Wild Wild West (Film)

Vun Wikipedia
Filmdaten
Plattdüütsch Titel:
Originaltitel: Wild Wild West
Düütsch Titel: Wild Wild West
Produkschoonsland: USA
Johr vun’t Rutkamen: 1999
Originalspraak: Engelsch
Öllersfreegaav in Düütschland: FSK 1
Filmkru
Speelbaas: Barry Sonnenfeld
Dreihbook: Jim Thomas
John Thomas
S. S. Wilson
Brent Maddock
Jeffrey Price
Peter S. Seaman
Produkschoon: Jon Peters
Barry Sonnenfeld
Musik: Elmer Bernstein
Kamera: Michael Ballhaus
Snitt: Jim Miller
Szenenbild: Bo Welch
Kledaasch: Deborah Lynn Scott
Dorstellers

Wild Wild West (op plattdüütsch so veel as „Wille, wille Westen“) is de Titel vun en US-amerikaansche Actionkummedie ut dat Johr 1999. Speelbaas vun den Steampunk-Western weer Barry Sonnenfeld, de vörher ok al Men in Black dreiht hett. In de Hööftrullen weern Will Smith un Kevin Kline to sehn. De Grundidee to den Film baseert op de US-amerikaansche Feernsehreeg The Wild Wild West (dt. Titel: Verrückter wilder Westen) ut de 1960er Johren.

Inholt[ännern | Bornkood ännern]

In de USA, in’t Johr 1869, drapt sik de beiden Agenten vun de Regeren James West un Artemus Gordon, de ünnerscheedlicher nich wesen künnen. Wiel West achter de Wiever her is un gau mit Fuust un Pistool bi de Saak is, arbeit Gordon mit Driestheit un en schier unendliche Tall vun snaaksche Utfinnen. Vun den US-Präsident Grant kriggt dat unglieke Duo den Opdrag to ünnersöken, worüm op eenmol de besten Wetenschopplers vun Amerika verswunnen sünd. Dorbi künnt se op en sünnern Tog torüchgriepen, so as op den Lokföhrer Coleman un de rassige Rita Escobar, de Dochter vun een vun de Wetenschopllers, de verswunnen sünd.

Gau kamt se dorachter, dat Dr. Arliss Loveless dorachter steken deit. En exzentrischen Süüdstaaten-Millionär, de in’n Amerikaansche Börgerkrieg en Deel vun sien Lidden un Organen verloren hett un nu in’n Rullstohl sitten mutt, de mit Damp bedreven warrt. Ok Loveless is en Utfinner, konstrueert aver in’n Gegensatz to Gordon futuristische Maschienen un mechaansche Kriegswapen, de he gegen de USA insetten will, üm torüch to betahlen, wat em dör den Krieg andoon worrn is. Ok West un Gordon kriegt mit Angrepen vun disse Maschienen to doon, künnt sik aver jümmer wedder wehren.

Opletzt kriggt Loveless den Tog aver in siene Gewalt un roovt Rita, wiel he West un Gordon in sien döödlichen Fallen torüch laten deit. Liekers künnt sik de Agenten befre’en un deckt opletzt de geheeme Stadt vun Loveless, de deep in’n willen Westen versteken is. Dor finnt de beiden de roovten Wetenschopplers un ok de letzten Plaans vun Loveless sien Verbreken: he will Washington un de hele USA tonichten maken un dorna dat Rebeet ünner sik, de Feenden vun de USA un de ehmolige Kolonialmächt opdelen. Dorför hett Loveless vun de roovten Wetenschopplers en gigantische Metallspinn boen laten, de mit gresige Wapen utrüst is.

West un Gordon sett allns doran, den Plaan tonichten to maken, köönt eerstmol aver nix dorgegen doon, dat Loveless Präsident Grant in sien Fingers kriggt, as de jüst bi’t Sluten vun de eersten transkontinentalen Iesenbahnverbinnen togegen is. Loveless sien Kriegsspinn lett sik nich ophollen un opletzt steiht Grant kort dorför, de Kapitulatschoon to ünnerschrieven. Man, denn kamt West un Gordon mit Hülp vun een vun Gordon sien Reedschoppen op de Spinn. Tosamen maakt se de Mackers vun Loveless an de Siet un künnt de Spinn saboteeren. Loveless hett sien letzten Trump utspeelt un stellt sik West to en letzt Duell. Beid blieft över en gresigen Afgrund hangen. West kann sik redden, man Loveless fallt in de Deep un blifft dood.

An’t Enn warrt West un Gordon to de eersten beiden Agenten vun een vun Grant nee grünnten Behöörd maakt, den United States Secret Service. Man bi Rita, de se beid de hele Tiet över betütert hebbt, mööt se beid en Nedderlaag hennehmen: In Wohrheit is neemlich de roovte Wetenschoppler nich ehr Vadder, man ehr Ehmann.

