Five-Blues-Lake-Natschonaalpark
| Five-Blues-Lake-Natschonaalpark | ||
|---|---|---|
| Staat | Belize | |
| Laag | Koordinaten:17° 8′ N, 88° 35′ W17° 8′ N, 88° 35′ W | |
| ||
| Grött | 16,40 km² | |
| Levensruum | tropischen Woold | |
| Inricht | 1991 | |
| Opsicht | Association of Friends of Five Blues Lake (Santa Martha/St. Margaret) | |
| IUCN-Kategorie | II – National Park | |
De Five-Blues-Lake-Natschonaalpark (engelsch Five Blues Lake National Park) is en 1640 Hektar groten Natschonaalpark in’n Distrikt Cayo von Belize.
Geografie
[ännern | Bornkood ännern]De Park liggt in de Maya-Bargen bi dat Dörp Santa Martha/St. Margaret twüschen de lüttjen Strööm Dry Creek un Indian Creek, de all beid in’n Sibun River münnt. In’n Noorden raakt de Park ok an’n Yaha Creek, de in’n Indian Creek münnt.
Dat Land is tropischen Oorwoold, de op en Kalksteen-Ünnergrund wasst. De Region is von Karstformen präägt. Dormit gifft dat in’n Park ok en Reeg Höhlen.
Annere Schuulrebeden in de Ümgegend sünd de Sibun Forest Reserve en poor Kilometer in’n Süüdwesten un de düüdlich gröttere Manatee Forest Reserve in’n Noorden, Oosten un Süden. En direkte Grenz to düsse Schuulrebeden hett de Natschonaalpark aver blots op en lütt Enn in’n Süüdoosten. De lüttje St.-Herman’s-Blue-Hole-Natschonaalpark liggt acht Kilometer in’n Westen.
Historie
[ännern | Bornkood ännern]De Park is in’n April 1991 inricht worrn. In’n April 1994 is de Park vergröttert worrn un hett sien hüdige Grött kregen.
De Naam kummt af von’n knapp fiev Hektar groten Five Blues Lake, de en Cenote is un an en Siedenarm von’n Indian Creek liggt. De See wedder hett sien Naam dorvon, dat seggt warrt, dat dat Water fiev verscheden Nuancen von de Klöör blau wiest.
En Bedrohung för’n Park is, dat 2011 in dat nich schuulte Rebeed twüschen Five-Blues-Lake-Natschonaalpark un Manatee Forest Reserve de Mennisten-Kolonie Bird Walk anlggt worrn is, för de al veel Holt afhaut worrn is.
Verkehr
[ännern | Bornkood ännern]De eenzige Weg na’n Natschonaalpark is över’n Hummingbird Highway von Belmopan oder Dangriga bet na dat Dörp Santa Martha/St. Margaret. Dor geiht en twee Kilometer lange Siedenstraat na’n Park af.