The Virgin Suicides (Film)

Vun Wikipedia
Filmdaten
Plattdüütsch Titel:
Originaltitel: The Virgin Suicides
Düütsch Titel: The Virgin Suicides
Produkschoonsland: USA
Johr vun’t Rutkamen: 1999
Läng: 97 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Sofia Coppola
Dreihbook: Sofia Coppola
Produkschoon: Dan Halsted
Chris Hanley
Francis Ford Coppola
Julie Costanzo
Musik: Air
Kamera: Edward Lachman
Snitt: Melissa Kent
James Lyons
Szenenbild: Jasna Stefanovic
Kledaasch: Nancy Steiner
Dorstellers

The Virgin Suicides (op plattdüütsch so veel as „De Jumfern-Sülvstmoorden“; in Düütschland ok mit den Ünnertitel Verlorene Jugend) is de Titel vun en US-amerikaanschen Independentfilm vun Sofia Coppola ut dat Johr 1999. Dat Filmdrama hannelt vun de fiktive Geschicht vun fief Süstern, de sik ümbringen doot. Dat Dreihbook baseert op den glieknöömten Roman vun Jeffrey Eugenides ut dat Johr 1993.

Inholt[ännern | Bornkood ännern]

In de 1970er Johren leevt de Familie Lisbon in en lütt Vörstadthuus mit ehr fief Döchter. Jemehr Öllern hebbt en streng Oog op Cecilia (13), de briemsche Lux (14), Bonnie (15), Mary (16) un Therese (17). De Film fangt dormit an, dat de jüngste Dochter versöcht hett Sülvstmoord to maken. Se hett sik in de Baadwann de Pulsadern apensneden, warrt aver noch rechttietig vun en Naversjungen funnen un kann reddt warrn.

De Psycholoog, de Cecilia dorna behanneln deit, kummt to den Sluss, dat se sik egentlich nich ümbringen, man blots Acht op sik lenken wull. He raat de Öllern to, dat se „normalen Ümgang mit Jungs ut ehr Öller“ hebben schüll. Also besluut se en Party för Cecilia to geven, bi de ok ehr Süstern un de Jungs ut de Naverschop inlaadt sünd. Cecilia hett aver keen Spaaß an de Party und geiht fröh in ehr Kamer. Kort later is se dood: Cecilia is ut dat Finster op den spitzen Goorntuun vör’t Huus sprungen.

De Öllern, de streng in jemehrn Gloven sünd, reageert op den Verlust mit noch scharpere Regeln in’t Huus. Liekers verkiekt sik Trip Fontain in Lux Lisbon un will mit ehr na’n Schoolball gahn. Wohrhaftig geevt de Öllern sogor jemehr Verlööf, man ünner de Bedingen, dat Mr. Lisbon de Opsicht op den Ball föhren deit un dat Trip ok för de annern Döchter Begleiders finnen deit, so dat se all tosamen op den Ball gahn künnt. Afsehn vun Lux sünd de Lisbon-Döchter vun jemehr Begleiders toeerst nich sünners andoon, man opletzt hebbt se den Avend all teemlich veel Spaaß. Trip un Lux warrt sogor as Homecoming-Queen un -King wählt. As dat Fest to Enn geiht neiht de beiden ut, un de Süstern mööt ahn Lux na Huus fohren.

Lux un Trip gaht dorgegen op dat Football-Feld vun de School spazeren. Se kamt sik neger, wat opletzt dormit ennt, dat Lux mit Trip ehr Unschuld verleren deit. Se slaapt mit’nanner, man Trip geiht den nächsten Morgen fröh weg un lett Lux alleen torüch. So mutt se mit en Taxi na Huus un de Öllern sett noch mol strengere Regeln för jemehr Döchter an. Se tarrt Lux in’t Huus un künnigt ok gliek an, dat de Süstern de nächsten Weken nich na School gahn warrt. Vun nu an künnt de Deerns keen normal Leven mehr föhren un leevt mehr oder minner isoleert in jemehr Kamern. Butendem dwingt de Mudder Lux dorto, ehr Rock-Schallplaten to verbrennen. Kuntakt hebbt se blots noch mit de Naverjungs, de över Morseteken mit jem kommunizeert un an’t Telefon Schallplaten för jem speelt.

