Halvard Hanevold

Vun Wikipedia
Wesseln na: Navigatschoon, Söök
Halvard Hanevold

Halvard Hanevold (* 3. Dezember 1969 in Askim, Norwegen) is en ehmalger norweegsch Biathlet un Olympiasieger in' Biathlon.

Halvard Hanevold is för den Asker Skiklubb antreeden. Sien Trainer weer Joar Himle. Siet 1992 hörr he den norweegschen Natschonalkader an. Nah eenig Startschwierigkeiten keem hüm togood, dat dat norweegsch Team in' Winter 1994 radikal verjüngt wurr. Spood broch dat bi de Olympisch Spelen 1994 in Lillehammer noch nich, aber de norweegsch Trainer hemm wiederhen up de Jöögd sett, to de ünner annern ok Ole Einar Bjørndalen hörrn dee. 1995 fier Hanevold all sien eerst Weltmeestertitel in den mittlerwiel afschafft Mannschapswettbewarf (tosommen mit Frode Andresen, Dag Bjørndalen un Jon Åge Tyldum). He hett sück dornah immer wieder verbeeter un weer siet 1996 immer ünner de best 30 Athleten in' Gesamtweltcup, tweemal hett he de Saison as Veert afslooten.

Anfang 1998 fier he in Antholz sien eersten Weltcupsieg (vun 33, dorvan 9 Eenzelssiege), twee Maan later wunn Hanevold unverwacht in Nagano de olympisch Goldmedaille in' Eenzel över 20 km vör Pieralberto Carrara un Oleksij Ajdarow. Een Week later wunn he noch de Sülvermedaille mit de Staffel. De spoodriek Saison wurr för hüm kumplett mit den Weltmeestertitel in' Mannschapswettbewarf. Van 1998 bit 2000 hett Hanevold fiev wiedere Weltcupsiege haalt. 2002 wunn he mit de Staffel weer de Goldmedaille, sien nächst Eenzelsieg gelung hüm aber eerst bi de Biathlon-Weltmeesterschapen 2003 in Chanty-Mansijsk, wo he in' Eenzel över 20 km Gold vör Vesa Hietalahti un Ricco Groß wunn.

In de dorupfolgen Saison hett he in twee upnannerfolgen Rennen wunnen, reck fiev Podestplätze un wunn todem bi de Biathlon-Weltmeesterschapen 2004 Sülver mit de Staffel. Bi de Biathlon-Weltmeesterschapen 2005 in dat öösterrieksch Hochfilzen wurr he weer Weltmeester mit de Staffel (tosammen mit Ole Einar Bjørndalen, Stian Eckhoff un Egil Gjelland). Bi de Olympisch Spelen 2006 in Turin wunn he de Bronzemedaille in' Eenzel 20 km (achter Michael Greis un Ole Einar Bjørndalen) un Sülver in' Sprint över 10 km (achter Sven Fischer aber vör Frode Andresen).

Bi de WM 2008 in Östersund (SWE) kunn he över 10 km de Sülvermedaille haalen. He wurr Viezweltmeester achter den Russen Maxim Tschudow un vör sien Mannschapskolleeg Ole Einar Bjørndalen. Dorto wunn he mit de norweegsch Staffel noch de Sülvermedaille. Ok bi de Weltmeesterschap 2009 in Pyeongchang keem he weer up dat Podest, mit de Staffel wunn he sien 5. Weltmeestertitel, in' Sprint keem he up den Bronzeplatz achter Bjørndalen un Lars Berger. To'n Afsluss vun sien Loopbahn wunn Halvard Hanevold weer Olympia-Gold mit de norweegsch Staffel bi de Olympisch Winterspelen 2010.

Hanevold is mehrfack norweegsch Meester wurrn un wunn buterdem mit de Staffel vun Oslo&Akershus sössmal de natschonalen Meesterschapen.

De studeert Diplom-Maschinenbauer Halvard Hanevold leev bit 2005 mit de düütsch Biathletin Sabrina Buchholz tosommen, later mit de Kanadierin Sandra Keith. He is Athletenbotschoper vun de Entwicklungshülporganisatschoon Right to Play.

Weblenken[ännern | Bornkood ännern]

Commons-logo.svg Halvard Hanevold. Mehr Biller, Videos oder Audiodateien to’t Thema gifft dat bi Wikimedia Commons.