.[2]

Um an de Nordisch Skiweltmeesterschap in Sapporo deelnehmen to können leet Bjørndalen den Anfang März in Lahti stattfinnen Weltcup ut, weer een Week later in Oslo aber weer tweemal spoodriek. Bi den afsluuten Weltcup in Chanty-Mansijsk hett he dat aber nich mehr schafft, sück in den Gesamtweltcup gegen den Düütschen Michael Greis dörtosetten.[3] Dat leeg denn ok doran, dat he immerhen acht Saisonrennen nich loopen harr.

Saison 2007/08[ännern | Bornkood ännern]

Nah den knapp verpassten Sieg in dat Vörjohr wunn Bjørndalen to'n fievten Mal in sien Loopbahn den Gesamtweltcup. He wurr dormit bi de Mannlüüd to'n alleenigen Rekordholler in disse Kategorie.

Nah dat eerste Saisondrittel leeg he mit je een Sieg in Kontiolahti, Hochfilzen un Pokljuka as ok twee tweete Platzen all an de Tipp vun de Gesamtwertung. Mit den Erfolgen bi de Massenstarts vun Oberhof un Antholz hett he in Januar de Erfolgsserie fortsett un hett ok in Oberhof un Ruhpolding mit de norweegsch Staffel twee Siege haalt.

Bi de Weltmeesterschapen in Östersund domineer he tosommen mit sien Landsmann Emil Hegle Svendsen un den Russen Maxim Tschudow. Bjørndalen wunn een Goldmedaille in' Verfolgungs- as ok twee Sülvermedaillen in' Eenzel- un Massenstartrennen. Sien darte Sülvermedaille wunn he mit de norweegsch Staffel, de sück blots den Russen slahn geven muss.

Nah sien söbenten Saisonsieg bi den Sprint vun Chanty-Mansijsk wunn he to'n Saisonenn' in Oslo mit en düütlichen Vörsprung vun 173 Punkten den Gesamtweltcup. Bit up den Eenzelweltcup, de an de Franzosen Vincent Defrasne gung, wunn he ok all Disziplinen-Weltcups.

Saison 2008/09[ännern | Bornkood ännern]

Disse Saison wurr to en vun de spoodrieksten Saisons in de Karriere vun den Norweger. As in dat Vörjohr ok wunn Bjørndalen den Gesamtweltcup, to'n veerten Mal binnerhalv vun fiev Johren un to'n sössten Mal in sien Loopbahn. He truck dormit mit de sweedsch Biathletin Magdalena Forsberg gliek. Doröver herut gelung hüm dat nah den Triumph bi Olympia 2002 un den Weltmeestertiteln 2005 in Hochfilzen to'n darten Mal, veerfack Titeldräger bi een Veranstaltung to wurrn.

De Saison fung för Bjørndalen mit twee tweeten Platzen in de Verfolgungrennen vun Östersund un Hochfilzen all mal goot an. In Ruhpolding hett he in’ vörletzten Weltcup vör de Weltmeesterschapen mit twee Eenzelsiegen in Sprint un Verfolgung ünnerstreeken, dat he to den Favoritenkrink hörr. Disse Rull hett he denn mal weer mehr as eendüüdig in Pyeongchang mit de Titeln in Sprint, Verfolgung, Eenzel un mit de Staffel bestätigt. Nah twee wiederen Weltcupsiegen in Trondheim un Podiumsplatzeeren bi de Olympiageneralproov in Whistler un in Chanty-Mansijsk seker sück de Norweger vör Tomasz Sikora un Emil Hegle Svendsen de Gesamtwertung.

Saison 2009/10[ännern | Bornkood ännern]

De Saison fung för Bjørndalen mit en 43. Platz in dat Eenzelrennen in Östersund an. Den folgen Dag bleev he aber fehlerfree un wunn den Sprint över 10 km vör Emil Hegle Svendsen. An den letzten Dag in Östersund reck he mit norweegsch Staffel en tweeten Platz. Bi den dorup folgen Weltcup in Hochfilzen wunn he den tweeten Sprint vun de Saison vör de Russen Nikolai Kruglow un Jewgeni Ustjugow. In de Verfolgung full he up den darten Platz torüch, nehdem he dree Fehler schaaten harr. In den Teelsprint weer he gegen sien Teamkollegen Emil Hegle Svendsen un den Öösterrieker Simon Eder ünnerlegen. In de Staffel nehm he nich deel un een Week later in Pokljuka is he nich antreeden.

