Evolution (2001)

Filmdaten
Plattdüütsch Titel:	—
Originaltitel:	Evolution
Düütsch Titel:	Evolution
Produkschoonsland:	USA
Johr vun’t Rutkamen:	2001
Läng:	97 Minuten
Originalspraak:	Engelsch
Öllersfreegaav in Düütschland:	FSK 12
Filmkru
Speelbaas:	Ivan Reitman
Dreihbook:	Don Jakoby David Diamond David Weissmann
Produkschoon:	Daniel Goldberg Joe Medjuck Ivan Reitman
Musik:	John Powell
Kamera:	Michael Chapman
Snitt:	Wendy Greene Bricmont Sheldon Kahn
Szenenbild:	J. Michael Riva
Kledaasch:	Aggie Guerard Rodgers
Dorstellers
David Duchovny: Ira Kane Julianne Moore: Allison Reed Orlando Jones: Harry Block Seann William Scott: Wayne Grey Ted Levine: General Woodman Ethan Suplee: Deke Donald Michael Bower: Danny Donald Pat Kilbane: Officer Johnson Ty Burrell: Colonel Fleming Dan Aykroyd: Gouverneur Lewis Katharine Towne: Nadine Gregory Itzin: Barry Cartwright

Evolution (op plattdüütsch so veel as „Evolutschoon“) is de Titel vun en US-amerikaansche Science-Fiction-Kummedie ut dat Johr 2001. Speelbaas weer Ivan Reitman, de ok bi de Produkschoon bedeeligt weer. In de Hööftrullen spelen David Duchovny, Orlando Jones, Seann William Scott un Julianne Moore.

Inholt

En Meteorit fallt op de Eer un sleiht dorbi in de Wööst vun Arizone in, nich wiet weg vun en lütte verdröömte Stadt. De Bioloog Ira Kane un de Geoloog Harry Block, de togliek ok vör Oort de Vertreder vun de Geologischen Komisschoon vun de USA (USGS) is föhrt an de Steed un nehmt Proven för jemehr Labor. Se finnt rut, dat unbekannte Levensformen an’n Meteoriten vörkamt. De Mikroorganismen vermehrt sik un entwickelt sik gau wieter, so dat ut de Eenzellers al na korte Tiet mehrzellige Leevwesens enststahn sünd.

De beiden dröömt al vun’n Nobelpries, man de Saak löpt bald al ut’n Rahmen. Gau hett ok dat Militär vun den Meteoriten Wind kregen, vunwegen dat se Kane sien Reekner överwacht hebbt. Kane hett fröher neemlich sülvst mol bi’t Militär in de Forschung arbeit, müss aver Bott geven as he en Empstoff utklamüstert harr, de to veel Nevenwirkungen harr. Mit dat Militär kummt ok Allison Reed, en Epidemioloogsche vun de US-Geusndheitsbehöörd CDC dorto, de för den Fall tostännig is. Dormit sünd de beiden Wetenschopplers rut ut dat Speel, un sogor jemehr Ünnerlagen warrt jem klaut.

De butenirdischen Leevwesens entwickelt sik bannig gau wieter un dörloopt de Evolutschoon in en Snelligkeit, de kuum vörstellbor is. Dat duert nich lang, bit sik eerste snaaksche Aliens dör en Höhlensystem un Minenschächt ok bit an de Stadt hen utbreden doot. Un gau gifft dat nu ok en eerst Opper vun disse ne’en Roofdeerten. Goot is man, dat se den Suerstoff op de Eer nich verdrägt un buten dat Höhlensystem sülvst gau doodblieft. Dat liggt aver in de Natur vun de Evolutschoon, dat sik de Leevwesens wieterentwickelt. Also passt se sik an un entwickelt denn ok Orden, de Suerstoff sten künnt. En Flaagsaurier grippt kort dorna en Inkoopszentrum an. Tosamen mit Wayne Grey, de Füürwehrmann warrn will, künnt Kane un Block den Saurier doodscheten un dormit mit Oppers hinnern.

