Franziska Hildebrand

Franziska Hildebrand (* 24. März 1987 in Halle (Saale)) is en ehmalge düütsch Biathletin.

Leven

Franziska Hildebrand hett völ Johren in Köthen (Anhalt) leevt un wurr lang vun hör Vader Wolfgang Hildebrand traineert. Siet eenig Johren wahnt se in Ruhpolding, wo se in de dicht bi liggen Chiemgau-Arena vun Ricco Groß traineert wurrd. As Sömmerbiathletin start se för de Privilegierte Schützengilde zu Cöthen von 1443, in' Winter för den WSV Clausthal-Zellerfeld. Siet 2007 studeert se Internationales Management an de Hoochschool Ansbach. Hildebrand wurrd as Sportsuldatin vun de Bundswehr fördert. Se is as Oberfeldwebel in de Sportfördergrupp Bischofswiesen. (Oktober 2013) Hör Twillingssüster Stefanie Hildebrand weer bit to de Saison 2012/13 ebenfalls Biathletin.

Sportliche Karriere

As Sömmerbiathletin nehm Hildebrand eerstmals 2002 in Jablonec in dat Staffelrennen vun de Junioren-Weltmeesterschapen deel un belegg mit de Staffel Platz söben. In dat Johr drup reck se in Forni Avoltri mit de Staffel den veerten Platz. In' Sprint leep se up Platz 22, in de Verfolgung wurr se 14. un in' Massenstart keem se up den achten Platz. Bi hör dart Junioren-WM 2004 in Osrblie reck se Platz 6 mit de Staffel, Platz 4 in' Sprint, Platz 9 in de Verfolgung un Platz 13 in dat Massenstartrennen. In dat sülvig Johr nehm se an de Junioren-EM in Clausthal-Zellerfeld deel un kunn dor veer Titel halen, in dat Verfolgungsrennen wunn se de Sülvermedaille. Dat eerst Grootereignis bi de Fruen wurrn de Sömmerbiathlon-Europameesterschapen 2009 in Nové Město. In' Sprint keem se dorbi up Platz 8, in' Massenstart up Platz 11 un gemeensam mit Robert Janikulla, Wolfgang Kinzner un hör Süster reck se Rang fiev in den Mixed-Staffel-Wettbewarv.

In' Winter geev Hildebrand hör internatschonal Debüt to Anfang vun de Junioren-Europacup-Saison 2005/06. Best Resultate wurrn en Sieg in' Sprint vun Altenberg in dat Johr 2006 as ok de Gewinn vun dat Eenzel in Obertilliach 2007. In dat Johr 2006 is se in Presque Isle bi hör eerst Junioren-WM an den Start gahn. In' Eenzel wurr se nah dat Rennen disqualifizeert, in' Sprint leep Hildebrand up Platz 10 un verbeter sück in dat Verfolgungsrennen noch up Platz 7. Een Johr later wurr in Martell en sösste Rang hör best Ergevnis in en Eenzelrennen. In den Staffelwettbewarv aber wunn se mit Juliane Döll un Carolin Hennecke den Titel. Dissen Titelgewinn kunn Hildebrand bi de Junioren-WM 2008 in Ruhpolding, ditmal an de Siet vun Susann König un Miriam Gössner, nochmal fiern. In de Eenzelrennen bleev Platz 11 in' Eenzel hör best Ergevnis bi disse Veranstaltung. 2008 geev se hör Debüt in den Biathlon-Europacup. In Cesana San Sicario wunn se as 25. vun den Sprins un 14. vun dat Eenzelrennen glieks ok hör eerst Punkte. Hör eerste Medaille i'n Utwussenberiek wunn Franziska Hildebrand bi de Biathlon-Europameesterschapen 2010 in Otepää, as se in' Eenzel Platz 3 belegg. En dag dornah wunn se mit hör Süster Stefanie, Juliane Döll un Kathrin Hitzer in de Staffel Gold. In de IBU-Cup 2010/11 wurr se Gesamtsiegerin in' IBU-Cup un leeg todem in de Eenzel- un Verfolgungswertung vörn.

Wegen den Gesamtsieg in' IBU-Cup 2010/11 as ok good Ergevnisse bi de Düütsch Meesterschapen 2011 in Harvst 2011, kreeg Franziska Hildebrand tosommen mit Nadine Horchler un Carolin Hennecke de Mögelkeit, sück för de Weltcupmannschap to empfehlen. Franziska Hildebrand wurr in dat sweedsch Östersund eerstmals insett un belegg en sensatschonellen sössten Platz in' Eenzel. Ok dornah geev dat wiederhen good Platzeeren in de Punkteränge. Wegen hör Leistungen wurr se för de Staffel in Hochfilzen nomineert, de dor aber blots up den sössten Platz keem. Mit Platzeeren överweegend in de Punkteränge un en wieder Top-10-Ergevnis seker se sück en fasten Startplatz in dat Team för den Rest vun de Saison, de se mit en 15. Gesamtrang in de Eenzelwertung un en 23. Rang in' Gesamtweltcup afsluuten dee. Grundlaag för hör good Ergevnisse is vör allen hör Scheetleistung, de mit dörsnittlich 88 % drapen Schieven beständig up hooch Niveau liggt.