Dat nee Johr fung spoodriek an. Bjørndalen wunn mit de norweegsch Staffel in Oberhof. In’ Sprint keem he aber blots up Platz 14 nah veer Fehler in dat Stahndscheeten. Den Massenstart dorgegen wunn he souverän mit een Minüüt Vörsprung vör den Amerikaner Tim Burke. Bi den tweeten düütschen Weltcup keem he up den tweeten Platz in’ Sprint achter sien Landsmann Emil Hegle Svendsen. In’ Massenstart keem he up den sössten Platz nah twee Scheetfehler. Mit de Staffel reck he denn weer den tweeten Platz. An den darten Weltcup in’ Januar in dat italieensch Antholz hett he wegen Krankheit nich deelnommen.

Bi de Olympisch Winterspelen in dat kanaadsch Vancouver gull Bjørndalen as Mitfavorit teil. In’ Sprint keem he wegen de Weerbedingungen blots up Platz 17. In dat Verfolgungsrennen harr he twee Scheetfehler un lann up den söbenten Platz. In dat Eenzelrennen över 20 km wunn Bjørndalen de Sülvermedaille, tietgliek mit Sjarhej Nowikau ut Wittrussland. He harr dorbi de flinkste Looptiet, harr aber twee Scheetfeler. Glieks söbenmal dorneben hett he in den Massenstart schaaten. Mehr as Platz 27 sprung dor denn nich mehr bi herut. An’ letzten Dag vun de Biathlonwettkämpe wunn he aber doch en Goldmedaille mit de norweegsch Staffel.

An den eersten Weltcup nah de Olympisch Winterspelen in Kontiolahti nehm Bjørndalen nich deel. In Oslo belegg he in’ Sprint Platz 54 nah fiev Scheetfehler. In de Verfolgung keem he denn noch up Platz 17, dor hett he blots eenmal vörbischaaten. In den Massenstart reck dat ok blots för Platz 13; Iwan Tscheresow hett dat Rennen wunnen. Bi den afsluuten Weltcup in dat russisch Khanty-Mansiysk keem he in’ Sprint up den fievten Platz; in’ Massenstart leep dat weer nich goot: veer Scheetfehler brochen blots Platz 15. An den letzten Dag vun de Saison 2009/10 wurr dat Weltmeesterschapsrennen vun de Mixed-Staffel utdragen, wiel de Mixed-Staffel 2010 kien olympisch Disziplin weer. Mit de norweegsch Mixed-Staffel, bestahnd ut Ann Kristin Flatland, Tora Berger, Emil Hegle Svendsen un hüm, wunn de Sülvermedaille achter de düütsch Staffel.

Bjørndalen sloot de Saison as Teihnt in den Gesamtweltcup af. In’ Sprintweltcup belegg he Platz söben, in de Verfolgung blots Rang 16. In den Massenstartweltcup wurr he ok Söbenter. Wiels de gesamte Saison harr Bjørndalen dreemal wunnen.

Saison 2010/11[ännern | Bornkood ännern]

De nee Saison fung för Bjørndalen bannig spoodriek an. In dat Uptaktrennen över 20 km in dat sweedsch Östersund keem he glieks up den tweeten Platz. An den nächsten Dag keem he ok in’ Sprint över 10 km up Platz 2. Un ut dat weer een Dag later stattfinnen Verfolgungsrennen gung he denn dogor as överleegen Sieger hervör.

Bi dat folgen Weltcupweekenenn’ in Hochfilzen keem he in’ Sprint up den teihnten Platz. In de Verfolgung över 12,5 km kunn he sück up den söbenten Platz verbeetern. Gemeensam mit den norweegsch Staffel wunn he dat Staffelrennen över 4 × 7,5 km. Bi den Weltcup in dat sloweensch Pokljuka leep dat in’t Eenzelrennen överhoopt nich, söben Scheetfehler hett he sück leist, Platz 55 weer dat Ergevnis. In’ Sprint reck dat för Platz 11. In de Mixed-Staffel hett he nich mitmaakt.

