The Trouble with Harry

Vun Wikipedia
Filmdaten
Plattdüütsch Titel:
Originaltitel: The Trouble with Harry
Düütsch Titel: Immer Ärger mit Harry
Produkschoonsland: USA
Johr vun’t Rutkamen: 1955
Läng: 99 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Alfred Hitchcock
Dreihbook: John Michael Hayes
Produkschoon: Alfred Hitchcock
Musik: Bernard Herrmann
Raymond Scott
Kamera: Robert Burks
Snitt: Alma Macrorie
Szenenbild: John B. Goodman
Hal Pereira
Kledaasch: Edith Head
Dorstellers

The Trouble with Harry (op plattdüütsch so veel as „De Arger mit Harry“; dt. Titel: Immer Ärger mit Harry) is de Titel vun en US-amerikaansche Filmkummedie ut dat Johr 1955 vun den Speelbaas Alfred Hitchcock, de prägt is vun Hitchcock sien swarten Humor. Dat Dreihbook baseert op den gliek nöömten Roman vun Jack Trevor Story.

Inholt[ännern | Bornkood ännern]

An en sünnigen Harvstdag in en lütt Dörp in Vermont sünd unafhangig vun’anner mehrere vun de teemlich schrulligen Inwahners in’n Woold ünnerwegens, woneem se unvermodens op en Mann drapen doot, de doot an’n Rand vun’n Woold op’n Hövel liggen deit. Bi warrt en Breef funnen, ut den kloor warrt, dat de Liek „Harry“ heten deit.

Jeedeen vun de Dörpinwahners hett sien egen Intresse doran, dat de Polizei nix vun de Liek wies warrt. Dor is toeerst de pensioneerte Kaptein un Hobbyjager Albert Wiles, de glöövt, dat he Harry ut Versehns doodschaten hett, as ok de olle Jumfer Ivy Gravely, de bang is, dat se Harry mit den iesern Afsatz vun ehrn Schoh doothaut hett, as se sien Versöken, ehr to bedrängen afwehren wull. Sien – quanswiese– Ehfro Jennifer Rogers glöövt dorgegen, dat se em mit en Melkbuddel den döötlichen Slag op de Steern verpasst hett. De Maler Sam Marlowe, de sik intwüschen in Jennifer verkeken hett, glöövt nu wedder, dat annere denken künnen, he harr Harry ut Ieversucht an de Siet maakt.

So kummt dat to jümmer ne’e Verwicklen un unvermodte Situatschonen, in de de Liek mehrmols inkuhlt un wedder utgraavt warrt – wat sik as Running Gag dör den Film tütt un ok en Deel vun de tonehmen Spannung utmaken deit. Eerst an’t Enn stellt sik rut, dat nümms vun de Inwahners schuld hett an den Doot vun Harry, un all dat Gedöns üm de Liek ümsüns weer. In Wohrheit neemlich, is Harry an en Hartinfarkt doodbleven.

Kritik[ännern | Bornkood ännern]

  • Dat Handbook V vun de kathoolschen Filmkritik schreev vun en amerikaanschen „Gröeljux“ vun Alfred Hitchcock un vun en makaber Speel mit en Liek, dat vun Sarkasmus, snaaksche Wennen un zyynsche Överraschungen leevt. För jemehr Geföhl weer de Film to taktlos.[1]
  • Die Zeit meen 1984, dat de Film op Understatement baseert. Man snack över en Liek as vun en Brill, de een verleggt harr. Disse netten un sympaathschen Lüüd, de ahn Moral oder Skrupel mit den Do’en ümgaht weern de leeftadigsten un fründlichsten Minschen, de een bi Hitchcock finnen kann (afsehn villicht vun Shadow of a Doubt). Jem, de lütten Lüüd – wiet weg vun de groten Weltbegeevissen – höört hier all sien Sympathie. Se wüllt keen Eddelstenen, Geld oder Macht, de in all annern Filmen jümmer Katastrophen utlöst.

Utteken[ännern | Bornkood ännern]

De Film hett keen Priesen wunnen, weer aver veermol för Utteken vörslahn, dorünner tweemol för den BAFTA Award. Shirley MacLaine weer aver 1955 as Meistversprekenste Needorstellersche mit den Golden Globe ehrt.

Achtergrünnen[ännern | Bornkood ännern]

The Trouble with Harry is de drüdde Film, den Hitchcock för Paramount maakt hett. Den Roman vun den engelschen Schriever Jack Trevor Story harr he al veer Johren vörher leest un sien Mööglichkeiten as „swarte Kummedie“ sehn – in’n Gegendeel to Paramount, woneem en Gootachter dorvun afraden de, de Geschicht to verfilmen. Na den sien Oordeel weer de Humor to swack, de Geschicht nich realistisch noog, de Figuren to wehlig un de Inholt to dünn.

