Wilhelm von Borries (1836–1913)
Wilhelm Eduard Philipp (Graf) von Borries (* 11. Oktober 1836 in Harsfeld; † 27. August 1913 in Stood) weer en düütschen Verwaltungsbeamten.
Von Borries is 1836 as Söhn von Artemise, borene von Lütcken (10. Oktober 1813–13. März 1876; Dochter von Claus Heinrich von Lütcken), un den Beamten Wilhelm von Borries (30. Juli 1802–14. Mai 1883) in Harsfeld boren. He hett Juristeree an de Universität Heidelberg studeert un is dor 1857 Maat von dat Corps Vandalia Heidelberg worrn.[1] Na dat Studium güng he in’n hannöverschen Verwaltungsdeenst. He weer Auditer bi dat Amt Leh un Amtsassesser bi dat Amt Blomendal un dat Amt Lüchow. Nadem Prüßen dat Königriek Hannover 1867 annekteert hett, hett he in’n prüüßschen Staatsdeenst wiederarbeidt. He weer 1867 as Amtsassesser Hülpsarbeider bi de Landdrostie Stood un güng von dor as Regerungsassesser na de Landdrostie Auerk. Von Auerk is he as Regerungsassesser na’n Regerungsbezirk Arensperg wesselt.
Von dor keem he as Amtshauptmann in dat Amt Herzberg un denn in dat Amt Marienborg. Von’n 1. April 1885 bet 1903 weer he Landraad von’n Kreis Marienborg. Ok den Rang von en Gehemen Regerungsraad hett he kregen.
Nadem von Borries sien Vader 1860 von Georg V. as Graaf adelt worrn is, hett he ok den Titel Graaf dragen. Na’n Dood von sien Vader is von Borries 1883 Fideikommissherr von dat Arvstammgood in Hornborg worrn.
Von Borries hett an’n 4. Mai 1870 in Bargen Anna Karoline Johanne von der Decken (12. Februar 1848–11. Dezember 1929; Dochter von Melchior von der Decken) freet. De beiden harrn de Kinner Alexander Melchior Wilhelm (3. März 1871–23. Oktober 1914), Anna Sophie Artemise (23. Juli 1873–27. Dezember 1890), Elisabeth Marie Dorothea (4. Mai 1875–21. April 1916), Charlotte Auguste Juliane (8. Oktober 1876–25. April 1900) un Otto Ludwig Alexander (14. Mai 1879–22. August 1914).[2]