Anfang Januar reck he mit de norweegsch Staffel den darten Platz in Oberhof. In’’ Sprint hett he weer veer Fehler schaaten un keem up Platz 22. In’ eersten Massenstart vun de Saison leep dat nich beter – Platz 21. An dat folgen Weekenenn keem he up Platz 8 bi dat Eenzelrennen vun Ruhpolding. In’ Sprint harr he blots een Scheetfehler keem aber ok blots up Platz 17, de afsluuten Verfolgung över 12,5 km hett he nich bestreeden. In dat italieensch Antholz-Anterselva hett he an den Sprint nich deelnommen, in’ Massenstart harr he dree Fehler, keem aber liekers noch up den söbenten Platz. Mit de norweegsch Staffel keem he ansluutend noch up den darten Platz. De beid Weltcups in Presque Isle un Fort Kent in den USA hett he utlaaten.

Bi de Biathlon-Weltmeesterschapen in dat russisch Khanty-Mansiysk wunn Bjørndalen de Goldmedaille in de Mixed-Staffel (gemeensam mit Tora Berger, Ann Kristin Flatland un Tarjei Bø. In de Disziplinen Sprint, Verfolgung un Eenzel is he jewiels as Titelverteidiger antreeden. In' Sprint belegg he Platz 22, in de Verfolgung gor Platz 24. Dat Eenzelrennen över 20 km hett he as Sösste afslooten. Gemeensam mit de norweegsch Staffel (tosommen mit Alexander Os, Emil Hegle Svendsen un Tarjei Bø) wunn he denn sien tweete Goldmedaille bi disse Veranstaltung. In’ Gegensatz to sien Staffelkollegen harr he nich een Scheetfehlker. In den afsluuten Massenstart keem he weer up Platz 6 rin.

Bi den letzten Weltcup in Oslo keem he in’ Sprint up Platz 13. In de Verfolgung is he nich antreeden. In dat letzt Saisonrennen, den Massenstart över 15 km, wurr he noch mal Dart.

In’ Gesamtweltcup belegg he an’ Enn’ den teihnten Platz. In’ Sprintweltcup keem he up Platz 14 un in den Verfolgungsweltcup reck he Platz 20. In disse Saison hett Bjørndalen een Sieg un veer Podiumsplatzen schafft.

Saison 2011/12[ännern | Bornkood ännern]

De Saison 2011/12 fung mal weer temelk swaak an. In dat Eenzelrennen vun Östersund sprung nich mehr as Platz 43 herut. In’ Sprint, den Dag dorup belegg Bjørndalen Platz negen. De Verfolgung hett he as 27. afslooten. Bi den tweeten Weltcup in Hochfilzen belegg he in' Sprint Platz 19. In de Verfolgung keem he up den fievten Platz. An de Staffel hett he nich deelnommen. An dat folgen Weekenenn' funn de Weltcup wegen Schneemangel in Annecy weer in Hochfilzen statt. In' Sprint över 10 km beleg Bjørndalen ahn Scheetfehler liekers blots Platz 15. In de Verfolgung över 12,5 km wurr he nah en Teelsprint Tweet. An den folgen Dag hett Norwegen an de Mixed-Staffel nich deelnommen.

An den eersten Weltcup in dat Johr 2012 hett Bjørndalen nich deelnommen. Bi den Testweltcup för de Weltmeesterschapen in dat tschechisch Nove Mesto wurr he 46. in dat Eenzelrennen över 20 km. In' Sprint harr he veer Scheetfehler un keem up Platz 25, kunn sück in de Verfolgung denn aber up Platz 15 verbeetern. Bi den Weltcup in dat italieensch Antholz-Anterselva keem Bjørndalen up Platz 56. in' Sprint. In Massenstart över 15 km wurr he Teihnt. Bi de afsluuten Staffel över 4 × 7,5 km belegg he mit sien Teamkollegen Platz 11.

