Backdraft

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Backdraft
Düütsch Titel: Backdraft – Männer, die durchs Feuer gehen
Produkschoonsland: USA
Johr vun’t Rutkamen: 1991
Läng: 131 Minuten
Originalspraak: Engelsche Spraak
Öllersfreegaav in Düütschland: FSK 16
Filmkru
Speelbaas: Ron Howard
Dreihbook: Gregory Widen
Produkschoon: Brian Grazer, Todd Hallowell un Raffaella De Laurentiis
Musik: Hans Zimmer
Kamera: Mikael Salomon
Snitt: Daniel P. Hanley,
Mike Hill
Szenenbild: Albert Brenner
Dorstellers

Backdraft (op Platt so veel as „Rookgasexplosion“; dt. Titel: Backdraft – Männer, die durchs Feuer gehen) is en US-amerikaansch Speelfilm vun 1991, de mit Ron Howard as Speelbaas dreiht worrn is.

Inholt[ännern | Bornkood ännern]

De Bröder Stephen McCaffrey un Brian McCaffrey sünd noch Kinner, as jehmer Vadder, en Füerwehrmann in de Stadt Chicago en Dag in en Insatz üm’t Leven kummt. Stephen, de öllere vun de beiden, warrt ok Füerwehrmann in de lieken Wacht as sien Vadder, Brian versocht toeerst verscheeden Arbeiten, maakt denn aver ok sien Utbillen bi de Füerwehr – aver woll nich jüst ut Övertügen, man he bruukt Arbeit.

To’n Anfang vun’n Film warrt düütlich, dat sik de Bröder nich recht vergahn künnt. Stephen is de grote Macker un Held, wiel Brian jümmers in’n Achtergund blifft. An sik wull Brian op en Füerwacht an Rand vun’ne Stadt, man Stephen sorgt dorvör, dat he dor Deenst maakt, wo he dat Seggen hett, üm op em optopassen, as he seggt. Stephen nimmt Brian hart ran un sett em oordig ünner Druck, un dat nich blots bi de Utbillen, man ok in’n Insatz. Brian kummt mit dat stännige Rangeln nich kloor, un lett sik opletzt in en anner Afdeel versetten, de sik mit dat Ünnersöken vun Brandöört befaat.

To lieken Tiet passeert en Reeg vun Brandstiften, de op gresig plietsche Oort anleggt sünd: Dat Füer warrt so leggt, dat to wenig Suerstoff dor is, um richtig uttobreken. Eerst bi’t Openmaken vun en Dör, süggt dat Füer den Suerstoff an un tünnert in en Steekflamm – de so nöömte Rookgasexplosion (engl.: Backdraft), de den Film den Naam geven hett. Dör de Explosion kummt jedet mol en Minsch üm, man eenmol dröpt dat ok en vun de Füerwehrlüüd, as de an een vun disse Steden mit de Brandstiften to’n Löschen insett sünd.

Mit de Tiet stellt sik bi de Ünnersöken vun Brian, de jo nu för Donald Rimgale arbeit, rut, dat de Brandstifter een ut de Eenheit vun Stephen is. An’n End vun’n Film, as all Eenheiten to en Grootfüer ropen warrt, stellt sik rut, das John Adcox de Schullige is. Mitten in de Flammen kummt dat to en Kamp twüschen Adcox un Stephen. Adcox rutscht af un kummt in’n Füer üm’t Leven un Stephen warrt swoor verletzt. He kann noch vun sien Kameraden – un allen vöran vun Brian, de endlich sien sien Angst överwinnt – ut dat Füer rett warrn, blifft aver op’n Weg in’t Krankenhuus dood.

Opletzt warrt klor, worum Adcox de Füer leggt harr, un dat en hoogen Politiker dör Bedrug en Reeg vun Füerwehrwachten dicht maken wull, üm dorut Profit to slahn. Brian un Rimgale kriegt den Politiker an’n Haken un Brian maakt na dat Gräffnis vun sien Broder Stephen de Familientraditschoon wieter un geiht wedder torüch na de Füerwacht.

Kritiken[ännern | Bornkood ännern]

De Enkelheiten bi de Füerwehrinsetten weern vun Facklüüd as unrealistisch kritiseert. Dat keen Sekerheitsvorkehren as Atenschuulreedschop bruukt warrt, dat künn dorbi villicht sogor noch angahn för de Situatschoon bi de Füerwehr in de USA vör de 1990er Johren. Ahn Sinn is aver t. B. dat Tweihauen vun de Inrichten in de Rüüm, as dat in’n Film wiest warrt, jüst so as en Füerwehrmann alleen lostoschicken, üm in brennende Delen vun’n Huus vermisste Person to söken.

De dramaturgsch Afsicht, dat Füer as en Oort vun Wesen mit en mystisch Sinn un Seel dortostellen, gegen dat man blots angahn kann, wenn man dorvör nich bang is (as bi en Hund), hett wetenschopplich ok keen Grundlaag.

Utteken[ännern | Bornkood ännern]

Hans Zimmer is 1992 för sien Filmmusik mit den BMI Film Music Award uttekend woorn.

De Film weer 1992 in dree Kategorien för den Oscar nomineert, neemlich för den Besten Toon, de Besten Tooneffekten un de Besten Trickeffekten.

Websteed[ännern | Bornkood ännern]