Amerikaansche Swatte Aante

Vun Wikipedia
Zur Navigation springen Zur Suche springen
Amerikaansche Swatte Aant(e)
Amerikaansche Swatte Aante (Anas rubripes)
Systematik
Ünnerstamm: Warveldeerten (Vertebrata)
Klass: Vagels (Aves)
Ornen: Gösevagels (Anseriformes)
Familie: Aantenvagels (Anatidae)
Ünnerfamilie: Echte Aanten (Anatinae)
Tribus: Swemmaanten
Geslecht: Aanten an sik
Oort: Amerikaansche Swatte Aante
Wetenschoplich Naam
Anas rubripes
Brewster, 1902
Unnerscheed twuschen Swatte Aante un Graue Aante - Links de Swatte Aante, sunner den witten Suum an'n Flunkenspegel
Swatte Aante bi't Flegen
Swatte Aante (achtern) un Graue Aante

De Amerikaansche Swatte Aant(e) (Anas rubripes) is en noordamerikaansche Aart ut de Familie vun de Aantenvagels. Dor warrt se to de Aanten an sik mit torekent. Waart un Aante verscheelt sik nich groot. Se seht nich veel anners ut, as de Graue Aante. Vundeswegen warrt de Amerikaansche Swatte Aante hen un wenn ok bloß as en Unneraard vun de Graue Aante ankeken.[1]

Kennteken[ännern | Bornkood ännern]

Dat Lief vun düsse Aant is 53 bit 61 cm lang. Wenn se utwussen sünd, weegt se in’n Harfst in’n Döörsnitt 1090 g.[2]. De Waarten hefft en geelen Snavel un dunkere Feddern. Kopp un Hals sünd en beten wat heller. Bi düsse Aart fallt up, wie unnerscheedlich de enkelten Exemplare utseht. Normolerwiese sünd de Amerikaanschen Swatten Aanten in’n Norden en beten grötter, as wieder na Süden to. De dunkere Striepen over de Ogen hen is ganz verscheden lang un fallt unnerscheedlich dull up. Faken hett he en grönen Glimmer, just as de Nackenfeddern. [3] Bitherto steiht noch nich fast, ob düsse Unnerscheede dor wat mit to doon hefft, datt sik de Aanten mit Graue Aanten krüüzt hefft.[4]

Wo se vorkamen deit[ännern | Bornkood ännern]

Düsse Aanten leevt bloß man in Noordamerika. Bröden doot se an Meere, Dieke, Ströme un in Brookland in’t ööstliche Kanada vun de Hudson Bay bit na Neepundland hen, un denn na Süden to over de Groten Meere bit na New York un an de Küst vun North Carolina. In’t westliche Noordamerika gifft dat düsse Aantenaart nich. Hen un wenn verbiesetert se sik bit hen na de Azoren, na Ierland, Grootbritannien un Sweden.[5] De Waarten treckt to’n Rusen bannig wiet un sünd denn ok wiet buten de Gemarken to finnen, wo se bröden doot. Se sünd denn ok in de Subarktis to sehn, wo dat keene Böme gifft, un in de Prärien un Parklandschoppen vun den Middelwesten. [6]Amerikaansche Swatte Aanten könnt sik goot anpassen un leevt an ganz verscheden Waters. An’n leevsten hoolt se sik avers in Rgionen up, wo dat Woold gifft.[7] Wieldes de Swatte Aante sunnerlich an Meere in’n Woold in’n Osten vun Noordamerika to finnen weer, wo dat veel Schadden gifft, hett de Graue Aante mit ehre hellern Feddern tomeist an Waters in de Prärie leevt, wo dat minner Schadden un mehr Licht geven hett. Vunwegen, datt de Minsch ingrepen, un Holt afneiht un Woolden anplant hett, hefft sik de Habitate dör’nanner mengelt un in de free Natur hefft sik de beiden Aantenaarden krüüzt.

