Anslag up Charlie Hebdo

Vun Wikipedia
Zur Navigation springen Zur Suche springen
Insatzkräfte vor dat Kontor vun Charlie-Hebdo an’n 7. Januar 2015

De Anslag up Charlie Hebdo weer en Terroranslag up de Redaktschoon vun de Tiedschrift for Satire Charlie Hebdo in Paris. He is an’n 7. Januar 2015 gegen Klock 11 vörmiddags utöövt wurrn. De Bröder Chérif un Saïd Kouachi störmen mit Schabellenköppe un automaatsche Wapens in de Kamern vun de Tiedschrift ehre Redaktschoon, maakden 12 Lüde an’e Siet un hefft tominnst tein annere verwunnt. Düt Verbreken is vun en islamistischen Achtergrund utöövt wurrn. In'n Tosamenhang mit düssen Anslag is an'n 8. Januar in Süden vun Paris en Polizistin vun Amedy Coulibaly dootschaten wurrn. An'n neegsten Dag hett Coulibaly en Supermarkt for koschere Waren in'n Osten vun Paris overfullen, hett dor veer jöödsche Kunnen bi an'e Siet maakt un annere Besökers as Börgen nahmen. As de Polizei den Laden störmt hett, is Coulibaly dorbi dootschaten wurrn. Gegen den franzööschen Feernseh-Senner BFM TV over hett Coulibaly an't Telefon utseggt, he harr sik mit Chérif Kouachi afsnackt un streed for den Islaamschen Staat.

So veel Dode hett dat in Frankriek bi en Terroranslag nich mehr geven siet den 18. Juni 1961, as bi den Anslag up den Snelltog Straßborg-Paris 28 Minschen umkamen un 170 verwunnt wurrn weern.[1]

Achtergrund[ännern | Bornkood ännern]

De Redaktschoon vun Charlie Hebdo nah den Brandanslag vun 2011

Charlie Hebdo is en Tiedschrift for Satire, de eenmol in’e Week rutkamen deit. Na Le Canard enchaîné warrt se as Frankriek siene wichtigste Tiedschrift up düt Rebeet ankeken.[2] De Tiedschrift höört to de lüttje Tahl Tiedschriften up’e Welt, de sik troot harrn, de Mohammed-Karrikaturen ut de däänsche Jyllands-Posten af to drucken.

Anfang Määrt 2013 is over Chefredakteur un Rutgever Stéphane Charbonnier in dat Magazin Inspire schreven wurrn, he scholl „infungen“ weern „dood oder lebennig vunwegen Verbreken gegen den Islam. Dor stunnen de Slogans over: „Een Kogel an’n Dag hollt di de Unglovigen vun’n Hals“ un „Stellt Jo vor den Propheten Mohammed, Freden wees mit em“. Charbonnier weer een vun tein Lüde, over de „Inspire“ so schreven hett. Achter düt Blatt steekt wohrschienlich de Al-Qaida-Twieg AQAP[3]

De Titelsiet vun „Charlie Hebdo“ an’n 7. Januar 2015 hannel vun Michel Houellebecq sien neen Roman „Soumission“, de just an düssen Dag rutkamen weer. Dor schrifft he in over en Frankriek in dat Johr 2022, wo unner den Islamismus sien Jück de Scharia just inföhrt warrt.[4]

Afloop[ännern | Bornkood ännern]

De Anslag is utöövt wurrn up de Mitarbeiters in dat Kontor vun de Redaktschoon vun „Charlie Hebdo“ in de Rue Nicolas Appert (11. Arrondissement) in dat Zentrum vun Paris. De Redaktschoon is eenmol in’e Weken, jummers Middeweken, Klock 10 h, tohopenkamen.[5] De Polizei hett seggt, twee Mannslüde mit Schabellenköpp un Stormgewehre weern in de Kamern vun de Redaktschoon ringahn un harrn dor gliek rumballert. Dor harrn se Saken bi ropen, as Allahu Akbar un On a vengé le prophète! („Wi hefft torüchbetahlt for den Propheten!“).[6]

Bi den Anslag sünd tominnsten 12 Lüde umbrocht wurrn: de Rutgever un Teekner Stéphane Charbonnier („Charb“), de Teekners Jean Cabut („Cabu“), Bernard Verlhac („Tignous“), Philippe Honoré un Georges Wolinski, de Mitinhebber vun dat Blatt, Bernard Maris, de Journalisten Mustapha Ourrad un Michel Renaud, de Psychiatersche un Psychoanalytikersche Elsa Cayat, en Huusmeester vun dat Redaktschoonshuus, Frédéric Boisseau un de beiden Polizisten Ahmed Merabet un Franck Brinsolaro.[7]

Tominnst tein annere Lüde sünd verwunnt wurrn, en poor dormank ok bannig. De Terroristen konnen utbüxen, ofschoonst de Polizei al keem, as de Anslag noch in Gang weer. Korte Tied na dat Verbreken kapern de Gangsters en anner Auto in de Rue de Meaux un kemen wieter weg. De Flucht is vun Passanten ut de Naberhüser un vun Sekerheitskameras filmt wurrn. Dor is ok de Mord an en verwunnten Polizisten bi upnahmen wurrn, de vun dune bi in den Kopp schaten wurrn is.