As Hitchcock över en Middelsmann för blots 11.000 US-Dollar de Filmrechten in sien Besitt bröcht hett, weer dat Dreihbook vun John-Michael Hayes allang fardig. Dat weer sien drütt Dreihbook för Hitchcock in de Reeg. Paramount hett dorophen en Budget vun 1 Million US-Dollar toseggt.

För Shirley MacLaine weer dat de eerste Filmrull, de se aver blots dör en Tofall kregen hett. Herbert Coleman, de in Hitchcock sien Opdrag egente Bühnenschauspelers ankieken schüll, seeg ehr in New York bi de Opföhren vun en nee anlopen Musical un weer vun de Hööftdorstellersche beindruckt. He künn man kuum glöven, dat se blots de Tweetbesetten weer. MacLaine weer to de Tiet jüst twintig Johr oolt un künn dör dissen Ümstand ehr Weltloopbahn anfangne. Dat se de Mudder vun en sössjohrigen Jungen to spelen harr, hett nümms stört un füll in den Film ok nich wieter op.

De Film schüll eerst vör allen an Originalöörd in Neeengland spelen. Dorüm hett Hitchcock för de Butenopnahmen Vermont in’n Harvst utwählt. Stöörm un dulle Rgeenfäll hebbt aver dorför sorgt, dat en groten Deel vun de Opnahmen, de plaant weern, woortwöörtlich in’t Water fallen sünd. To’n Dreihn müss man in en Turnhall utwieken un later sogor in’t Studio. Vun de Atmosphäär schüll aver mööglichst veel reddt warrn. Dorför weern Torüchprojekschonen vun Achtergrundopnahmen bruukt, de al dreiht weern, un butendem grote Mengden an bunte Blööd, de buten opsöcht un later in’t Studio an en Gipsboom anbackt weern.

De Film weer bito ok de eerste, för den Bernard Herrmann de Musik schreven hett. De Tosamenarbeit twüschen Hitchcock un em hett dorna ruchweg teihn Johren anduert.

Hitchcok sülvst hett The Trouble with Harry as den engelschsten vun sien amerikaanschen Filmen betekent, der vull weer mit drögen, morbiden engelschen Humor. He harr de Hapen, dat de US-amerikaansche Apentlichkeit wat mit sien britischen Humor anfangen künn. Dormit leeg he aver verkehrt. De Filmkritik fünn den Film goot, man de Tokiekers bleven weg. In Europa weer dat anners. Sünners in Frankriek un England harrn de Tokiekers den Swarten Humor bannig geern, un se verstünnen ok de velen sexuellen Anspelen in de Dialogen, de op den eersten Blick harmlos weern.

Na de Eerstopföhren fülln de Rechten an The Trouble with Harry luut Verdrag an Hitchcock, so as ok bi de annern dree Filmen, de he för Paramount maakt hett. Se weern Deel vun dat Arv, dat an sien Dochter güng. Ut den Grund weern de Filmen lang nich mehr to sehn un kemen eerst Mitt vun de 1980er Johren wedder torüch in’t Kino un in’t Feernsehn.

Ok in dissen Film hett Hitchcock sien tyypschen Cameo-Optritt. To sehn is he na ruchweg 21 Minuuten, as en rieken Minsch kummt un Marlowe sien Biller köpen deit. As den sien Auto dat eerste mol hollen deit, löpt Hitchcock as Passant achter den Wagen langs.

Literatur[ännern | Bornkood ännern]

  • Jack Trevor Story: The Trouble with Harry. T. V. Boardman, London un New York 1949
  • Robert A. Harris, Michael S. Lasky, Rutgever: Joe Hembus: Alfred Hitchcock und seine Filme (OT: The Films of Alfred Hitchcock). Citadel-Filmbook bi Goldmann, München 1976, ISBN 3-442-10201-4
  • John Russel Taylor: Die Hitchcock-Biographie, Fischer Cinema 1982, ISBN 3-596-23680-0
  • Bodo Fründt: Alfred Hitchcock und seine Filme. Heyne Filmbibliothek Band Nr. 91, 1986, ISBN 3-453-86091-8

Borns[ännern | Bornkood ännern]

  1. 6000 Filme. Kritische Notizen aus den Kinojahren 1945 bis 1958. Handbook V vun de kathoolschen Filmkritik. Düsseldörp: Altenberg 1963 (3. Oplaag), S. 211.

Weblenken[ännern | Bornkood ännern]

The Trouble with Harry. Mehr Biller, Videos oder Audiodateien to’t Thema gifft dat bi Wikimedia Commons.