De Amerikaansche Swatte Aante treckt bloß to’n Deel over Winter weg. De wecken Populatschonen treckt na de ööstlichen Bundsstaten vun de USA hen un hoolt sik denn sunnerlich an de Küst up.[8] Annere Populatschonen blievt dat ganze Johr in de Gemarken um de Great Lakes umto.

Freten[ännern | Bornkood ännern]

Amerikaansch Swatte Aanten freet allens. Dor hoolt se sik bi an dat, wat to finnen is, wo se leevt. An de Waterkant freet se mehr Warvellose Deerter, as wieter na dat Binnenland hen. Alltohopen freet se mehr Deerter, as de Grauen Aanten. Hento kummt Saat vun Gras un Seggen, dorto Blöer un Wuddeln vun Waterplanten. Sunnerlich in’n Sommer freet se veel Deerter. In Maine is unnersocht wurrn, datt de Swatten Aanten, de dor bröden döen, bit hen to 74 % lüttje Kreeftdeerter un Insekten freten hefft. [9]

Wie se sik vermehrt[ännern | Bornkood ännern]

In de Aantnvölker gift dat mehr Waarten, as Aanten. Sunnerlich in’t eerste Johr kriegt de Waarten faken keen Aante af. Liekers paart se sik nich so faken mit de Aanten vun annere Waarten, as dat bi de Graue Aante begäng is.[10] Dat gifft dor ok en Reeg vun Henwiese up, datt de Paare en poor Johre tosamen blievt.[11], [12]Dat Nest warrt bloß man vun de Aante boot. Dor hannelt sik dat normolerwiese bloß um en lüttje Kuhlen bi. Utstaffeert weert de mit Feddern, unner dat Bröden kaamt dor denn noch Dunen to. De Eier weert mit Dunen afdeckt, wenn dat Seken dat Nest mol verlaten deit. De Aante leggt seven bit 11 Eier, de sünd all cremewitt. De Küken kruupt ut na 23 bit 25 Dage.[13]En grote Masse vun de Gelege gaht verloren, to’n Deel sünd dat bit to 50 % in en Region.[14] In de Chesapeake Bay kruupt to’n Bispeel bloß man ut 38 % vun de Nester Junge ut.[15] Wenn en Gelege verlaren is, leggt de Aante bit hen to dreemol ne’e Eier, man fökener, wenn de Aanten al wat oller sünd un nich to’n eersten Mol bröödt hefft.[16]

Bestand[ännern | Bornkood ännern]

De Bestand vun de Amerikaansche Swatte Aante löppt achterut. Dat lett, as wenn düsse Aart al vun de 1950er Johre af an elk Johr in’n Döörsnitt 3 % achterut lopen deit.[17] De North American Waterfowl Management Plan hett sik vundeswegen sunnerliche Aktschonen vornahmen, um düsse Aart to schulen. Grund for dat Achterutlopen vun den Bestand is, datt de Habitate vun Minschen ännert wurrn sünd. Dor tellt sunnerlich dat Afneihn vun Holt to, wat dor to bidregen deit, datt de Grau Aante sik wietr utbreden kann.[18]

Belege[ännern | Bornkood ännern]

  1. Gooders und Boyer, S. 53
  2. Kear, S. 510
  3. Kear, S. 509
  4. Kear, S. 509
  5. Gooders und Boyer, S. 53
  6. Kear, S. 510
  7. Kear, S. 510
  8. Kear, S. 510
  9. Kear, S. 511
  10. Gooders und Boyer, S. 55
  11. Gooders und Boyer, S. 55
  12. Kear, S. 510
  13. Kear, S. 512
  14. Gooders und Boyer, S. 55
  15. Kear, S. 512
  16. Kear, S. 512
  17. Kear, S. 512
  18. Kear, S. 513

Literatur[ännern | Bornkood ännern]

Weblenken[ännern | Bornkood ännern]

Commons-logo.svg Amerikaansche Swatte Aant. Mehr Biller, Videos oder Audiodateien to’t Thema gifft dat bi Wikimedia Commons.

Kiek ok bi[ännern | Bornkood ännern]