Wikipedia:Mi fehlt dat Woort

Kort:WP:MFDW

Mi fehlt dat Woort

---

De Uutkumst för Wöör, de op Platt noch fehlt.

De Siet Mi fehlt dat Woort schall hülpen, wenn di mal en Woort oder en Fachbegreep op Plattdüütsch fehlt. Annere Bruker kennt villicht dat Woort, finnt enen Indrag in enen Wöörbook oder slaagt ne’e Wöör vör, wenn dat op Platt noch keen passig Woort gifft.

Wenn du ene Fraag to Wöör ut bestimmten Fackrebeten hest, kannst du ok in dat passige Wikiprojekt kieken oder sülvenst in plattdüütsche Wöörböker naslagen.

Stell ene Fraag

---

Klick hier, wenn du ene ne’e Fraag stellen magst

Öllere Fragen

---

Öllere Fragen staht:

• na Johren sorteert in dat Archiv
• alphabeetsch sorteert in dat Glossor.

Geschlechterverbände

Moin @Konvexkonkav,

Weet nicht of du di dat al rutsöcht hest, man hier för dienen Artikelentwurf "Dithmarscher Geschlechtsverbände" maal ut Peter Neuber sien Wöhrner Wöör:

• Slacht (feminin) Mehrtahl: Slachten > Geschlechersverbände im alten Dithmarschen,
• Kluft (feminin) Mehrtahl: Kluften > Unterverband eines Geschlechtes,
• Brōderteemp (männlich/sächlich) Mehrzahl: Brōderteempen > Unterverband eines Geschlechtes,
• Kluftvedder (männlich) Mehrtahl: Kluftvedders > Mitglied der Kluft.

Denn is woll "Slacht (Dithmarschen)" oder "Dithmarscher Slachten" dat beste Lemma för dien Artikel. Flaverius ✍ 07:52, 2. Jul. 2026 (CEST)

Moin, Flaverius, veelen Dank för de Hinwiese. Vun Peter Neuber un sien Wöörböker harr ick noch ni höört, un dorbi sitt ick gor nich mol so wiet vun Wöhrden wech. He hett hier jo sogor een Artikel, dor stünn ok watt vun Hochlaaden, dat hev ick awer nich hinkreegen. "Slacht/Slachten" kummt mi ganz dösig vör, dat is för mi een "Schlacht". Ick hev dat ok noch nie een seggen hört oder dat irgendwo leest. Höchstens seggt de Lüüd "Slecht/Slechter", awer eher nehmt se dat hoogdüütsche Wort. Dat weet ik nun ok nich ... Konvexkonkav ✍ 14:11, 2. Jul. 2026 (CEST)

Dat Slacht is ene öllere Variante vun Slecht. Neuber schrifft (hist) för histoorsch achteran. Mag ween dat he hier ene ole Variant ruthaalt het oder dat he Slacht even echt noch as Woord bruukt. Bruuk man dat wat di passt. Annersieds schriffst du över en histoorsch Thema, dor is dat jümmers okay vörsichtig ok wat ut Hansetieden ruttokramen. Maak dat man na dien Geföhl.

Man ik denk du bruukst dat nich na hoogdüütsch Vörbild as "Geslechterverband" oder "Slechterverband" översetten. "Geschlechterverband" is woll en later Begreep ut de hoogdüütsche Geschichtswetenschop. De middelnedderdüütschen Wöörböker hebbt ok "Slachte/Slechte" för den Dithmarscher "Geschlechterverband". Denn köönt wi dat as "Slecht" mit de Mehrtahl "Slechten", wenn di de Form beter behaagt, wedder in't moderne Plattdüütsch halen. Flaverius ✍ 14:30, 2. Jul. 2026 (CEST)

Fein, mol kieken, ick tendier denn to "Dithmarscher Slechten" as Lemma. Konvexkonkav ✍ 15:53, 2. Jul. 2026 (CEST)

Mannbuße

@Konvexkonkav

Moin, ik bün dat wedder mit de olen Wöör. Dat Thema passt man ok perfekt dorto. Een poor Wöör för „Mannbuße“ ut de middelnedderdüütschen Wöörböker. Allens Varianten, de översett „Mannbuße“ heet

• Mannbote/Mannboot, „Mannbuße“, Bote/Boot is dat plattdüütsche Woort för Buße. Vundaag is man ok dat düütsche Lehnwoort Buuß begäng.
• Mannbröke/Mannbröök, „Bröök“ is dat ole plattdüütsche Woort för „Geldbuße“. Gifft dat ok in’t Neenedderdüütsche, de normale Plattsnacker vundaag kennt dat Woort avers sachs nich mehr.
• Halsbröke/Halsbröök, „Halsgeldbuße“, anner Wöör för Mannbuße
• Manngeld, anner Variant för „Mannbuße“
• Halslösinge „Halsablösung“, würr ik man nich wedder vörtüüg kramen, neeplattdüütsch is dat „Halslösen“, is nich so dull.
• den doden Hals betahlen, „Mannbuße bezahlen“, ok schmuck mal en Utdruck mit Verb, wenn du mal wat anners as en Nomen bruukst
• Vullboot/vullboten „volle Mannbuße/volle Mannbuße zahlen“, Utdruck för de vulle Mannboot as Hööchststraaf.

Bo dat man in, wenn du wullt. As historischen Henwies schaadt dat wiss nix in den Artikel, ok wenn Wöör as „Boot“ oder „Bröök“ bi di in de Eck villicht nich mehr begäng sünd. Flaverius ✍ 01:00, 7. Jul. 2026 (CEST)

Moin, ick warr mi watt utsöken, mit "Mannbuße" weer ick ok no nie tofreden. Ebenso mit den "gooden Ruf". Dor dach ick all an "se wulln, dat good öwer se schnackt worr". Awer dat schall jo ok enzyklopädisch nuch warrn. Schöne plattdüütsche Utdrücke, de verschütt gahn sünd, we vörtokramen, darför bün ick unbedingt. Konvexkonkav ✍ 14:50, 7. Jul. 2026 (CEST)

Good Roop gung ok. Eastfrisian2 ✍ 15:22, 7. Jul. 2026 (CEST)

Ach, Roop vun roopen! Dat Leven kunn so licht ween ... Weest bedankt, Konvexkonkav ✍ 20:04, 7. Jul. 2026 (CEST)

Ja slicht Roop oder Ansehen. Den „lümund“ bruukt wi eerst vörtüüg halen, wenn wi dat Maal as Fackbegreep för de Juristeree in’t Middelöller bruukt. Bet dorhen blivt de in de Mottenkist Flaverius ✍ 23:07, 7. Jul. 2026 (CEST)