Belize Sugar Industries
Belize Sugar Industries Ltd. (BSI) is en Ünnernehmen in Belize, dat ut Zuckerrohr Zucker herstellt. De Seet is in Belize-Stadt un de Ünnernehmensform en Limited.
BSI bedrifft en Wark in Tower Hill bi Orange Walk. Dat is vondaag de eenzige Zuckerhersteller in dat Land.
Dat Ünnernehmen hett üm un bi 500 Mitarbeiders.[1] Mehrheitseegner is siet 2012 de US-amerikaansche ASR Group.[1]
Historie
[ännern | Bornkood ännern]Dat Ünnernehmen is 1963 grünnt worrn as Tate & Lyle de Zuckerfabrik von Corozal (Corozal Sugar Factory, egentlich in Libertad) övernahmen hett. De Zuckerfabrik bestünn siet 1935 un weer in de eerste Tied man lütt (Produkschoon von üm un bi 1000 Tunnen). 1955 hett de Hurrikan Janet de Zuckerplantaaschen un de Fabrik drapen. Dorüm sünd grote Investitschonen in de Zuckerindustrie maakt worrn un de Produkschoon is bet 1963 op 23.000 Tunnen stegen.[2]
Nadem BSI 1963 grünnt worrn is, hebbt se denn 1964 anfungen, en neet Wark in Tower Hill to boon, dat in’n Januar 1967 trech worrn is.[2] De Bo von de Fabrik in Tower Hill hett üm un bi söss Milljonen Pund köst.[3] De Fabrik in Corozal harr to de Tied en Kapazität von 45.000 Tunnen un de in Tower Hill von 30.000 Tunnen.[4]
1972 hett dat Ünnernehmen de Plantaaschen, de vörher dat Ünnernehmen tohöört hebbt, an Lüttbuurn verköfft, de vörher as Arbeiders op de Plantaaschen arbeidt harrn.[2]
1985 hett de Zuckerfabrik von Corozal dichtmaakt un dat Ünnernehmen hett blots noch in Tower Hill produzeert.
In de Johren 1980 un 1990 hett Tate & Lyle sien Andelen an dat Ünnernehmen bilütten afstött un en groten Deel is an de BSI Employee Holdings Ltd. gahn, in de sik Mitarbeiders von dat Ünnernehmen tohoopslaten harrn. 2012 wedder hett de BSI Employee Holdings Ltd. Andelen an de ASR Group verköfft, de nu Mehrheitseegner is.
Dat Wark kriggt Zuckerrohr von 6000 Anboers ut Belize anlevert (Anborebeed üm un bi 220 km²)[1] un verarbeidt 1,3 Milljonen Tunnen Zuckerrohr to 144.000 Tunnen Rohzucker un 40.000 Tunnen Melasse.[5] Dat Anborebeed liggt vör allen in de Distrikte Orange Walk un Corozal. En Deel von de Produkschoon warrt to witten Zucker verarbeidt un in Belize verdreven, de gröttste Deel (üm un bi 85 %) geiht aver as Rohzucker na Europa un in de USA.[1]
Tosätzlich bedrifft dat Ünnernehmen siet 2007 över de Belize Co-Generation Energy Limited en Biomasskraftwark mit 31,5 MW, dat de Bagasse verarbeiden deit un Energie an Belize Electricity Limited levert.
De Zuckerrohr-Anboers sünd siet 1959 in de Belize Sugar Cane Farmers Association tohoopslaten, de siet 2008 as Fairtrade zertifizeert is.
En Deel von de Zuckerrohrprodukschoon warrt von Cuello’s Destillery to Rum un annere Sprituosen verarbeidt.
Footnoten
[ännern | Bornkood ännern]- ↑ a b c d American Sugar Now Majority Shareholder of Belize Sugar Industries, Quality Assurande and Food Safety an’n 16. Oktober 2012
- ↑ a b c Cuba in Transition: Papers and Proceedings of the Annual Meeting of the Association for the Study of the Cuban Economy (ASCE). Latin American and Caribbean Center, Florida International University, 1993, Sied 157
- ↑ Philippe Chalmin: The Making of a Sugar Giant: Tate and Lyle, 1859-1989. (översett von Erica Long-Michalke), Taylor & Francis, 1990, Sied 365ff
- ↑ Philippe Chalmin: The Making of a Sugar Giant: Tate and Lyle, 1859-1989. (översett von Erica Long-Michalke), Taylor & Francis, 1990, Sied 516ff
- ↑ IDB Invest
