Der Hexer (1964)

Filmdaten
Plattdüütsch Titel:	—
Originaltitel:	Der Hexer
Düütsch Titel:	Der Hexer
Produkschoonsland:	Düütschland
Johr vun’t Rutkamen:	1964
Läng:	82 Minuten
Originalspraak:	Düütsch
Öllersfreegaav in Düütschland:	FSK 12
Filmkru
Speelbaas:	Alfred Vohrer
Dreihbook:	Herbert Reinecker Harald G. Petersson
Produkschoon:	Horst Wendlandt
Musik:	Peter Thomas
Kamera:	Karl Löb
Snitt:	Jutta Hering
Szenenbild:	Wilhelm Vorwerg Walter Kutz
Kledaasch:	Hannelore Wessel
Dorstellers
Joachim Fuchsberger: Insp. Bryan Edgar Higgins Heinz Drache: James W. Wesby Sophie Hardy: Elise Penton Siegfried Lowitz: Insp. Warren Margot Trooger: Cora Ann Milton Jochen Brockmann: Afkaat Maurice Messer Carl Lange: Reverend Cyril B. Hopkins Siegfried Schürenberg: Sir John Walford Eddi Arent: Archibald Finch Karl John: Frank S. Shelby Kurt Waitzmann: Thomas Reddingwood Ann Savo: Jean Osborne Hilde Sessak: Oppassersche René Deltgen: Arthur Milton Tilo von Berlepsch: Baas an’n Empfang Petra von der Linde: Gwenda Milton

Der Hexer (op plattdüütsch so veel as De Hexer) is de Titel vun en düütschen Kriminalfilm vun den Speelbaas Alfred Vohrer. Dat weer de twintigste Film ut de Edgar-Wallace-Reeg vun de Nakriegstiet, de op den Roman The Ringer vun Edgar Wallace baseert. Produzeeret weer de Krimi vun Rialto Film. Een Johr later weer de Geschicht mit den Film Neues vom Hexer wieterföhrt.

Inholt

Gwenda Milton is de Sekretärsche vun den Afkaat Messer. Se spioneert ehrn Baas achteran un warrt een Dag doot in de Thems opfunnen. Wat eerst as’n Unfall utsütt, wiest sik gau as Moord, as bi de Obdukschoon kloor warrt, dat de Fro nich afsopen, man würgt worrn is. Se weer de Süster vun Arthur Milton, de ünner den Naam „Hexer“ bekannt worrn is. He harr in verleden Tieten Gegners dorto dwungen sik sülvst ümtobringen un is dorüm ut England utwiest worrn. He leevt nu in Australien. De Moord an Gwenda is nich blots för Scotland Yard intressant, man ok för Milton, de den Moord an sien Süster torüchbetahlen will.

Sir John un Inspekter Higgins vun Scotland Yard staht vör de sworen Opgaav, den Möörder vun Gwenda to finnen, vördem de „Hexer“ em finnt. Higgins is dorüm froh, dat he Hülp vun den pensioneerten Inspekter Warren kriggt, de inst den „Hexer“ binah tofaten kregen harr un em as eenzige to Gesicht kregen hett. Man, Milton is en Meester vun’t Verkleeden, un versteiht sik wunnerbor dorop, sien Utsehn to ännern.

De Polizei vermoodt, dat mit de Fro vun’n „Hexer“, Cora Ann Milton, ok he sülvst in de Stadt kamen is. Gliektietig mit ehr is ok en Australier inreist, de James W. Wesby heet un dorna jümmerto in de Neeg vun Milton sien Fro oder vun Inspekter Higgins to finnen is. He gifft sik as Kriminalreporter un -schriever ut un wiest sik as bannig goot informeert över de Vörgäng. He reddt nich blots Higgins sien Fründin Elise dat Leven, man ok Higgins sülvst. Achter den Moord stickt neemlich de Afkaat Messer, de mit dree Mackers en Minschenhannel mit junge Deerns bedrifft. As Gwenda dat rutfunnen harr, müss se an de Siet maakt warrn.

De Bande üm Messer kriggt en Breef vun den „Hexer“, in den jemehr Naams staht un dat se to’n Doot veroordeelt weern. De eerste op de List warrt ok wohrhaftig in Nootwehr vun Wesby dootschaten. Higgins un Warren versöökt nu, Wesby fasttonehmen, den se för den „Hexer“ hoolt. Man de kann weglopen. Messer dorgegen schafft sik sien annern beiden Mackers vun’n Hals un maakt jem an de Siet. Nu föhlt he sik seker noog, bi de Polizei antofragen dat se em schulen schüllt, as de „Hexer“ sik bi em to Besöök ankünnigt hett. Ok Cora Ann Milton söcht Messer op, vunwegen dat se sik dor mit ehrn Mann drapen will, vördem se torüch na Australien fleegt. Bi de Tosamenkumst warrt Messer an de Siet maakt, ofschoonst de Polizei dorbi is. An’t Enn gifft sik Wesby as en Inspekter ut Australien to kennen, de achter Milton ran is. Milton aver harr sik de hele Tiet as Inspekter Warren verkleedt un so de Mööglichkeit an Messer rantokamen. Opletzt kann Milton dör en Trick aver doch utneihn.

Kritik

• Dat Lexikon vun’n internatschonalen Film beschreev den Film as routineert inszeneerten Edgar-Wallace-Film, de en poor bannig billige, aver ok eenige teemlich amüsante Effekten barg. Kritisch weer de Sülvstjustiv, de in de Geschicht as sülvstverständlich dorstellt warrt.

