Terrorismus

Vun Wikipedia
Wesseln na: Navigatschoon, Söök

Terrorismus (lat. terror „Angst“, „Bang“) bedütt, dat ene Grupp vun Minschen - de Terroristen - systemaatsch annere Lüüd mittels Gewalt (Terror) bange mookt. Dor höört to, dat Lüde versleept un ümbröcht weert un dat Ansläge utöövt un Bomben leggt weert. De Terrorismus will dor up to, dat de Sellschop up'n Kopp stellt warrt un Recht un Politik sik ännert. De Terror schall de Lüde unner Druck setten un jem unseker un bange maken. Up de annere Siet schall he de Terroristen ok Frünnen maken un den Willen upwecken, jem to hölpen.[1]Terrorismus is keen militäärsche Strategie, man toeerst mol en Strategie, de dat up dat Denken vun de Minschen afsehn hett. Terroristen sünd dor woll up ut, de Ümstänn to ännern, man se wüllt nich Länner erovern, man den Brägen vun de Minschen un ehr Denken innehmen.[2]. Dat maakt den Unnerscheed ut to u.a. de Guerilleros.

Terrorismus un Staatsterrorismus[ännern | Bornkood ännern]

Minschen un Gruppen, de Ansläge utöövt, weert faken tohopenfaat as „de Terrorismus“, t.B. in Begrepen, as „de internatschonale Terrorismus“ un de „islaamsche Terrorismus“. Staatsterrorismus in en Naam för de Angst vun Börgerslüde vör den Staat sien Gewaltmonopol, wo seker mit stellt weern schall, dat de Börgerslüde sik an den Staat siene Gesetten holen doot. Utdruck vun düssen Staatsterrorismus sünd sunnerlich Gewaltakten vun den Staat sien Organen ohn Grundlaag up de Gesetten.

De Wöör[ännern | Bornkood ännern]

De Wöör Terrorismus, Terrorist un terroriseren sünd toeerst in dat 18. Johrhunnert upkamen, as dat dor üm güng, en Naam för de Regeerung ehre Gewaltakten to finnen.[3]In Tosamenhang mit de Franzöösche Revolutschoon is „den Konvent sien Terror“ vun 1793 bit 1794 utropen wurrn. Dormols hett de Regeerung all Lüde, de up de annere Sieten stunnen, achter Trallen sett un, wo mööglich, henrichten laten. Dor sünd unner annern de König Ludwig XVI., siene Fro Marie Antoinette un de Gräfin Dubarry unner de Guillotine bi kamen. 1796 hefft de Wöör denn ok Ingang in de düütsche Spraken funnen.

Grenzen[ännern | Bornkood ännern]

Dat is nich ganz eenfach, dat Woort Terrorismus af to grenzen. Vun de Regerungen, de an de Macht sünd, warrt dat ja geern bruukt, üm ehre Gegenspelers slecht to maken, towielen ganz unafhängig vun de Fraag, of se överhaupt Gewalt bruken doot oder nich. Ok wüllt Regerungen ehre egen Gewaltakten geern dormit rechtfardigen, dat se seggt, dat dö nödig, vunwegen dat Terroristen dat up den Staat sien Recht un Gesett afsehn harrn.

Vun en Grupp in'n Wedderstand, vun en Guerilla un vun en natschonale Freeheitsgrupp to den Terrorismus, liggt de Unnerscheed nich groot in ehre Wapen, man in dat, wat se sik vörnahmen hefft. En natschonale Freeheitsgrupp un en Grupp, de in'n Wedderstand gegen de Regeerung togange is, hefft dat meist dor up afsehn, Land un Lüde mit militäärsche Middel in'e Hand to kriegen. De Terrorismus versöcht mit siene Ansläge, bannig Indruck to maken, de Lüde to wiesen, dat de Regeerung ahnmächtig is, un düütlich to maken, dat dat keen Sinn maakt, sik achter so en Staat un Regeerung to stellen. So will he dat Volk bietieds achter sik bringen. Bi Terrorgruppen, de al lang togange sünd, verswimmt mit de Tied faken de Grenzen na de Organiseerte Kriminalität.

Definitschonen[ännern | Bornkood ännern]

Dat Woort Terrorismus sülms is ümstreden. Ofschoonst dat faken versöcht wurrn is, hett sik bit up den hüdigen Dag keen Definitschoon finnen laten, de in all Staten gellen laten warrt. De Grenzen twuschen den „Strieder in'n Wedderstand“ un den „Terroristen“ hefft doch bannig veel mit de Ideologie vun de Lüde to doon, de na düsse Grenzen söökt.

Kiek ok bi[ännern | Bornkood ännern]

Belegen[ännern | Bornkood ännern]

  1. Definitschoon nah Peter Waldmann: Terrorismus und Bürgerkrieg. Der Staat in Bedrängnis. Gerling Akademie Verl., München 2003, ISBN 3-932425-57-X.
  2. Bockstette
  3. Tilly, Charles (2004): „Terror, Terrorism, Terrorists“, Sociological Theory 22 (1): 5-14, S.8.