Anthony Sylvestre Jr.

Anthony Glenford Sylvestre Jr. (* 21. November 1974) is en Avkaat un Politiker (PUP) ut Belize.

Sylvestre is 1974 as Söhn von Anthony Sylvestre Sr. († 2019) boren.

He hett in’n Juli 1996 an dat University College of Belize en Bachelor of Arts in English Education maakt un denn Juristeree studeert. In’n Oktober 2002 hett he en Bachelor of Laws an de University of the West Indies in Cave Hill (Barbados) kregen un in’n September 2004 dat Certificate of Legal Education von de Norman Manley Law School in Kingston (Jamaika). Na dat Studium weer he denn von Juli 2004 bet Juni 2005 Crown Counsel in dat Büro von’n Director of Public Prosecutions un von Juli 2005 bet August 2007 Avkaat bi dat Legal Advice and Services Centre in Belize-Stadt. Siet September 2007 arbeidt he as Avkaat in de Kanzlie von Musa & Balderamos.

Siet Januar 2007 is he tosätzlich Dozent för de Faculty of Social Work von de Universität von Belize. He weer von Oktober 2005 bet März 2007 Maat von dat Income & Business Tax Appeals Board, von Oktober 2005 bet Dezember 2007 von dat Belize Advisory Council on the Guatemalan Claim (dat sik mit’n Grenzkunflikt twüschen Belize un Guatemala befaat) un 2007 von dat Belize Advisory Council un de Policy and Legislative Sub-Committee of the National Aids Commission.

Bi de People’s United Party (PUP) is he siet 2008 Justiziar.

He weer bi de Parlamentswahl in Belize 2008 Kannedaat för de PUP in’n Wahlkreis Queen’s Square. He hett 23,53 % von de Stimmen kregen un keem dormit op’n tweten Platz achter Dean Barrow von de UDP un vör Ebony Babb von de NRTCP. Dormit kunn he nich in dat Repräsentantenhuus intehn. Ok bi de Wahlen 2012 (19,01 %) un 2015 (17,16 %) weer he in’n sülven Wahlkreis Kannedaat un hett beide Maal gegen Dean Barrow verloren.

He weer von März 2014 bet März 2016 för de Oppositschoonspartei PUP Maat von’n Senaat von Belize. In’n März 2014 is he as Nafolger von Karen Bodden Senater worrn. In’n März 2016 müss he düt Amt wedder afgeven.