• Adolf Heinzlmeier un Berndt Schulz hebbt den Film in’t Nakieksel Filme im Fernsehen (1990) överdörsnittlich beweert un loven dat go’e Team un dat routineerte Dreihbook vun Herbert Reinecker mit vele Döntjes, de de Spannug vöran bringt.

• De Stuttgarter Nachrichten meen an’n 10. Oktober 1964, dat Vohrer mit en grote Portschoon Ironie inszeneert harr, wat to’n een opleckern de, man togliek ok de Spannung wassen lett. De Grusel weer goot op de Greenz dorvun, wat mööglich weer, utbalanzeert. Dorto geev dat en Starbesetten, de sik in’n düütschen Kriminalfilm bewährt harr.

• Dat Hamburger Abendblatt kommenteer an’n 29. August 1964, dat bi dissen Hexer nich blots Scotland Yard, man ok de Scharpsinn vun olle Krimihasen in’t Kino verseggen de. Speelbaas Vohrer verhex sien Dorstellers, de bit in de lüttste Rull rutragen besett weern, provozeer mit optische Raffinesse jümmer ne’e Fehlslüss un lös dat Dör’nanner mit en echten Knalleffekt op. Edgar Wallace harr sien reine Freid doran hatt.

Achtergrund

De Palas vun de Zitadell Spandau deent in’n Film as Kulisse för dat Heim för Deerns

De öllste Faten vun den Roman schreev Edgar Wallace 1925 ünner den Originaltitel The Gaunt Stranger. En Johr later hett he dorut en Theaterstück maakt und hett anhand vun de Ännern, de he dorbi ansett hett, ok den Roman ünner den Titel The Ringer noch mol nee maakt. De Roman keem 1926 ok in düütsche Spraak rut, dat Theaterstück een Johr later. Vun de eersten Faten geev dat eerst 1983 en düütsche Översetten – ok ünner den Titel Der Hexer.

De eerste Dreihbookfaten na en Treatment vun Egon Eis weer vun Harald G. Petersson, de op dat Kinoplakaat opföhrt weer, in’n Vörspann vun den Film aver nich opduukt. In’n Harvst 1963 hett de Produzent Horst Wendlandt den bekannten Schriever Herbert Reinecker ünner Verdrag nahmen, de de fardige Faten vun dat Dreihbook maakt hett. Reinecker hett för de Edgar-Wallace-Reeg ok ünner dat Pseudonym Alex Berg schreven, un is mit söss Dreihböker to een vun de wichtigsten Dreihbookschriever vun de Filmreeg worrn.

De Film is vun’n 3. Juni bit to’n 11. Juli 1964 in West-Berlin dreiht worrn un harr sien Ooropföhren an’n 21. August 1964 in de Kinos Capitol un Alhambra in Düsseldörp, as ok in’t Rivoli un Luna in Hannober. De Butenopnahmen in Berlin weern ünner annern in de Zitadell Spandau un dat ehmolige Hotel Esplanade maakt. De Opnahmen in London sünd bi de Arbeiten an de Filmen Der Zinker un Wartezimmer zum Jenseits entstahn. De Binnenopnahmen sünd in de Studios vun de CCC-Film in Berlin-Spandau dreiht worrn.

De beiden populärsten Inspekters ut de Edgar-Wallace-Reeg, Joachim Fuchsberger un Heinz Drache, hebbt in dissen Film dat eenzige mol tosamen vör de Kamera stahn. Inspekter Higgins, de vun Fuchsberger speelt weer, harr densülven Vörnaam as de Söhn vun Edgar Wallace (Bryan Edgar Wallace). De Naam vun René Deltgen weer op dat Kinoplakaat nich ankünnigt un stünn ok nich in’n Vörspann. He keem eerst to’t Enn as de Hexer to’n Vörschien. Blangen Deltgen weern to’n eersten Mol ok Sophie Hardy, Margot Trooger, Hilde Sessak un Karl John in en Edgar-Wallace-Film to sehn.

Vun de FSK is de Film af 16 Johren freegeven worrn, nadem dat vun Sir John in een Szeen funnene Naaktfoto dör een mit Bikini uttuuscht weer. De Trailer (ok FSK 16) wies ok noch de Originalszeen. 1991 is de Film denn af 12 Johren freegeven worrn. Intwüschen is ok de Origalfaten mit dat Naaktfoto free af 12.

• De Filmtitel is 2004 dör den Film Der WiXXer opgrepen worrn, de de Filmen ut de Edgar-Wallace-Reeg parodeert hett.

Literatur

• Edgar Wallace: Der Hexer (Original: The Ringer) / Die blaue Hand / Das Geheimnis der gelben Narzissen. Dree Romanen in een Band. Düütsche Översetten. Goldmann Verlag, München 2007, ISBN 978-3-442-55502-4.
• Edgar Wallace: Der Hexer (Original: The Gaunt Stranger). Düütsche Översetten. Scherz Verlag, Bern 1996, ISBN 3-502-55223-1.
• Joachim Kramp, Jürgen Wehnert: Das Edgar Wallace Lexikon. Leben, Werk, Filme. Es ist unmöglich, von Edgar Wallace nicht gefesselt zu sein! Verlag Schwarzkopf & Schwarzkopf, Berlin 2004, ISBN 3-89602-508-2.
• Joachim Kramp: Hallo! Hier spricht Edgar Wallace. Die Geschichte der legendären deutschen Kriminalfilmserie von 1959–1972. 3. Oplaag. Verlag Schwarzkopf und Schwarzkopf, Berlin 2005, ISBN 3-89602-645-3.

Weblenken

• Der Hexer (1964) in de Internet Movie Database (engelsch)
• Vergliek vun de Snittfaten Kinowelt DVD – Universum DVD vun Der Hexer op Schnittberichte.com