Een Avend geiht de Situatschoon ut de Kehr: Ahn dat de Film dat ankünnigt, beslutt de Döchter, dat Bispeel vun jemehr jüngsten Süster natomaken un sik ok ümtobringen. Se maakt vörher mit de Naverjungs af, dat se gegen Middernacht röverkamen schüllt, wenn de Öllern al slapen doot. De Jungs sünd al jibbelig und folgt de Inladung. As se rinkamt, sit Lux in de Stuuv un smöökt en Zigarett. Se vertellt de Jungs, dat se un ehr Süstern ut dat Öllernhuus utbreken wüllt, un dat se op de Süstern töven schüllt, wiel se al mol na’t Auto geiht. Man, nix passeert. As se dat Töven leed sünd, kiekt sik de Jungs in’t Huus üm und finnt in’n Keller de Liek vun Bonnie, de sik ophungen hett. Gau wüllt se weglopen, as se op’n Weg Therese finnen doot, de sik mit Slaaptabletten ümbröcht hett. Un ok Mary leevt nich mehr: se hett sik in’n Gasaven sülvst doodstickt. As later de Polizei indrapen deit, warrt ok de Liek vun Lux funnen, de sik in de Garaasch in’t Auto mit dat Afgas doodstickt hett.

Na de Sülvstmoorden weet de Öllern nich mehr, wat se doon schüllt. Se verköpt jemehr Huus un all, wat dorin weer, un verlaat de Stadt. De Naverjungs dorgegen reddt de Familienbiller ut’n Müll, üm wat to hebben, wat jem an de Lisbon-Döchter torüch denken lett. Dat Enn vun’n Film wiest, woans de lüttstäädtsche Sellschop op de Sülvstmoorden reageert. Ok wenn se eerst unseker sünd, wat se doon schüllt, finnt se se bald doch wedder to jemehrn wennten Alldag torüch.

Alleen de Naverjungs, de sik all in de Lisbon-Deerns verkeken harrn, mööt ok Johren later noch an jem torüchdenken un hebbt all de Tiet keen Antwoort dorop funnen, worüm dat to de Sülvstmoorden kamen müsst hett. De Film bargt en Off-Kommentar, de ut Ik-Sicht vun een vun de – intwüschen opwossen – Naverjungs de Geschicht vertellt. He beschrifft, dat de Süstern för em un sien Frünnen jümmer ein Radels bleven sünd: Ofschoonst se blangenan wahnt hebbt, weern se doch jümmer wiet weg bleven.

Kritik[ännern | Bornkood ännern]

Dat Lexikon vun’n internatschonalen Film beteken den Film as en indrucksvulle aver ok irriteren Studie, de de an sik düstere Geschicht in frohe Farven duken de. He fiert de 1970er Johren nich as en Tiet vun’n Liberalismus, man as Hort vun’t lüttbörgerliche Denken.

Utteken[ännern | Bornkood ännern]

De Film weer 14 mol för Filmpriesen nomineert un kann dormit as spoodriek ansehn warrn. Uttekent weer he opletzt aver blots för dree Priesen:

  • 2000: mit den Artios in de Kategorie Best Casting för en Independentfilm för Linda Phillips-Palo un Robert McGee
  • 2001: mit den MTV Movie Award in de Kategorie Beste ne’e Filmmaker för Sofia Coppola
  • 2001: mit den Young Hollywood Award in de Kategorie Best Speelbaas för Sofia Coppola

Weblenken[ännern | Bornkood ännern]