Waleri Nikolajewitsch Kubassow

Vun Wikipedia

Waleri Nikolajewitsch Kubassow (russisch Валерий Николаевич Кубасов; * 7. Januar 1935 in Wjasniki, Oblast Wladimir, Russische SFSR; † 19. Februar 2014[1])) weer en sowjeetsch Kosmonaut.

Arbeit as Konstrukteur[ännern | Bornkood ännern]

Waleri Kubassow hett sien Maschinenbaustudium 1958 an dat Moskauer Luftfohrtinstitut mit en Ingenieurstitel afslooten. To'n Anfang vun de bemannt sowjeetsch Ruumfohrt hett he in dat OKB-1 (1966 umnömmt in „Zentrales Konstruktionsbüro des Experimentellen Maschinenbaus“) ünner den Chefkonstrukteur Sergei Koroljow arbeit.

Kandidat för den eersten Woschod-Floog[ännern | Bornkood ännern]

Nahdem dat Wostok-Programm spoodriek afslooten wurr, sullen de nächst bemannt Ruumflüüg mit Woschod-Raumscheep dorführt wurrn. Bi Woschod 1 sull blots een vun de dree Ruumfohrer en utbilten Pilot ween, de beid anner Platzen weern för en Dokter un en Wetenschapler oder Ingenieur vörsehn. Kubassow weer een vun 14 Kandidaten, de in' Mai 1964 vun dat OKB-1 vörslahn wurr, he weer ok ünner de söss, de in de engere Wahl keemen, doch letztlich wurr Konstantin Feoktistow för den Floog utwählt. .

Ersatzmann för de fröh Sojus-Flüüg[ännern | Bornkood ännern]

Bi en tweeten Anloop wurr Kubassow in' Mai 1966 in de Kosmonautengrupp upnommen. To disse Tiet wurrn jüst de beid eerst bemannt Missionen vun dat nee Sojus-Ruumschipp plaant. Sojus 1 sull mit en eenzeln Kosmonauten an Bord starten, Sojus 2 mit dree, wobi twee Ruumfohrer hör Ruumschipp verlaaten un to Sojus 1 umstiegen sullen. De Utwahl vun de Mannschap entwickel sück aber to en düchtigen Striet. De Nahfolger vun Koroljow, Wassili Mischin, wull sien Ingenieure, ünner annern Kubassow, an Bord hemm. De Baas vun de Kosmonautenutbillen, Nikolai Kamanin, hett dat aber as völlig unrealistisch aflehnt, wiel de Tiet för en gründlich Utbillen nich recken dee.

In' Juli 1966 weer Kubassow al Bordingenieur vun Sojus 2 in't Gespräch, in' September nehm he denn dat formale Training up. Ofschons he en bannig gooden Achtergrund in Ruumfohrttechnik harr, reck de Tiet nich, hüm as Ruumfohrer to qualifizeeren. In' November 1966 wurr Kubassow as Ersatzmann för Sojus 2 indeelt. Kubassow harr dörut Chancen harrt Alexej Jelissejew ut de Hööftmannschap to ersetten, denn denn Jelissejew harr nich wesentlich mehr Erfohrung un weer todem ut politisch Grünnen in höhgere Ebenen nich goot ansehn.

De Düppelstart vun Sojus 1 un Sojus 2 weer för den 23. un 24. April 1967 vörsehn. Nahdem Sojus 1 in de Eerdumloopbahn ernste Probleme kreeg, wurr de Start vun Sojus 2 afseggt. Bi de Notlannen vun Sojus 1 versegg de Fallscherm un de Kosmonaut Wladimir Komarow keem to Dood, wat de bemannte Ruumfohrt vun de Sowjetunion um meest twee Johr torüchsmeeten hett.

In disse Tiet weer Kubassow to dat Maandprogramm toordnet un kunn up en wiedere Todeelen in de Ersatzmansschap vun en Sojusfloog hoopen. Dat mit Sojus 1 un 2 plaant Manöver mit en Transfer vun Kosmonauten vun en Ruumschipp to en anner wurr denn in' Januar 1969 mit Sojus 4 un Sojus 5 maakt. Ok hier weer Kubassow Ersatzmann för Jelissejew, keem aber nich to'n Insatz.

Eerst Floog: Sojus 6[ännern | Bornkood ännern]

In' April 1969 wurr Kubassow denn eerstmals en Hööftmannschap todeelt, he wurr as Bordingenieur vun Sojus 6 utsöcht.

To sien eersten Ruumfloog is Kubassow an' 11. Oktober 1969 tosommen mit sien Kommandanten Georgi Schonin start. Hör Ruumschipp nehm an en Gruppenfloog tosommen mit Sojus 7 un Sojus 8 deel. Plaant weer en Kopplung vun Sojus 7 un Sojus 8, de vun Kubassow un Schonin ut Sojus 6 beobacht wurrn sull, de Kopplung keem aber nich tostannen, wiel dat Annäherungssystem Igla bi all dree Ruumscheep verseggen dee. Schonin un Kubassow kunnen aber tomindst dat Vakuum-Schweißgerät Vulkan utprobeeren, dat in dat luftloos Orbitalmodul upbaut un vun dat Rückkehrmodul ut feernstüert wurr. An' 16. Oktober is Sojus 6 weer heel up de Eer torüchkommen.

