Michel Houellebecq

Vun Wikipedia
Zur Navigation springen Zur Suche springen
Michel Houellebecq, Warschau (Polen), 9. Juni 2008
Michel Houellebecq (2008)

Michel Houellebecq (* 26. Februar 1958 (anner seggt 1959 oder 1955) up Réunion; sien eegentlichen Naam is Michel Thomas) is en franzööschen Schriever. Vundaage leevt he in Irland un up Lanzarote. In Frankriek warrt Houellebecq ansehn as de Schriever vun sien Generation, de an’n meisten lesen warrt.

Wat to siene Böker to seggen is[ännern | Bornkood ännern]

Al 1991 is sien Book HP Lovecraft, Contre le monde, contre la vie (HP Lovecraft, Gegen de Welt un gegen dat Leben an) rutkamen. Dar sett he sik ut’neen mit dat Wark un dat Leben vun H.P. Lovecraft. Dat is een Schriever, de fantastisch Literatuur schrifft un för ganz wat Besunners ansehn warrt.

In de ganze Welt bekannt wurrn is Houellebecq vun 1994 af an, as siene Romane Extension du domaine de la lutte (Utwieden vun dat Kriegsrebeet) un Les particules élémentaires (Elementardeelen) in’n Hannel kamen sünd.

In siene Romanen nümmt he sünner Gnaad den Westen siene Konsumwelt ut’neen. Dorbi schrifft he, liek as sien Fründ Frédéric Beigbeider ok Saaken, wo de Minschen sik an argern könnt.

He vertellt vun trorige Minschen, de een Sinn söken doot in een Welt, wo dat keen Sinn in gifft. Se kaamt nich klaar mit jem ehr Leben un mütt lieden, weil se nich so sünd, as all de annern. Af un an schrifft he öber de kathoolsche Lehr oder de Tiet, as de kathoolsche Kark noch wat to seggen harr, as öber een verlaren Paradies. Jümmers wedder geiht dat in siene Böker dorüm, dat de Lüe mit jem ehr Sexualität untofräen sünd. Houellebecq sien Spraak is eenfach. He schrifft, as wenn he man bloß bito wat vertellen woll. Dor kann een den Schriever sien Afstand vun de Welt an gewahr weern.

Wo düütsch snackt warrt, sünd siene dree Bänn’ mit Lyrik nich so bekannt, as de Romanen. Rutkamen sünd La poursuite du bonheur (Up Söök nah dat Glück), Le sens du combat (De Slacht ehr Sinn) un Renaissance. Babenhen hett he ok noch een Hümpel Essays schreben. All tosamen kann een Houellebecq nich bloß as een Schriever ansehn, man ok as een Dichter.

Böker vun Houellebecq up düütsch[ännern | Bornkood ännern]

Up Platt is nix vun Houellebecq rutkamen.

Böker öber Houellebecq[ännern | Bornkood ännern]

  • Schober, Rita: Auf dem Prüfstand : Zola - Houellebecq - Klemperer. Berlin (Frey), 2003. ISBN 3-925867-72-4
  • Steinfeld, Thomas (Hg.): Das Phänomen Houellebecq. Köln (DuMont), 2001, ISBN 3-7701-5623-4
  • Wesemael, Sabine van: Michel Houellebecq. Amsterdam (Rodopi), 2004. ISBN 90-420-1743-0 (französisch)

Websteden[ännern | Bornkood ännern]

Commons-logo.svg Michel Houellebecq. Mehr Biller, Videos oder Audiodateien to’t Thema gifft dat bi Wikimedia Commons.