An’n Morgen vun den 8. Januar is in Montrouge in’n Süden vun Paris en Polizistin na en Verkehrsunfall up opene Straten dooschaten wurrn un en annere Person bannig verwunnt. Toeerst weer nich kloor, ob dor en Tosamenhang bestunn mit den Anslag an’n Dag vördem.

De Verbrekers weert socht un funnen[ännern | Bornkood ännern]

Toeerst weer dat nich klaar, wer bi den Anslag mit bi weer. An’n laten Avend hett sik en 18 Johr olen Mann, den sien Naam in soziale Nettwarke as Verdächtigen nömmt wurrn weer, bi de Polizei in Charleville-Mézières mellt un seggt, he harr mit den Anslag nix to kriegen harrt. Nadem siene Lehrers un Mitschölers betüügt hefft, he weer to de Tied vun den Anslag in'n Unnerricht ween, is he an'n 9. Januar wedder freelaten wurrn. Bi de twee Verbrekers hannel sik dat um twee Bröder, ehr Naams sünd Chérif un Saïd Kouachi. De beiden sünd 32 un 34 Johre oold ween un weern franzöösche Staatsbörgers. Se sünd Söhns vun Lüde ween, de ut Algerien inwannert weern un weern as Weetkinner in en Kinnerheim in Rennes in de Bretagne upwussen un later in en Pleegfamilie kamen in en Quartier in de Stadt, wo tomeist towannerte Lüde in leven döen .[8] Chérif Kouachi weer in dat Johr 2008 al to dree Johre achter Trallen verordeelt wurrn (een un en half Johr up Bewährung), vunwegen datt he as Dschihad-Suldat in’n Irak mitmaakt harr. Määrt 2010 is he noch mol inspeert wurrn, vunwegen, datt he unner Verdacht stunn, he harr mitmaakt bi en Operatschoon, um twee Lüde ut'n Gefängnis rut to holen, de bi de Anslagserie in Frankriek 1995 mit bi ween weern. An’n Morgen sünd de Verdächtigen an en Tankstell bi Villers-Cotterêts sehn wurrn (80 km in’n Noordosten vun Paris). An’n Namiddag is dat Fluchtauto funnen wurrn. Dat weer verlaten wurrn un dor weern tein Molotowcocktails in torüchlaten wurrn un en Flagg vun den Dschihad, dorto en Walkie-Talkie, en Magazin mit Munischoon un de Personalutwies vun Saïd Kouachi. All Spezialeenheiten vun Frankriek (GIGN, RAID, GIPN un BRI) weern dor mit togange, de Verbrekers to söken. Tügen hefft de beiden beschreven un se sünd ok beide vun en Wachtkamera upnahmen wurrn, as se keen Schabellenköpp up harrn. CNN hett kunnig maakt, Saïd weer 2011 in den Jemen reist un harr sik dor vun Al-Qaida utbillen laten.[9]

De düütsche Bunds-Binnenminister de Maizière hett klaar stellt, dat de Bröer nich bloß up de USA ehre Watch List stunnen, man datt ok up de Schengen List utschreven weer, dat scholl stickum achter jem ranspikeleert weern.[10]

Nadem de Kouachi-Bröer an en Tankstell in Villers-Cotterêts ehre Wapen wiest un denn Levensmiddel an sik nahmen harrn, konzentreer sik de Polizei bi ehr Söken up en lüttje Region noordööstlich vun Paris. De Sekerheiskräfte kämmen dor en poor Hölter dör, funnen avers numms.

An’n Morgen vun den 9. Januar 2015 sünd in en Fabrikatschoonshall vun en Druckeree in Dammartin-en-Goële Börgen nahmen wurrn. De Oort liggt nich wiet af vun den Flegerhaven Paris-Charles-de-Gaulle. De Druckeree is denn umstell wurrn vun Sekerheitskräfte. An’n Vormiddag hefft de Kouachi-Bröer den Geschäftsföhrer vun de Druckeree freelaten. En annern Anstellten versteek sik in’n tweeten Stock un is ok nich funnen wurrn. De GIGN versoch, de beiden over ehre Mobiltelefone an to wecken, man dat klapp nich. Chérif Kouachi hett Kuntakt upnahmen to den Feernsehsenner BFM TV un verkloor, siene Reis na Jemen weer betahlt wurrn vun Anwar al-Awlaki un he weer herstüert wurrn vun Al-Qaida in’n Jemen.[11] [12] Kort vor Klock 5 an’n Namiddag hefft Saïd un Chérif Kouachi dat Huus vun de Druckeree verlaten un füern up de Spezioleenheiten. Bi de Balleree, de denn losgung, sünd de beiden dootschaten wurrn.[13]

Reaktschonen[ännern | Bornkood ännern]

In de ganze Welt sünd Minschen up’e Straat gahn. Veel Lüde hefft Plakate bi sik harrt, dor stunn up: „Je suis Charlie“ (Ik bün Charlie).