Ünner de Inwahners wasst nu de Panik, un Bereken wiest, dat de ne’en Leevwesens de Minschen in de USA al in wenige Maanden vullstännig utrotten künnt. Also schallt sik nu ok de Gouverneur in, de op en gaue Lösung drängt. Üm dat nich sowiet kamen to laten, will General Woodman nu Napalm gegen de Roofdeerten insetten. Dat ielige militäärsche Vörgahn ahn veel Nadenken warrt nu ok de CDC-Fro Reed to veel. Se slutt sik lever Kane un de annern an. In jemehr Labor finnt se aver nu rut, wat de Entwickeln vun de frömmen Leevwesens andrifft – Füür neemlich oder Warms. Jem warrt kloor, dat Napalm de Beester nich tonichten maakt, man jemehr Wassdom noch versnellen deit. Se versöökt, disse ne’e Informatschoon an den General wietertogeven, warrt aver nich anhöört.

Dor kummt Kane op en Infall, as he tofallig op en Periodensystem kieken deit: He stellt fast, dat Arsen för Leevwesens Gift is, de jemehr Organismus op Kohlenstoff baseert. De Organismus vun de Aliens baseert dorgegen op Stickstoff, so dat Kane vermoden deit, dat för jem villicht Selen giftig wesen künn. So kummt nu utrekent vun twee Studenten, de an sik jümmers sünners tüffelig sünd, de Vörslag, Head & Shoulders doröfr to burken, vunwgen dat jemehr Anti-Schuppen-Shampoo Selensulfiden bargt. Foorts maakt se sik doran, en vun Wayne „utlehten“ Tanklöschwagen mit Shampoo vulltopumpen.

Dormit maakt se sik op’n Weg na de Inslagsteed vun den Meteoriten. De Napalm-Insatz is aver nich mehr to hinnern. Dorbi kummt en gigantische Amöbe tostannen, de all annern Beester, de sik al wieterentwickelt hebbt, tpnichten maken deit. Dat duert nich lang un dat Beest fangt an, sik dör Mitoos to vermehren. Gau pumpt de heemlichen Helden de Amöbe mit dat Shampoo vull, wat ehr denn wohrhaftig to’n Platzen bringt. As Helden warrt se an’t Enn vun den Gouverneur ehrt.

Kritik

• Das Science Fiction Jahr 2002: … eine unterhaltsame SF-Komödie, deren Tricks einem gelegentlich den Atem rauben können, dessen Stärken aber dennoch in einem durchdachten Drehbuch liegen. Dieses verrät eben nicht um eines billigen Effektes willen seine eigene Logik und gönnt auch zunächst eher lachhaften Nebenfiguren eine überzeugende Entwicklung.
• Dat Lexikon vun’n internatschonalen Film segg, dat de Film en „Handwarklich konventschonelle Science-Fiction-Actionkummedie“ weer, de wegen „övertügen Hööftfiguren un jemehr Dorstellers, de to’n Deel gegen Jemehrn Roop speelt, un de fantasievull utarbeiten Aliens“ goot ünnerholen de.

Anners wat

• De Opnahmen vun de fiktiven Stadt Geln Canyon sünd in de Stadt Page in de Wööst vun Arizona dreiht worrn. Wietere Dreihöörd weern an verschedene Steden in Kalifornien, as ok de California State University, Fullerton as Dorstellen vun de öörtlichen Universität. De Studioopnahmen weern in Los Angeles maakt.
• De Dreiharbeiten löpen vun Oktober 2000 bit in’n Februar 2001. De Produkschoon schall üm un bi 80 Millionen US-Dollar köst hebben un hett weltwiet ruchweg 98 Millionen wedder inspeelt.
• Oorsprünglich weer dat Dreihbook vun Don Jakoby as en eernsten Science-Fiction-Thriller anleggt. Ivan reitman hett dat Book denn aver to en Kummedie ümschrieven laten.

Weblenken

• Evolution in de Internet Movie Database (engelsch)
• Kritiken to’n Film op Rotten Tomatoes
• Sammelte Kritiken bi Metacritic.com (engelsch)