Wladimir Michailowitsch Komarow

Vun Wikipedia
Wladimir Michailowitsch Komarow (1965)

Wladimir Michailowitsch Komarow (russisch Владимир Михайлович Комаров; * 16. März 1927 in Moskau; † 24. April 1967 bi Orenburg) weer en sowjetisch Kosmonaut. He weer de eerste Minsch, de bi en Weltruummission storven is.

Van 1942 bit 1949 hett Komarow de Moskauer Spezialschool för de Luftstrietkräfte besöcht un dornah de Militärflegerschool in Bataisk. 1959 sloot he an de Ingenieurakademie vun de Luftstrietkräfte af.

En Johr later is he in de eerste Kosmonautengrupp vun de Sowjetunion utwählt wurrn. 1962 weer he Ersatzmann för Pawel Popowitsch up Wostok 4 un 1964 hett he mit Woschod 1 de eerste Floog in’t All makt. Sien Kollegen weern Boris Borissowitsch Jegorow un Konstantin Petrowitsch Feoktistow. Dat weer dat eerste Mal, dat dree Lüüd in een Kapsel weern.

An 23. April 1967 is he mit dat nee Ruumschipp Sojus 1 in’t All flogen. Aber de ganze Tiet över leept dat mit dat Ruumschipp nich richtig und as he denn landen sull, hebbt sück de Fallschirms nicht richtig utlöst un dat weer all mitnanner verheddert. Ennen van Leed weer, dat he mit ruch weg 145 km/h mit sien Ruumschipp up de Eer knallt is un dat nich överleevt hett.

Komarow hett en Ehefru un twee Kinner achter laten. De Asteroid Komarow, de 1971 opdeckt wurr, un en Krater up de Maand hebbt sien Naam kregen.

Weblenken[ännern | Bornkood ännern]

Владимир Михайлович Комаров. Mehr Biller, Videos oder Audiodateien to’t Thema gifft dat bi Wikimedia Commons.