Flatliners (1990)

Vun Wikipedia
Zur Navigation springen Zur Suche springen
Filmdaten
Plattdüütsch Titel:
Originaltitel: Flatliners
Düütsch Titel: Flatliners – Heute ist ein schöner Tag zum Sterben
Produkschoonsland: USA
Johr vun’t Rutkamen: 1990
Läng: 115 Minuten
Originalspraak: Engelsch
Öllersfreegaav in Düütschland: FSK 16
Filmkru
Speelbaas: Joel Schumacher
Dreihbook: Peter Filardi
Produkschoon: Peter Filardi
Musik: James Newton Howard
Kamera: Jan de Bont
Snitt: Robert Brown
Dorstellers

Flatliners (op Platt so veel as „De op Nulllien gaht“) is de Titel vun en US-amerikaanschen Thriller ut dat Johr 1990 ünner de Regie vun Speelbaas Joel Schumacher. In den Film geiht dat üm de Themen Schuld un Weddergootmaken.

Inholt[ännern | Bornkood ännern]

De Film hannelt vun en Koppel vun fief Medizin-Studenten, de kort dorför sünd, jemehr Studium to Enn to maken un Dokters to warrn. De ehrgiezige Nelson Wright versöcht, sien Kollegen rümtokriegen bi en Experiment mittomaken: He hett neemlich vör sik sülvst künstlich in en Koma to versetten un sik en Hartstillstand bitobringen, üm an’n egen Lief uttoforschen, wat dat mit Neegdoodinsichten op sik hett. Na korte Tiet schüllt sien Kollegen em wedderbeleven. Wat vör em tellt, is de wetenschoppliche Spood un dat Ansehn, dat dormit verbunnen is. Blangen Dave – de jüst för veer Maanden wegen en nich verlöööfte Nootoperatschoon suspendeert worrn is – sünd sien Frünnen Joe un Randy mit vun de Partie un butendem de junge Studentin Rachel, de sik ok för disse Beleefnissen intresseert un bi jede Mööglichkeit wiel ehrn Deenst op de Starvstatschoon bedrapen Patienten dorna utfraagt.

Nelson lett sik vör een Minuut in den Tostand vun’n klinischen Dood versetten un denn wedderbeleven. Nelson bericht dorna vun Gedanken ut sien Kindheit un an en Situatschoon, de he sehn hett, liekres dat he klinisch klor doot weer. As dat Experiment spoodriek to Enn geiht, wiest sik Rachel as bannig intresseert un will dat Experiment namaken. Man, de annern fangt an, längere Tieten to beden, un so is Joe, de nächste mit anderthalf Minuuten dat Rennen maakt. Dat tweete Experiment passeert den nächsten Avend. Wedder klappt allen’s, ok de Reanimatschoon.

De Sülvst-Versöken blievt aver nich ahn Naklapp: Nelson beleevt nu Dagdrööm un kummt dorbi to schaden, as he sik Sehren in’t Gesicht totütt. He warrt angrepen vun en lütten Jungen, de em mit sien Hannen un mit Saken angrippt. Nelson kennt em as Billy Mahoney, den he sülvst vör Johren böös mitspeelt hett. Ok Joe beleevt snaaksche Saken. Op jeden Monitor, an den he vörbikummt, sütt he de Gesichter vun Deerns un Fronslüüd, de he mit verkehrte Verspreken rümkregen hett, mit em in’t Bett to gahn, woneem he jem bi’n Sex mit sien Kamera filmt hett. Man, Joe un Nelson snackt nich över de slechten Sieten vun jemehr Insichten, se vertellt blots vun de schönen Sieten, de se wiel den klinischen Dood beleevt hebbt.

Rachel foddert nu ehr Recht, as nächste dat Experiment to maken, man David is praat, de Tietduer noch wieter hoochtoschruven. He will wiet över twee Minuuten wegblieven. För den Atheisten David stickt weniger de Gloven achter den Wunsch, sik in disse Insichten to begeven, veelmehr will he Rachel dorför schulen, sik disse Gefohr uttosetten. Nelson markt dat un warrt ieversüchtig. Bi dat Experiment mit David funkschoneert de Reanimatschoon eerst nich. Eerst na 3:50 Minuuten fangt sien Hart wedder an to slahn. Ok he kriggt na korte Tiet de Dagdrööm. Bi em is dat en ehmolige Schoolkameraadsche, de em nastellt. He harr ehr in de Schooltiet jümmer agert.