Bi den Weltcup in Oslo belegg he Platz fiev in' Sprint över 10 km. In de Verfolgung harr he veer Scheetfehler un keem so up den 10. Platz. In' Massenstart reck dat to Platz 17. Bi den letzten Weltcup vör de Weltmeesterschapen hett he veer Mal vörbischaaten un keem dor an Enn' ok up den teihnten Platz. Bi den Massenstart belegg he Platz 17. Bi den Weltcup in Kontiolahti keem he in' Sprint up Platz veer. De Verfolgung an den nächsten Dag hett he dorgegen wunnen un reck dormit sien 93. Weltcupsieg in' Biathlonsport.

Bi de Weltmeesterschapen in Ruhpolding wunn Bjørndalen de Goldmedaille mit de norweegsch Mixed-Staffel nah en Tietgootschrift. In' Sprint reck dat för Platz 21, in de ansluuten Verfolgung to Platz 27, wiel he söss Fehler schaaten harr. Dat Eenzelrennen över 20 km leep noch slechter – hier reck he blots Platz 47. Mit de norweegsch Staffel wunn he denn aber sien tweete Goldmedaille bi disse Weltmeesterschapen. In' Massenstart wurr he twee Scheetfehler Achter.

Bi den letzten vun de Saison in Khanty Mansiysk wurr Bjørndalen 47. in' Sprint un is in de Verfolgung nich an den Start gahn. In den Massenstart keem he up Platz 20.

In' Gesamtweltcup keem he up letzt up Platz 16, in Sprintweltcup up Platz 18, in de Verfolgung immerhen up Platz 5 un in' Massenstart up Platz 17. Dorto keemen sien twee Goldmedaillen bi de Weltmeesterschapen.

Saison 2012/13[ännern | Bornkood ännern]

De Saison fung as toletzt immer nich besünners goot an. An dat Eenzelrennen in Östersund hett he nich deelnommen. In' Sprint keem he up Platz 34, wat he in de Verfolgung up Platz 19 verbeetern kunn. Bi de tweete Statschoon in Hochfilzen leep dat all wat beter. Hier reck dat in' Sprint to Platz 16 und in de Verfolgung to Platz 7. Dorto keem mit de norweegsch Staffel noch de en tweeten Platz dorto. In Pokljuka keem he in all Wettkämpen nich ünner de best Teihn. In Oberhof belegg he mit de Staffel den 2. Platz. In’ Sprint belegg he dorto noch den teihnten Platz. Dornah hett he eerstmal weer utsett, bevör he an de Weltmeesterschapen in Nové Město na Moravě deelnehm. Dor wunn he mit de norweegsch Staffel den Titel. In dat Sprintrennen keem he up den veerten Platz un in de Verfolgung up den teihnten Platz (mit veer Scheetfehler). An de Mixed-Staffel hett he nich deelnommen. In de restlich Rennen vun den Weltcup keem he dornah nich mehr ünner de best Teihn.

In' Gesamtweltcup leeg he an' Enn' vun de Saison up Platz 22. Ok in de Eenzelweltcups keem he nargens ünner de best Teihn, harr aber ja noch de Goldmedaille bi de Weltmeesterschapen wunnen.

Saison 2013/14[ännern | Bornkood ännern]

De Anfang vun de Weltcup-Saison leep as meest immer, ehrder nich goot. In Östersund keem Bjørndalen in Eenzel un Sprint nich över Platz 31 bzw. 12 herut. An de Verfolgung hett he nich deelnommen. Bedüüdend beter gung dat bi de tweete Statschoon in Hochfilzen. Eerst Platz 3 in’ Sprint (achter Lars Berger un Martin Fourcade) un Platz fiev in de Verfolgung un dortüschen noch de eerste Platz mit de norweegsch Staffel (gemeensam mit Vetle Sjåstad Christiansen, Tarjei Bø un Emil Hegle Svendsen). De darte Weltcup-Statschoon hett he as all so faken, utlaaten. In dat nee Johr in Oberhof, keem he in’ Sprint un Verfolgung jewiels up den tweeten Platz, Emil Hegle Svendsen wurr jewiels Eerst. In’ Massenstart folg denn noch Platz 21. In Ruhpolding is he nich antreeden. In Antholz keem he in’ Sprint blots up Platz 20, kunn sück aber in de Verfolgung up Platz veer verbeetern.