Kien Floog to Saljut 1[ännern | Bornkood ännern]

Nahdem de Amerikaner dat Rennen to den Maand wunnen harrn, hett sück de sowjeetsch Ruumfohrt up den Bau vun en Ruumstatschoon konzentreert. Saljut 1 is an' 19. April 1971 start. Kubassow weer Ersatzmann för de eerste Mannschap mit Sojus 10, keem aber nich to'n Insatz. Allerdings muss de Floog vun Sojus 10 afbraken wurrn, wiel de Kopplung mit Saljut 1 nich klappt harr.

Somit harr Kubassow as Flugingenieur vun Sojus 11 de Mögelkeit, to de eerst Ruumstatschoonsmannschap vun de Historie to höttn. Dree Daag vör den Start wurrn bi en medizinisch Ünnersöken Schadden up sien Lung opdeckt. De Dokters hebbt seggt, dat dat de Anfang vun en anfangen Tuberkulose weer un hebbt hüm de Floogfähigkeit afspraken. Mit hüm hemm ok sien Mannschapskameraden Alexei Leonow un Pjotr Kolodin ehr Platz in Sojus 11 verloren. Somit weer dat de Ersatzmannschap mit Georgi Dobrowolski, Wiktor Pazajew un Wladislaw Wolkow, de an Bord vun de Saljut 1 en nee Langteitrekord upstellen deen.

Wiels Leonow un Kolodin nu för Sojus 12 vörsehn weern, wurr Kubassow wegen den Tuberkuloseverdacht bi de Indeelen nich mehr nommen. As de Mannschap vun Sojus 11 denn bi de Lannen to Dood keemen, wurrn all Plääns up Ies leggt. De Floogunfähigkeit vun Kubassow harr hüm un sien twee Mannschapskollegen dat Leven rett, dorför dree annern in den Dood schickt.

De Diagnose weer denn aber doch falsch, Kubassow harr kien Tuberkulose un weer somit en Kandidat för den Upenholt an Bord vun de tweet Ruumstatschoon, aber Saljut 2 explodeer an' 29. Juli 1972 kört nah den Start, so dat de plaant Floog vun Sojus 12 streeken wurr. Ok de nächst beid Starts vun en Ruumstatschoon an' 3. April 1973 un an' 11. Mai 1973 sünd fehlslahn, man weet aber nich, of Kubassow för disse Missionen vörsehn weer, denn an' 24. Mai 1973 wurr he offiziell för en anner Projekt vörstellt: dat Apollo-Sojus-Test-Projekt (ASTP).

Eerst internatschonaler Ruumfloog[ännern | Bornkood ännern]

Tosommen mit den Kommandanten Alexei Leonow sull Kubassow de Manschap vun en Sojus-Ruumschipp billen, dat in de Eerdumloopbahn an en amerikaansch Apollo-Ruumschipp koppeln sull. Disse eerst internatschonale Ruumfloog harr en intensiv Vörbereiten to Folg mit mehreren Reisen in de USA.

An' 15. Juli 1975 sünd Kubassow un Leonow an Bord vun Sojus 19 start. Dat weer de eerst sowjeetsch Start, de live in't Feernsehn överdragen wurr. Twee Daag later koppel dat Apollo-Ruumschipp, dat en speziell konstrueert Slüüs mit Koppeladapter mit sück führen dee, an Knapp fiev Stünnen verbroch Kubassow as ok Leonow bi Tom Stafford, Deke Slayton un Vance Brand an Bord vun de Apollo. An' 21. Juli sünd se to de Eer torüchkehrt.

Interkosmosfloog to Saljut 6[ännern | Bornkood ännern]

För de Amerikaner fung nah dat ASTP en lang Pause bit to'n Eerststart vun dat Space Shuttle an, wiels sück de Sowjets wieder up den Bau un Bedriev vun Ruumstatschonen konzentreer. In Rahmen vun dat Interkosmos-Programm wurrn ok Piloten ut befrüend Natschonen as Gast in Ruumscheep un Ruumstatschonen upnommen.

En sückser Floog, de gemeensam mit en Ruumfohrer ut Polen dörführt wurr, weer Sojus 30. Kubassow weer Ersatzmann för den Kommandanten Pjotr Klimuk, keem aber nich to'n Insatz. De Floog gung van' 27. Juni bit 5. Juli 1978.

Eerst twee Johr later keem Kubassow to sien darten Ruumfloog un to sien eerst Kommando. An' 26. Mai 1980 is he mit Sojus 36 to de Ruumstatschoon Saljut 6 flagen. Mit an Bord weer Bertalan Farkas ut Ungarn. De Upgaav vun disse Mission weer, de beid Kosmonauten up de Ruumstatschoon, Leonid Popow un Waleri Rjumin mit en nee Ruumschipp to versörgen. Kubassow un Farkas sünd an' 3. Juni an Bord vun de Sojus 35 to de Eer torüchkehrt.

In de Folgetiet hett Waleri Kubassow weer as Konstrukteur arbeit un weer ok an de Entwicklung vun de Ruumstatschoon Mir bedeeligt. An' 3. November 1993 is he ut dat aktiv Kosmonautenkorps utscheeden un wurr Stellvertreden Direkter vun RKK Energija.

Kubassow is verheiradt un hett twee Kinner.

Literatur[ännern | Bornkood ännern]

Weblenken[ännern | Bornkood ännern]

Waleri Kubassow. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. Cosmonaut Valery Kubasov, Apollo-Soyuz crewmember, dies at 79