Colville Young
Colville Norbert Young (* 20. November 1932 in Belize-Stadt) is en Politiker ut Brietsch-Honduras/Belize (NIP, UDP). He is 1993-2021 Generaalguvernör von Belize.
Leven
[ännern | Bornkood ännern]Young is 1932 in Belize-Stadt boren. He hett von 1945 bet 1950 dat St. Michael’s College besöcht un sik denn as Schoolmeester utbillen laten. He hett von 1958 bet 1961 an de University of the West Indies in Mona (Jamaika) Engelsch studeert un dor en Bachelor of Arts maakt. Denn hett he an de Universität York Spraakwetenschoppen studeert un dor 1971 en Dokter maakt.
Von 1974 bet 1976 weer he Rekter von dat St. Michael’s College un von 1976 bet 1986 Schoolmeester an dat Belize Technical College.
Von 1986 bet 1990 weer he de eerste Präsident von dat University College of Belize un hett denn ok von 1990 bet 1993 wieder Ünnerricht an dat University College of Belize geven.
Blangento hett he en Reeg Böker schreven un weer as Musiker un Kumponist aktiv.
Young is verheiraadt mit Norma Young, borene Trapp. De beiden hebbt dree Söhns un een Dochter.
Politik
[ännern | Bornkood ännern]Young weer Maat von de National Independence Party (NIP).
Bi de Parlamentswahl in Brietsch-Honduras 1965 weer he Kannedaat för de NIP in’n Wahlkreis Mesopotamia un hett de Wahl mit 46,1 % von de Stimmen gegen C. L. B. Rogers von de PUP verloren. 1969 hett sik Young von de NIP afwennt un weer Mitgrünner von dat People’s Development Movement (PDM) un is to’n Viez-Parteibaas wählt worrn. Bi de Wahl 1969 hett dat PDM denn aver en gemeensame List mit de NIP billt. Young weer in’n Wahlkreis Mesopotamia Kannedaat un hett de Wahl mit 43,9 % von de Stimmen wedder gegen Rogers verloren. Dormit kunn he nich in dat Repräsentantenhuus von Belize intehn.
Young is bet 1973 in dat PDM bleven un weer denn Mitgrünner von de Liberal Party, de blots korte Tied Bestand harr. 1973 hett sik de Liberal Party mit de NIP un dat PDM (plus Delen von de UBAD) to de United Democratic Party (UDP) tohoopslaten.
1993 is he as Nafolger von Elmira Minita Gordon Generaalguvernör von Belize worrn.
Ehren
[ännern | Bornkood ännern]Young is 1985 Justice of the Peace worrn un 1986 Member of the Order of the British Empire. Siet 1994 is he Knight Grand Cross von’n Order of St Michael and St George.
Warken
[ännern | Bornkood ännern]- Belize Creole, a study of the Creolized English spoken in Belize in its cultural and social setting. (Dokterarbeid), York 1971
- Creole Proverbs of Belize. Angelus Press, Belize-Stadt 1980
- From One Caribbean Corner. Angelus Press, Belize-Stadt 1983
- Caribbean Corner Calling. 1988
- Pataki Full. 1993
