Collateral Damage

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Collateral Damage
Düütsch Titel: Collateral Damage – Zeit der Vergeltung
Produkschoonsland: USA
Johr vun’t Rutkamen: 2002
Läng: 104 Minuten
Originalspraak: Engelsch
Öllersfreegaav in Düütschland: FSK 16
Filmkru
Speelbaas: Andrew Davis
Dreihbook: Ronald Roose
David Griffiths
Peter Griffiths
Produkschoon: David Foster
Steven Reuther
Musik: Salvatore Basile
Graeme Revell
Kamera: Adam Greenberg
Snitt: Dov Hoenig
Dennis Virkler
Szenenbild: Philip Rosenberg
Kledaasch: James W. Tyson
Dorstellers

Collateral Damage (o pplattdüütsch soveel as „Blangenschaden“; dt. Titel: Collateral Damage – Zeit der Vergeltung) is de Titel vun en US-amerikaanschen Actionfilm ut dat Johr 2002. De Hööftrull speelt Arnold Schwarzenegger. De Geschicht baseert op den historschen Achtergrund vun den börgerkriegordigen Kunflikt vun Kolumbien.

Inholt[ännern | Bornkood ännern]

De Füerwehrmann Gordy Brewer warrt Ogentüüg, as sien Fro un sien Söhn in en Stratencafé in Los Angeles bi en Bombenanslag op de kolumbiaansche Bottschopp üm’t Leven kamen doot. Bekennen deit sik de kolumbiaansche Guerillagrupp „CLC“ ünner dat Regeer vun Claudio Perrini, de sik as Terrorist „El Lobo“ (de Wulf) nömen deit. De Terrorist weer sülvst verantwoortlich för dat Tünnern vun de Bomb un harr sik vör Oort as Polizist verkleedt. En Sympathisant vun de Guerillas betekent de Oppers in en Interview as Kollateralschaden, worophen Brewer de Büros vun de Sympathisanten verwöösten deit.

Vun den CIA-Verantwoortlichen Peter Brandt warrt Brewer wies, dat de US-Regeeren ut diplomaatsche Grünnen nich eernsthaft na den Terroristen söken warrt. Also beslutt he op egen Fuust to hanneln un na Kolumbien to reisen, woneem he Perrini finnen will. Man kuum is he in Kolumbien ankamen, kummt Brewer twüschen de Fronten vun de Guerilla un de de Regeeren, de vun de USA stütt warrt. Mit en namaakten Pass versöcht he sik bit in’t Rebeet vun de Guerillas dörtoslahn. In Mompós dröpt he de Ehfro vun Perrini un ehrn Söhn – man ahn dat to weten. Man he warrt vun de Polizei kennt un insparrt. In’t öörtliche Gefängnis kummt he mit en Mechaniker tosamen, de en Pass för dat Rebeet hett. As in de Nacht dat Gefängnis vun de Guerillas stärmt warrt, kann Brewer mit den Mechaniker weglopen un snackt em sien Pass af.

Mit den Pass kummt he bit na de Grenz vun de Guerillas, woneem he sik as düütschen Mechaniker vörstellt, de an de Steed vun Armstrong kummt. He kriggt den Opdrag, op en Kokainplantaasch en Dieselgenerater heeltomaken. Brewer kann de Plantaasch mit Aceton manipuleeren un to’n Sprengen praat maken. Intwüschen kriegt de Guerillas spitz, dat Brewer dor is. As se em op de Spoor kummt, tünnert Brewer den Sprengsätz un nütt dat Dörenanner, üm sik an en Lastwagen vun de Guerillas to klammern. So kummt he bit in dat Versteek vun Perrini. He maakt en Handgranaat mit en Tiettünnerer praat, dröpt deen aver op de Fro mit den lütten Jungen, de he vörher in Mompŕos drapen harr. He mutt dorbi an sien egen Familie denken un veröscht jem optohollen, vördem de Granaat explodeeren deit. Perrini kriggt dat aver mit un kummt dorüm jüst so dorvun af.

Brewer warrt fastsett un finnt sik den nächsten Dag in en Lager vun de CLC wedder. De fro, de he reddt het pleegt em. Nu finnt he rut, dat se Perrinis Fro Selena is un de Jung en Weetkind, dat se opnahmen hebbt. Selena vertellt em vun noch een Anslag, den Perrini in Washington vörhett, den se nich verantwoorten kann. Se lett em free in de Afsicht, mit Brewer na Washington to reisen. Dor will se ehrn Mann vun den Plaan afbringen. Intwüschen hett aver Brandt op Satellitenbiller rutfunnen, woneem sik Brewer un Perrini ophollen doot. Dat CIA versöcht nu mit Heevschruvers Brewer to befre’en – egentlich mit de Afsicht, Perrini to faten. Se kriegt Brewer to faten un nehmt ok Selena un ehrn Söhn Mauro mit. Na Selena ehr Utseggen warrt en Bahnhoff as Teel vun den ne’en Anslag rutfunnen.

Opletzt finnt Brewer de wohre Afsicht vun Selena rut, de mit ehr egen Mobiltelefon en Explosion direkt in’t US-Ministerium utlösen schall. Sekunnen för de Explosion kann he de Bomb, de in en Speeltüüch-Dinosaurier vun den Söhn versteken is, ut dat Finster smieten. He neiht Selena achteran bit in de Anlagen vun’n Keller, woneem dat to’n Showdown kummt, as he op Perrini un sien Fro drapen deit. He kann de beiden utschalten un butendem ok hinnern, dat över Mobiltelefon en wietere Bomb tünnert warrt. De Film ennt dormit, dat Brewer mit de Freeheitsmedaille ehrt warrn schall, he aver nich optofinnen is.

Kritik[ännern | Bornkood ännern]

Dat Lexikon vun’n internatschonalen Film schrifft vun en eendimensionalen Actionfilm vör den Achtergrund vun Drogenhannel un internatschonalen Terrorismus, de aver nich vörhett, sik mit dat Problem uteneentosetten, man sik mit snaaksche Situatschonen un Wennen to helpen versöcht. De Film weer nix anners as en Star-Vehikel för Schwarzenegger, de in sien ollen Rullenklischees torüchfallen de.

Achtergrund[ännern | Bornkood ännern]

In dat Dreihbook weer toeerst en Szeen binnen, in de de beropene kolumbiaansche Schauspelersche Sofia Vergara en Fleger roven schüll. Man, na de Terroranslääg vun’n 11. September 2001 op dat World Trade Center ut den Film sneden, jüst so as annere Szenen, de nich as patriootsch ansehn weern. Na de Anslääg weer de Starttermin vun den Film op den 8. Februar 2002 verleggt, vunwegen dat de Film vun de Folgen vun’n Terroismus hannelt. Oorsprünglich schüll de Film an’n 5. Oktober 2001 in de Kinos kamen.

Weblenken[ännern | Bornkood ännern]