An’ 8. Februar 2014 wunn Bjørndalen bi de Olympisch Winterspelen in Sotschi de Goldmedaille in’ Sprint über 10 km. In de folgen Verfolgung keem he wegen dree Scheetfehler blots up Platz 4. In’ Massenstart sprung ok nich mehr as Platz 22 herut un in’t Eenzel reck dat ok blots för Rang 34. He wunn allerdings mit de norweegsch Mixed-Staffel bi disse Veranstaltung sien tweet Goldmedaille.

Doröver herut wurr he mit de kanaadsch Ieshockeyspelerin Hayley Wickenheiser för acht Johr in de IOC-Athletenkommission wählt.[4]

Bi den 7. Weltcup in Pokljuka hull sien goot Form an. Keem he in’ Sprint noch up den sössten Platz, reck dat in de Verfolgung för Platz 3. In’ Massenstart kemm he dorto up den negenten Platz. In Kontiolahti keem he up de Platz 5 un 40, wobi he de Verfolgung nich mitmaakt hett. Up de letzte Statschoon in Oslo keem he in’ Sprint ok blots up 12 un in de Verfolgung gor up Platz 32, reck dorför aber in’ Massenstart doch noch den fievten Rang.

An dat Saisonenn’ belegg Bjørndalen in den Gesamtweltcup Platz 6. Dorto keemen Platz 4 in den Sprintweltcup, Platz negen in de Verfolgung und Platz 8 in den Massenstart-Weltcup. Dorto keemen de beid Goldmedaillen bi de Olympisch Winterspelen.

Nah de Olympisch Spelen hett he ankünnigt, sien Biathlonkarriere bit to de Weltmeesterschapen 2016 forttoführen.[5]

An’ Enn vun dat Johr wurr he to’n tweeten Mal nah 2002 to’n Sportler vun dat Johr in Norwegen wählt.

Saison 2014/15[ännern | Bornkood ännern]

Diese Weltcup-Saison fung för Bjørndalen beter an, as de letzten Saisons. Glieks in dat eerst Rennen in Östersund, en Eenzelrennen, keem he up Platz 6. Dornah folg Platz 8 in’ Sprint, en Platzeeren, de he in de Verfolgung aber nich hollen kunn un up Platz 10 lannen dee. In Hochfilzen keem he in’ Sprint blots up Platz 40, an de Verfolgung hett he denn nich mehr deelnommen. Dornah hett he eerstmal en Paus inleggt. In’ Januar in Oberhof, reck he mit de norweegsch Staffel Platz 2 un ok in’ Sprint an 10. Januar 2015 keem he up den tweeten Platz achter Martin Fourcade, aber vör Timofei Lapschin. In Ruhpolding keem he in’ Sprint up Platz 15 un in’ Massenstart up den fievten Platz, wunn aber dat Staffelrennen mit de norweegsch Mannschap. Dat sülvige Staffelergevnis geev dat ok bi de nächste Statschoon in Antholz. In’ Sprint keem he dor up Platz 9 un verpass in de Verfolgung mit Platz veer blots knapp dat Podest. In Nové Město na Moravě keem he nich ünner de best 30.

Bi de achte Weltcupstatschoon in Oslo ist he nich antreeden um sück för de Biathlon-Weltmeesterschapen 2015 in Kontiolahti vörtobereiten. Dor keem he in’ Sprint up Platz 19, kunn sück in de Verfolgung denn aber up Platz 5 vörarbeiten. In’ Eenzel leep dat ok ganz goot, do reck dat för Platz 6. En Sülvermedaille wunn he ansluutend mit de Staffel achter de düütsch Mannschap. Dorbi bleev he as Startlöper ahn Scheetfehler, wat sien Kollegen nich gelung. In den afsluuten Massenstart keem he denn noch up Platz 4, wobi he ok dor weer ahn Scheetfehler bleev. In de Mixed-Staffel is he nich mit bi ween.

To’n Afsluss vun de Saison keem he in Chanty-Mansijsk in’ Sprint up den negenten Platz, full in de Verfolgung denn aber up den 27. Platz torüch. An den Massenstart hett he denn nich mehr deelnommen.