Kritik[ännern | Bornkood ännern]

De Kritiken to den Film sünd gröttstendeels slecht utfallen. Butendem weer Wild Wild West mit fief Golden Himbeeren „uttekent“.

  • Philip Nathusius meen in’t TV Spielfilm Filmlexikon, dat de Film veel Gelegenheit geev för Verfolgungsjagden, Slapstick un Döntjes vun en swarten Marshal över de Slaveree, vördem de beiden Agenten den legen Kerl in en gresigen Showdown an de Siet maakt. He snack ok vun vele Filmzitaten.[1]
  • Dat Lexikon vun’n internatschonalen Film beteken den Film as nich-patriootsche Comic-Oper, de mit Effekten överlaadt un blots vördergrünnig witzig weer. Bito weer dat vele Ziteren kritiseert as ok de to velen Details. De Inholt weer as belanglos dorstellt un geev de Dorstellers blots Verlööf to’n mechaansch Poseren un Grimassen Snieden.[2]
  • In de TV Spielfilm stünn tolesen, dat James Bond, Jules Verne, Daniel Düsentrieb un Mel Brooks Beraders vun den spleenigen Spionaasch-Sci-Fi-Comic-Klamauk wesen hebben künnen, vunwegen dat de Film de ünnerscheedlischsten Genres as Gummibäll jongleren de.[3]

Utteken[ännern | Bornkood ännern]

De Film weer för alltohopen 21 Filmpriesen vörslahn und is mit teihn dorvun uttekent worrn, man de Hälfte dorvun weern Razzie Awards, ünner annern in de Kategorie Slechtst Film un Slechtst Speelbaas. Wunnen hett de Film butendem:

  • 1999: den Bogey Award in Sülver för den Filmverleher Warner Bros.
  • 2000: den ASCAP Award in de Kategorie Top Box Office Films för Elmer Bernstein
  • 2000: den ASCAP Award in de Kategorie Fakensten speelt Leed ut en Speelfilm för Rob Fusari, Will Smith, Stevie Wonder un Mohandas Deweese
  • 2000: den Blimp Award in de Kategorie Leefst Leed ut en Speelfilm för Will Smith
  • 2000: den Blockbuster Entertainment Award in de Kategorie Leeftse Nevendorstellersche – Action för Salma Hayek

Anners wat[ännern | Bornkood ännern]

  • De Goldene Nagel, den Präsident Grant bi de Zeremonie in Promontory, Utah, insleiht, is in Wohrheit nich inslahn worrn. De Nagel schall gor nich verboet worrn wesen, man weer in de Golden Spike National Historic Site utstellt. Stift hett den Nagel de Industrielle Leland Stanford.
  • Üm de Macht vun de Spinn to wiesen lett Loveless de Stadt „Silverado“ tonichten maken. Dorbi hannelt sik dat üm de Kulissen vun den gliek nöömten Film Silverado, in den Kevin Kline ok mitspeelt hett. Bit op dat „Lucky Hotel“ warrt dorbi dat hele Set twei maakt
  • Will Smith schüll to de Tiet den „Neo“ in Matrix spelen, hett de Rull aver wegen Wild Wild West aflehnt. Later beteken he dat as den gröttsten Fehler in sien Leven. För Smith sien Rull as U.S. Captain West weern vörher ok Tom Cruise un Mel Gibson vörsehen wesen. As Artemus Gordon weer eerst George Clooney andacht, de aver aflehnt hett. As Speelbaas weer anfangs ok mol över Richard Donner snackt.
  • Robert Conrad harr in de Originalreeg den James West speelt un harr dat Anboot för en Cameo-Rull in den Film. He lehn aver af, nadem he dat Dreihbook leest harr, vunwegen dat he nich tofreden weer mit den Inholt. As de Film later den „Razzie Award“ verleht kreeg, hett Conrad den Pries afhalt un wies dormit apentlich sien Unmoot doröver, wat ut den Stoff maakt worrn is.
  • De Kamp in’n Showdown twüschen West un Loveless sien Mutanten is later toföögt worrn, vunwegen dat de Produzenten de egentliche Idee, dat West un Gordon gegen de Amazonen vun Loveless kämpen schülln, nich spektakulär funnen hebbt.

Borns[ännern | Bornkood ännern]

  1. Philip Nathusius(-pn-) in: Das große TV Spielfilm Filmlexikon. Digitale-Bibliothek-Sünnerband (CD-ROM-Utgaav). Directmedia, Berlin 2006, ISBN 3-89853-036-1, S. 14071
  2. Kritik to’n Film in’t Lexikon vun’n internatschonalen Film
  3. TV-Spielfilm

Weblenken[ännern | Bornkood ännern]