Ofschons mit den Rückträe Magdalena Neuner en Startplatz in de düütsch Mannschap free wurr, muss sück Franziska Hildebrand to'n Anfang vun de nee Saison 2012/13 weer för en Insatz in'n Weltcup empfehlen. Nah en dörwussen Start in de Saison wurr hör Platz in dat Team för de tweete Weltcupweek in Hochfilzen an Carolin Hennecke un Juliane Döll vergeven. In Pokljuka wurr se vun de Trainern weer insett un mit en gooden Platz 13. in' Sprint reck se de Qualifikatschonsvörgaven vun den DSV för de Deelnahm an Weltmeesterschapen. De Verfolgung kunn se wegen en Skibröök nich to Enn' bringen un verfehl dormit ok de Qualifikatschoon för den Massenstart in Pokljuka. Vör dat heimisch Publikum in Oberhof kunn se mit de düütsch Staffel an de Siet vun Tina Bachmann, Miriam Gössner un Nadine Horchler mit en darten Platz hör eerst Podestplatz in' Weltcup fiern. In Antholz wunn se sogor gemeensam mit Gössner, Horchler un Andrea Henkel den Staffelwettkamp in' Weltcup.

De Biathlon-Weltmeesterschapen 2013 in Nové Město na Moravě fungen vör Hildebrand good an mit Platz 13 in dat Sprintrennen, womit se tweetbest Düütsche wurr. Se verlor woll in dat Verfolungsrennen veer Platzen, bleev aber ok dor tweetbeste Düütsche. Fiev Scheetfehler in dat Eenzelrennen weern gliekbedüüdend mit Platz 51. In dat Staffelrennen reck se gemeensam mit Miriam Gössner, Laura Dahlmeier un Andrea Henkel Rang fiev. In' Rahmen vun de WM wurr Hildebrand vun de IBU as Rookie of the Year (sovöl as: Neeling vun dat Johr) för de Vörsaison uttekent.

Saison 2014/15

För den Weltcup 2014/15 wurr Hildebrand all fröh in' Sömmer 2014 nomineert. Se hett denn in de eerst fiev Eenzelrennen ok fiev Top-10-Ergevnisse leefert un weer dormit in disse Hensicht all beter as in de Vörsaison. In de Staffel vun Hochfilzen wunn se as Löperin an de tweet Positschoon startend in de jüngste gesamtdüütsch Biathlon-Fruenstaffel bit dorhen. An dissen Erfolg kunn se in Nové Město anknütten un reck mit den tweeten Platz in dat Sprintrennen hör eerst Podiumsplatzeeren in en Weltcup-Eenzelrennen. Se muss sück eenzig hör Mannschapskollegin Laura Dahlmeier bi deren eerst Weltcup-Sieg slahn geven; dat weer togliek de eerste Düppelsieg siet 2011. En Dag later in dat Verfolgungsrennen hett se aber bi dat letzt Scheeten up de Schieven vun de Nahberbahn schaaten (so nömmt „Crossfire“) un full dör de dordör inhannelt Straaftieden up Platz 50 torüch. Bi de Weltmeesterschapen 2015 kunn se hör good Form bestätigen un keem in' Sprint up den teihnten un in de ansluuten Verfolgung up Rang söss. Mit de Staffel wunn se as Startlöperin hör eerst Goldmedaille an de Siet vun Franziska Preuß, Vanessa Hinz un Laura Dahlmeier.

Saison 2015/16

To'n Start vun de Biathlon-Saison 2015/16 kemm se in Östersund in Sweden in dat Eenzel up den 10. Platz un in' Sprint up Platz 17, kunn sück aber in de Verfolgung up Platz 3 verbetern. Hör bit dorhen best Resultat bi de Utwussen reck se an' 11. Dezember 2015 as se in' Weltcup-Sprint vun Hochfilzen den eersten Weltcup-Sieg in hör Loopbahn recken dee (vör Maren Hammerschmidt un Miriam Gössner). En Dreefack-Sieg vun düütsch Fruen bi en Weltcup harr dat över veer Johr lang nich geven. Den tweeten Weltcupsieg geev dat för hör in' Sprint in' Januar 2016 in Ruhpolding.

Wiel se schwanger weer, hett se in'n September 2022 hör Loopbahn as afslooten verkloort.

Weblenken

Franziska Hildebrand. Mehr Biller, Videos oder Audiodateien to’t Thema gifft dat bi Wikimedia Commons.

• Franziska Hildebrand in de Datenbank vun de IBU (engelsch)
• Porträt bi den Düütschen Schüttenbund
• Franziska Hildebrand in de Datenbank vun Sports-Reference (engelsch)