In de Gesamtwertung keem he an’ Enn’ up den 14. Platz. In de Eenzelweltcups reck he kien Platz ünner de best Teihn.

Saison 2015/2016[ännern | Bornkood ännern]

De nee Saison leep vör Bjørndalen bestens an. Bi den Weltcupuptakt in Östersund wunn he dat Eenzelrennen vör den Düütschen Simon Schempp un Alexei Wolkow.

Bilanz[ännern | Bornkood ännern]

Mit acht olympisch Goldmedaillen as ok veer Sülver- un een Bronzemedaille is Ole Einar Bjørndalen de spoodriekste Biathlet bi Olympisch Winterspelen. Bi Biathlon-Weltmeesterschapen wunn Bjørndalen insgesamt 40 Medaillen (19 × Gold, 12 × Sülver, 9 × Bronze), dormit liggt he in de Gesamtwertung inklusive Staffel- un Mannschapsergevnisse up den 1. Platz un hett dormit as eerst Biathlet överhoopt all mögelk Weltmeestertitel tomindst eenmal wunnen. In de Wertung vun den Eenzeldisziplinen führt he mit 11 × Gold, 4 × Sülver un 7 × Bronze folgt vun de Franzoos Raphaël Poirée.

Den Gesamtweltcup kunn Bjørndalen all tosommen sössmal up sein Naam schrieven, dormit is he alleenig Rekordholler vör de Franzoos Poirée un de Düütschen Frank Ullrich mit je vier Gesamtweltcup-Siegen (Stand 2015). Vun de Saison 1996/97 bit to de Saison 2008/09 leeg Bjørndalen insgesamt 13 Johr lang an’ Enn’ vun de Saison immer ünner de best dree Biathleten vun de Gesamtwertung. Mit intüschen 94 Weltcupsiegen in Biathlon un Skilanglauf is Ole Einar Bjørndalen vör den alpinen Skirennlöper Ingemar Stenmark ut Sweden mit 86 Weltcupsiegen de spoodriekst männlich Wintersportler in de Historie.

Dör sien Sieg mit de norweegsch Mixed-Staffel an 19. Februar 2014 in Sotschi wurr he de öldste Olympiasieger in’ Biathlon un hett dormit sien Landsmann Bjørn Dæhlie as spoodrieksten Winter-Olympioniken in de Historie aflööst.

Bjørndalen kunn in sien Loopbahn bither 19 Disziplinenweltcupwertungen winnen, tosommen mit de Gesamtweltcupsiege hett he dormit 25 Weltcupwertungen wunnen. Mehr Disziplinenweltcupwertungen hett kien anner Athlet in’ Biathlon wunnen.

Um all mögelk Goldmedaillen eenmal wunnen to hemm, fehlt Bjørndalen blots noch en olympisch Goldmedaille in’ Massenstart.

Skilangloop[ännern | Bornkood ännern]

Ole Einar Bjørndalen is neben de Biathlonwettbewarfen all siet Enn’ vun de 1990er-Johren immer weer ok bi Skilangloopwettbewarfen an, sowohl bi natschonalen as ok bi internatschonalen Veranstaltungen. Dorto leet he wiels de Weltcupsaison in’ Biathlon hin un weer eenzelt Weltcupstatschonen ut.

Sien eersten Langloopsieg kunn Bjørndalen bi de norweegsch Meesterschapen in Valdres am 21. Dezember 1997 fiern.[6] Bi Weltcuprennen oder Grootreignissen glänzt he ebenfalls mit bestännig Leistungen un he schafft dat immer weer, sück in de Top 10 zu platzeeren. Bi de Olympisch Winterspelen 2002 in Salt Lake City leep he toeerst dat 30-km-Rennen un keem dor up Platz 5,[7] later leep he buterdem de gesamten Biathlonwettbewarfen. Bi de Nordisch Skiweltmeesterschapen 2005 in Oberstdorf belegg he in dat 15-km-Rennen Platz 11,[8] verfehl dormit aber de anstreevt Medaille in’ Skilangloop.