Frankriek[ännern | Bornkood ännern]

Foorts na den Anslag hett Premierminister Manuel Valls den Sekerheitskatalog Plan Vigipirate sien hööchsten Topp «alerte attentats» utropen. Staatspräsident François Hollande hett for den Dag na den Anslag Staatstroer anorden laten un all Flaggen up halven Mast.

Islaamsche Länner un Institutschonen[ännern | Bornkood ännern]

De Araabsche Liga un de Al-Ashar-Universität in Kairo as Autorität vun den sunnitschen Islam verklaren: „De Islam stellt jede Gewalt an’n Kaak[14] De Präsident vun Kurdistan, Masud Barzani, hett Andeel nahmen: Kurdistan stunn „an düssen trorigen Dag“ vereent mit Frankriek, so Barzani. De törksche Präsident Recep Tayyip Erdoğan hett den Anslag „grolich“ nömmt un düütlich maakt, dat „Terrorismus nich en Religion un nich en Natschonalität“ harr un datt dat nicht to entschulligen weer. Man he föög dor to, „Intoleranz gegen anner Aart over un Hassreden“ harrn „den Weg free maakt for düssen Striet“. So hett he de Intoleranz vun de Europäers dor indirekt de Schuld an düssen Anslag mit geven.[15]

Solidarität warrt wiest[ännern | Bornkood ännern]

In allerhand franzöösche un annere europääschen Städer hefft Minschen an den Avend un an den Dag na den Anslag ehre Solidarität wiest un sünd up Straten gahn. Alleen man in Paris sünd up de Place de la République bi 35.000 Minschen tohopen kamen. Ok in in Brüssel, Wien, Berlin, London, Rom, Mailand, Florenz un Madrid hefft de Lüde ehre Solidarität mi de Oppers wiest. De meisten Deelnehmers hefft sik Fahnen, Banners un lute Parolen begeven; faken sünd Kersen un Plakate mit de Upschrift „Je suis Charlie“ (Ik bün Charlie) wiest wurrn.

Weblenken[ännern | Bornkood ännern]

Commons-logo.svg Anslag up Charlie Hebdo. Mehr Biller, Videos oder Audiodateien to’t Thema gifft dat bi Wikimedia Commons.

:Charlie Hebdo shooting|Anschlag auf Charlie Hebdo 2015}}

Belege[ännern | Bornkood ännern]

  1. Hebdo, l'attentat le plus meurtrier depuis plus de 50 ans en France |Gérald Roux, 7. Januar 2015, rutgeven vun France info
  2. Jane Weston: Charlie Hebdo and Joyful Resistance. In: John Parkin, John Phillips (Rutg.): Laughter and Power. Peter Lang, Bern 2006, ISBN 978-3-0391-0504-5, S. 209
  3. Dashiell Bennett: Look Who's on Al Qaeda's Most-Wanted List, thewire.com vun’n 1. März 2013, afropen an‘n 8. Januar 2015 (engelsch).
  4. [1] , Debatten über neuen Houellebecq-Roman – Rassismus oder gelungene Satire?, Anne Christine Heckmann, Tagesschau.de | datum=2015-01-07 |zugriff=2015-01-08}}
  5. [2] attaque-au-siege-de-charlie-hebdo|« Charlie Hebdo » visé par une attaque terroriste, la rédaction décimée|Rutg. Le Monde, 7. Januar 2015]
  6. Anschlag auf "Charlie Hebdo": Frankreich jagt die Attentäter, Rutg. Spiegel Online, togrepen an'n 7. Januar 2015|[3]
  7. [4], Polizeiangaben - Vier Zeichner von Satirezeitschrift Charlie Hebdo getötet, n24.de, 7. Januar 2015
  8. [5] Erster Verdächtiger ergibt sich |Tagesschau.de, 8.1.2015
  9. [6], Kouachi-Brüder standen seit Jahren auf US-Terrorliste, RP online vun'n 9. Januar 2015
  10. Weitere Geiselnahme in Paris, NZZ vun‘n 9. Januar 2015
  11. Chérif Kouachi se revendique d’Al-Qaïda, Coulibaly du groupe Etat islamique, AFP-Meldung up lesoir.be vun‘n 9. Januar 2015, afropen an’n 9. Januar 2015 (franzöösch).
  12. Sarah-Lou Cohen: BFMTV a été en contact avec Chérif Kouachi et Amedy Coulibaly: récit et extraits sonores, Video mit Mitsnitte up de Webstäe vun BFM TV, 9. Januar 2015 (franzöösch).
  13. [7] , Liveticker to‘n Anslag up "Charlie Hebdo" , n-tv.de, 9. Januar 2015
  14. [8] Charlie Hebdo" – Weltweite Bestürzung über den Anschlag , 7. Januar 2015
  15. Turkish president decries fatal attack on Paris magazine. Auf worldbulletin.net vun'n 8. Januar 2015. Afropenen an'n 8. Januar 2015 (engelsch).


Koordinaten:48° 52′ N, 2° 22′ O