The Sons of Katie Elder
| Filmdaten | |
|---|---|
| Plattdüütsch Titel: | — |
| Originaltitel: | The Sons of Katie Elder |
| Düütsch Titel: | Die vier Söhne der Katie Elder |
| Produkschoonsland: | USA |
| Johr vun’t Rutkamen: | 1965 |
| Läng: | 122 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Henry Hathaway |
| Dreihbook: | William H. Wright Allan Weiss Harry Essex |
| Produkschoon: | Hal B. Wallis |
| Musik: | Elmer Bernstein |
| Kamera: | Lucien Ballard |
| Snitt: | Warren Low |
| Szenenbild: | Hal Pereira Walter H. Tyler |
| Kledaasch: | Edith Head |
| Dorstellers | |
| |
The Sons of Katie Elder (op plattdüütsch so veel as: „De Söhnen vun Katie Elder“; dt. Titel: Die vier Söhne der Katie Elder) is de Titel vun en US-amerikaanschen Western ut dat Johr 1965 mit John Wayne in de Hööftrull. Dat Dreihbook baseert op en Geschicht vun Talbot Jennings.
Inholt
[ännern | Bornkood ännern]Katie Elder hett mit ehr Familie in Clearwater in Texas leevt un weer goot ansehn bi all de Lüüd in’n Oort. Nu is se doodbleven un schall begraavt warrn. Ehr veer Söhnen – de Revolverheld John, de professchonelle Speler Tom, en Iesenworenhöker ahn Spood un de Jüngste Bud – weern al siet Johren nich mehr bi ehr un sünd nu anreist, üm ehr de letzte Ehr to wiesen. De Inwahners vun Clearwater sünd jem nich recht gröön, vunwegen dat se sik nich goot üm jemehr Mudder kümmert harrn. John kiekt bi’t Gräffnis blots heemlig to, vunwegen dat he üm sien Slechten roop weet un keen Arger utlösen will. Vun den Sheriff höört he later, dat sien Vadder söss Maanden vörher doodschaten worrn is un de Farm dorna in den Besitt vun Morgan Hastings övergahn is – en rieken Ünnernehmer, de dorbi is, de hele Stadt in sien Fingers to kriegen. Hasting is aver bang, dat vör allen John Hastings sien Anspröök op de Farm in Fraag stellen künn. Dorüm hett he den Opdragskiller Curley anhüürt, de gliektietig mit John in de Stadt ankamen is.
Na dat Gräffnis dröpt sik John mit sien Bröder. Se maakt sik den annern Dag glieks doran, de Saken vun de Familie to regeln un optoarbeiten, wat mit jemehr Öllern wesen is. Dorbi blievt aver teemlich vele Fragen apen, vör allen woans Hastings sik jemehr olle Ranch ünnern Nagel reten hett. De Ünnernehmer versöcht dorophen de Elder-Bröder in de Stadt slecht dortostellen. Dorto kummt, dat Bud – de Jüngste un letzte von de Jungs, ut den noch anstännig wat warrn künn – sien Schoolutbilln afbreken will, üm na John sien Vörbild to leven. John will dorvun aver nix weten. Veel lever wöölt se em wedder torüch op’t College schicken, dat wenigstens he doch noch de Ehr vun de Familie hooch hollen deit.
Hastings geiht opletzt aver so wiet, dat he sogor op den Sheriff scheten deit, üm de Elder-Bröder dat antohangen. De Bewiesen snackt gegen jem, also warrt de Bröder fastnahmen. As de Sheriff dooblifft sünd de Inwahners düchtig in de Brass un wöölt sogor foorts Lynchjustiz begahn. De Deputy, de nu dat Seggen hett, versöcht gegen den Schandaal antogahn un organiseert en Transport vun de Fangenen na Laredo, woneem se den Marshall vörföhrt warrn schüllt. Op’n Weg schüllt de Bröder aver op den Plaan vun Hastings hen an de Siet maakt warrn. So is dat mit de Lüüd besnackt, de den Wagentog begleiden doot. Man, so eenfack is John nich bitokamen un de Plaan geiht in de Büx. Matt kummt dorbi aver üm un ok Bud warrt bi den Överfall anschaten. De Deputy, de nu insehn mutt, dat Hastings en Verbreker is, warrt vun em jüst so ümbröcht.
John un Tom fohrt torüch in de Stadt, üm jemehrn jüngsten Broder na’n Dokter to bringen. Bito wöölt se mit Hastings afreken. Se teht sik mit Bud in de Smeed torüch. Ofschoonst John em vertellt, dat he dat nalaten schall, maakt sik Tom op un kriggt Hastings sien Söhn Dave to faten. Dorbi warrt he vun den ollen Hastings in’n Rüch schaten, liekers kann he Dave bit in de Smeed bringen. Vunwegen dat Hastings bang is, dat sien Söhn em veraden deit, schütt he em dood. Man, vördem Dave doodblifft kann he John un den Richter, de jüst bi jem in de Smeed is, de Wohrheit vertellen: Morgan Hastings hett den ollen Elder veniensch ümbringen laten, üm sik de Ranch ünner’n Nagel rieten to künnen. Un ok den Sheriff un sien Deputy hett Hastings op’t Geweten. Sien swoor besehrten Broder Tom lett John gau vun’n Dokter versorgen, denn maakt he sik op’n Weg achter Morgan Hastings ran, den he opletzt in sien egen Laden an de Siet maken deit.
Kritik
[ännern | Bornkood ännern]- Dat Lexikon vun’n internatschonalen Film schreev vun den Film as en opwännig un mit Kraft inszeneerten Western.[1]
- De Evangeelsche Film-Beobachter (Kritik Nr. 15/1966) meen, dat weer en Standardwestern, de mit Künnen produzeert weer un sülvst de harden Grundregeln vun’t Genre dör vele sympaathsche Töög uttoglieken versteiht. Af en Öller vun 16 künn man den Film Frünnen vun dat Genre op jeden Fall anraden.
Utteken
[ännern | Bornkood ännern]De Film weer för een Filmpries nomineert, den he ok wunnen hett. Dat weer 1966 de Bronze Wrangler in de Kategorie Theatraalsch Speelfilm.
Achtergrund
[ännern | Bornkood ännern]De Film is in Mexiko dreiht worrn. Dat Klima hett den Hööftdorsteller John Wayne bannig tosett, vunwegen dat he to de Tiet al an Kreeft lieden de. He harr faken Lasten, sik in’n Saddel vun sien Peerd to hollen. Blangen Wayne weer de Film noch mit vele annere bekannte un berope Filmstars besett. Sünners de Besetten vun Dean Martin an de Siet vun Wayne lett an en vun de groten Klassikers vun’t Westernfack torüchdenken, neemlich Rio Bravo.
Ruttostellen is, dat de Söhnen vun Katie elder twüschen 1907 un 1943 boren weern. Dormit wiest se en Öllersünnerscheed vun 36 Johren op.
In’t Johr 2005 is en teemlich free Remake vun den Film ünner den Titel Four Brothers dreiht worrn. De Hööftrull speel Mark Wahlberg. Speelbaas weer John Singleton.
Weblenken
[ännern | Bornkood ännern]- The Sons of Katie Elder in de Internet Movie Database (engelsch)
Borns
[ännern | Bornkood ännern]- ↑ Filmkritik in’t Lexikon vun’n internatschonalen Film