Yojoa-See

Vun Wikipedia
Lago de Yojoa
Land/Länner Honduras
Toströöm Quebrada del Cianuro, Quebrada Horconcitos
Afströöm Río Lindo
Geograafsche Laag
Koordinaten:14° 54′ N, 88° 0′ W
14° 54′ N, 88° 0′ W
Hööchd 632 m över de See
Fläch 90 km²
Längd 17,7 km
Breed 9,2 km
Satellitenbild

De Yojoa-See (spaansch Lago de Yojoa) is de gröttste See in Honduras. He liggt op de Grenz von de beiden Departamentos Santa Bárbara un Cortés.

In’n See münnt en Reeg lüttjere Beken. De Quebrada del Cianuro mit’n Born an de Häng von de Montaña de Santa Bárbara is mit üm un bi 16 Kilometer dorbi al de längste. De tweetlängste is de Quebrada Horconcitos mit üm un bi 6 Kilometer. Tosätzlich gifft dat en künstlichen Toloop von de Laguna Yure, in de de Río Yure opstaut is (de Río Yure sülvs flütt na’n Río Humuya). Dat Water von’n Yojoa-See flütt över Río Lindo un Río Ulúa na de Karibische See hen af. Dat is aver eerst so, nadem 1964 dat Waterkraftwark boot worrn is. Vörher is de See in’n Süden över’n Río Tepemechín afflaten.

Anners as de Naverlänner hett Honduras man blots lüttjere Seen. De Yojoa-See is de gröttste mank jem. De See is Tohuus för en grote Tall Oorden bi Fisch un Vagels. An de Övers un in de Ümgegend bröödt un nüst bet to 750 Vageloorden. De See warrt ok geern von Utflöglers un Touristen besöcht. De wichtigste Togang is de Straat CA-5, de an sien Oostöver langslöppt un in’n Noorden na San Pedro Sula föhrt un in’n Süden na Comayagua un Tegucigalpa. Annere Straten, de an’n See langslloopt sünd RN-20, RN-54 un RN-72.

Delen von de Ümgegend warrt von de Bueree för’n Anbo von Ananas, Kaffe un Zitrusfrücht bruukt.

An’t Över von’n See liggt de archäoloogsche Fundsteed Los Naranjos, mit Wannerpadden dör’n Fuchtwoold un Utkiekplattformen för dat Vagelkieken. An’n Afloop von’n See gifft dat en Waterkraftwark.

Geografie[ännern | Bornkood ännern]

De See liggt 61 km von San Pedro Sula weg un is 90 km² groot. He liggt op en Höögd von 632 m över de See un is von Bargen ümgeven, de bet op 2.600 m över de See reckt. Von Süüd na Noord is he 17,7 km lang, von West na Oost 9,2 km breed. De See liggt in en temlich fuchte Zoon in Honduras mit in’n Dörsnidd 3200 mm/Johr Regen un en Dörsniddstemperatur von 22 °C. An’n See grenzt twee Natschonaalparks: Cerro Azul Meambar an de Süüdküst un Santa Bárbara an de Noordküst. In’n Süden von’n See doot ok de Cataratas de Pulhapanzak liggen.

Ümweltproblemen[ännern | Bornkood ännern]

Dör dat Raden von Bööm un Bargbo in de Bargen ümto is de See in siene Existenz bedrauht, Johr för Johr geiht de Pegel dal. Dorüm is de Stiftung Exo-Lago grünnt worrn, de den See un sien Ökosystem tohoop mit Fischerslüüd un Buurn redden will.