Nu aver sett ok Rachel ehr Foddern dör. Se will nu gliek för fief Minuuten wegblieven. David kummt nu aver dorachter, dat de Experimenten ok slechte Nevenwirken hebbt un will afbreken. He schimpt mit Joe un Nelson. vun wegen dat se nix vun de slechten Saken vertellt hebbt. Rachel sütt wiel ehrn klinischen Dood ehrn Vadder, de sik dootschaten hett, as se fief Johr oolt weer. Se hett sik jümmer schullig föhlt an’n sien Dood un wull dorüm dat Experiment maken. Se harr bit nu den Neegdood jümmer as positiv Beleevnis kennenlehrt, man as se nu ok in Dagdrööm vun dat Afbild vun ehrn doden Vadder plaagt warrt, stellt sik ehr dat Leven na’n Dood bannig düster dor.

Se all hebbt nu mit jümmer Fehlers, Fehlverhollen un slecht Geweten to kämpen. Joe finnt in sien Wahnung unvermodens sien Verlööfte vör, de sien Videoopnahmen funnen hett un dorophen natürlich Sluss maakt. David warrt dorgegen aktiv un versöcht, de Deern, de he fröher jümmer argert un slecht maakt hett, to finnen. Nelson kummt mit em mit, as he bang is, dat de lütte Jung em wedder finnen un besehren deit. He kann in de Twüschentiet nich mehr alleen wesen. Dave dröpt de Deern, de in de Twüschentiet sülvst Mudder is un Bloom tücht. David entschulligt sik bi ehr, dat he so gresig mit ehr ümgahn is. Se nimmt an un seggt em Dank för sien Besöök.

As he torüch na sien Auto kummt sütt he, woans Nelson siek binnen in sülvst Sehren bibringen deit, vun wegen dat he wedder en Dagdroom hett. He bringt em na Joe un Randy, dat se op em oppassen schüllt. Ümdat he sien Dagdrööm un sien Schuldgeföhlen los warrn kann, schüllt se em helpen, sien Schuld goot to maken: Se schüllt Billy Mahoney finnen. Nelson föhrt jem op’n Karkhoff un wiest jem dat Graff vun Billy. He vertellt nu, dat Billy is dör sien Schuld doot bleven is un dat keen Mööglichkeit mehr gifft, sik bi em to entschulligen. Nelson föögt sik nu in sien Schicksal un seggt na sien Bicht, dat he för sien Schuld böten mutt un löpt weg. De Frünnen maakt sik gemeensom op de Söök.

Aleen blifft Rachel torüch. In ehrn Dagdroom sütt se nu, dat ehr Vadder Drogen nahmen hett. Se warrt nu wies, dat se sik to Unrecht sülvst veroordeelt hett un se nix vör den Dood vun ehrn Vadder künn. Se maakt ehrn Freden mit de verleden Beleevnissen un söhnt sik mit ehrn Vadder ut. Bats röpt Nelson ehr an un vertellt, dat he nu för den Dood vun Billy Mahoney böten mutt. He hett vör, sik alleen in den klinischen Dood to versetten.

Gau versökt se annern em to reanimeeren. An den Drempel to’n aflsuuten Dood kann Nelson in en Vision sien Freden mit Billy maken. In letzte Sekunn warrt he vun sien Frünnen wedderbeleevt un kann den Dood jüst noch mol vun de Schüpp springen.

Kritiken[ännern | Bornkood ännern]

Lexikon vun’n internatschonalen Film: Weitgehend stimmiger, stellenweise mit hohem Tempo effektvoll inszenierter Horrorfilm, in dem der subtile Schrecken vorherrscht. Eine interessante Gratwanderung zwischen Metaphysik, Medizin und Psychologie.

Utteken[ännern | Bornkood ännern]

De Film hett keen Filmpries wunnen, weer aver för dree Priesen nomineert, neemlich för den Oscar in de Kategorie Best Tooneffekt (Charles Campbell un Richard Franklin) as ok för den Saturn-Pries in de Kategorien Best Science-Fiction-Film un Best Blangenrull för en Fro (Julia Roberts).

Weblenken[ännern | Bornkood ännern]