An’ 11. November 2006 wunn Bjørndalen dat 10-km-Rennen bi de norweegsch Meesterschapen in Beitostølen.[9] Een Week later, an’ 18. November, gelung hüm bi dat 15-km-Freestilrennen in dat sweedsch Gällivare buterdem sien eerst Weltcupsieg in’ Skilangloop.[10] He weer dormit de eerste männlich Wintersportler överhoopt, de in twee ünnerscheedlich Sportoorten Weltcupsiege fiern kunn. He harr sück denn ok as Teel sett, sowohl bi de Biathlon-Weltmeesterschapen 2007 in Antholz as ok bi de Nordisch Skiweltmeesterschapen 2007 in Sapporo en Goldmedaille to haalen. Nah twee Weltmeestertiteln in Antholz reck he in Sapporo aber blots Platz 13 in dat 15-km-Rennen.[11]

Vörbereiten un Training[ännern | Bornkood ännern]

Bjørndalen gellt in Fackkrinken as Perfektschonist un Glieksgewichtskünstler. So truck he sück as Kind wiels en Show in' norweegsch Feernsehn up en Seil balanceerend bit up de Ünnerbüx ut un ok weer an. Ole Einar Bjørndalen is en exzellenter Skater. Ok in't Scheeten kunn he sück kontinuierlich stiegern. Ünnerstütt wurr he dorbi vun sien persönlichen Scheettrainer Joar Himmle (Trainer vun de norweegsch Natschonalmannschap), mit de he wiels de Saisons 2004/05 un 2005/06 tosommenarbeit, un de he sülvst betallt harr. Intüschen is Roger Grubben, de ehmalge Cheftrainer vun de norweegsch Natschonalmannschap, de persönliche Trainer vun Bjørndalen.

Privatleben[ännern | Bornkood ännern]

Ole Einar Bjørndalen hett twee Süsters un twee Bröers. Sien Bröers Hans Anton und Dag Bjørndalen sünd beid ehmalge Profibiathleten.

An' 27. Mai 2006 hett Bjørndalen in Toblach sien langjohrig Levensgefährtin, de Süüdtiroler Biathletin Nathalie Santer heiraadt. De Ehe wurr in' Oktober 2012 in biedersiets Invernehmen uphaben.[12] He hett sien Wahnsitz in Obertilliach (Osttirol), wo in dat Biathlonzentrum en Ski-Rollerstreck för dat Sömmertraining nah hüm nömmt wurrn is.

Wegen sien Erfolge wurrd Bjørndalen in de Presse faken as der König des Biathlon betekent.[13][14]

An'n 3. April 2018 hett Bjørndalen sien Rückträe van den aktiven Sport ut Gesundheitsgrünnen bekannt geven.

Zitate[ännern | Bornkood ännern]

„Ole ist ein Außerirdischer!“ (de düütsch Bundstrainer Frank Ullrich över Bjørndalen nah de sien veer Goldmedaillen in Salt Lake City)[15]

„Staubsauger sind wichtig für mich.“ (Bjørndalen över sien Hang to Sauberkeit)[16]

„Das Ergebnis ist mir nicht wichtig. Für mich zählt nur das perfekte Rennen, ob Platz 1 oder Platz 10.“ (Bjørndalen to sien Motivatschoon.)[17]

Wat he schafft hett[ännern | Bornkood ännern]

Bjørndalenb i den Weltcup in Trondheim, März 2009

Olympisch Winterspelen[ännern | Bornkood ännern]

  • 1998: 1 × Gold (Sprint), 1 × Sülver (Staffel)
  • 2002: 4 × Gold (Eenzel, Sprint, Verfolgung, Staffel)
  • 2006: 2 × Sülver (Eenzel, Verfolgung), 1 × Bronze (Massenstart)
  • 2010: 1 × Gold (Staffel), 1 × Sülver (Eenzel)
  • 2014: 2 × Gold (Sprint, Mixed-Staffel)

Weltmeesterschapen[ännern | Bornkood ännern]

