Claus Heinrich von Lütcken

Vun Wikipedia

Claus Heinrich von Lütcken (* 18. Mai 1765 op Good Holenwisch; † 22. September 1819 in Leendaal) weer en hannöverschen Verwaltungsbeamten.

Von Lütcken is 1765 op dat Good Holenwisch in Holenwisch boren. He hett Ünnerricht bi en Huuslehrer kregen un weer denn op de Kloosterschool Ilfeld.[1] Na de School hett he an de Universität Göttingen Juristeree studeert.[1] 1789 hett he von sien Vader dat Good Holenwisch I arvt un is dormit an’n 17. Juni 1789 in de Riddermatrikel von de Ridderschop von dat Hertogdom Bremen indragen worrn.[1] Von Lütcken is an’n 18. Oktober 1794 in dat Gericht Leh as ne’en Richter vörstellt worrn.[1] Dor is he bet to’n 29. März 1797 bleven, as he ut Leh weg is, üm Drost un Greev bi dat Grevengericht Oolland in Jörk to warrn.[1] In de Franzosentied 1811 is von Lütcken Richter an dat Tribunalgericht Leh worrn. As de Laag sik 1813 gegen de Franzosen wennen dee, hebbt sik de Lüüd ut Leh un Land Wusten gegen de Besatters stellt un von Lütcken an’n 13. März 1813 to’n Regent von Leh wählt.[1] Nadem de Franzosentied 1813 in dat Königriek Hannover denn toenn weer, hett von Lütcken Leh verlaten un in de bremen-veernsche Regerungskummission seten, de dat Leid över de Hertogdömer Bremen un Veern övernahmen harr.[1] Von 1816 bet to sien Dood 1819 weer he Drost von dat Amt Leendaal.[1]

He hett an’n 7. August 1794 Margarete Dorothea Amalia von der Decken (9. April 1773-1. Februar 1848) freet. De beiden harrn negen Kinner, ünner annern Ferdinand Hermann (15. Januar 1800-27. Oktober 1870), Eduard Christian (2. Dezember 1800-25. April 1865), de later Minister in dat Königriek Hannover weer, un Artemise (10. Oktober 1813–13. März 1876; hett Wilhelm von Borries freet).

Footnoten[ännern | Bornkood ännern]

  1. a b c d e f g h Dieter Riemer, Uwe Lissau: Vom Leher Vogt zum Amtsgerichtspräsidenten. Gerichtsvorstände in Bremerhaven-Lehe vom Mittelalter bis heute. Bremerhoben 2011, ISBN 978-3-86918-133-2, Sied 45f