  • 1997: 1 × Sülver (Staffel), 1 × Bronze (Verfolgung)
  • 1998: 1 × Gold (Mannschap), 1 × Sülver (Verfolgung)
  • 1999: 2 × Bronze (Massenstart, Staffel)
  • 2000: 1 × Sülver (Staffel), 1 × Bronze (Massenstart)
  • 2001: 1 × Sülver (Massenstart), 1 × Bronze (Staffel)
  • 2003: 2 × Gold (Sprint, Massenstart)
  • 2004: 1 × Sülver (Staffel), 3 × Bronze (Eenzel, Sprint, Verfolgung)
  • 2005: 4 × Gold (Sprint, Verfolgung, Massenstart, Staffel)
  • 2006: 1 × Sülver (Mixed-Staffel)
  • 2007: 2 × Gold (Sprint, Verfolgung), 1 × Sülver (Staffel)
  • 2008: 1 × Gold (Verfolgung), 3 × Sülver (Eenzel, Massenstart, Staffel), 1 × Bronze (Sprint)
  • 2009: 4 × Gold (Sprint, Verfolgung, Eenzel, Staffel)
  • 2010: 1 × Sülver (Mixed-Staffel)
  • 2011: 2 × Gold (Mixed-Staffel, Staffel)
  • 2012: 2 × Gold (Mixed-Staffel, Staffel)
  • 2013: 1 × Gold (Staffel)
  • 2015: 1 x Sülver (Staffel)

Gesamtweltcup[ännern | Bornkood ännern]

  • 6 × Gesamtweltcup-Sieger (1997/98, 2002/03, 2004/05, 2005/06, 2007/08, 2008/09)
  • 6 × Platz 2 (1996/97, 1998/99, 1999/2000, 2000/01, 2003/04, 2006/07)
  • 1 × Platz 3 (2001/02)

Disziplinen-Weltcups[ännern | Bornkood ännern]

  • 9 × Sieger im Sprint-Weltcup (1994/95, 1996/97, 1997/98, 1999/2000, 2000/01, 2002/03, 2004/05, 2007/08, 2008/09)
  • 5 × Sieger in' Verfolgungs-Weltcup (1999/2000, 2002/03, 2005/06, 2007/08, 2008/09)
  • 5 × Sieger in' Massenstart-Weltcup (2002/03, 2004/05, 2005/06, 2006/07, 2007/08)
  • 1 × Sieger in' Eenzel-Weltcup (2004/05)

Weblenken[ännern | Bornkood ännern]

Ole Einar Bjørndalen. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. Ergevnis Eenzel vun Antholz (Saison 2000/01)
  2. http://services.biathlonresults.com/Results.aspx?RaceId=BT0607SWRLCH__SMMS
  3. http://docs.biathlonresults.com/0607/BT/SWRL/SMTS.pdf
  4. Björndalen und Wickenheiser in IOC-Athletenkommission sueddeutsche.de, afropen an’ 25. Februar 2014
  5. [1] Björndalen setzt Karriere bis 2016 fort. Yahoo Sport. Afropen an’ 4. April 2014.
  6. http://data.fis-ski.com/dynamic/results.html?sector=CC&competitorid=5248&raceid=1198
  7. http://data.fis-ski.com/dynamic/results.html?sector=CC&competitorid=5248&raceid=3522
  8. http://data.fis-ski.com/dynamic/results.html?sector=CC&competitorid=5248&raceid=7891
  9. http://data.fis-ski.com/dynamic/results.html?sector=CC&competitorid=5248&raceid=11851
  10. http://data.fis-ski.com/dynamic/results.html?sector=CC&competitorid=5248&raceid=12439
  11. http://data.fis-ski.com/dynamic/results.html?sector=CC&competitorid=5248&raceid=12596
  12. http://www.stol.it/Artikel/Sport-im-Ueberblick/Vermischtes/Santer-und-Bjoerndalen-getrennt
  13. Opa Björndalen ist der König des Biathlon
  14. König Harald V. sieht Sieg von Björndalen in Verfolgung
  15. Der Außerirdische ist zurück. Süddeutsche Zeitung, 17. Januar 2009
  16. Ole-Einar Björndalen: Der Adrian Monk des Biathlon. sf sport, Dienstag, 9. Februar 2010
  17. [2] jsessionid fvtOnRF8tlFqpkSHYDuwjg**, Wintersport – SPOX stellt die weltbesten Biathleten vor: Mit den Waffen einer Frau, mobil.freenet.de van' 9. März 2010