The Quick and the Dead (1995)

Vun Wikipedia
Zur Navigation springen Zur Suche springen
Filmdaten
Plattdüütsch Titel:
Originaltitel: The Quick and the Dead
Düütsch Titel: Schneller als der Tod
Produkschoonsland: USA
Johr vun’t Rutkamen: 1995
Läng: 107 Minuten
Originalspraak: Engelsch
Öllersfreegaav in Düütschland: FSK 16
Filmkru
Speelbaas: Sam Raimi
Dreihbook: Simon Moore
Produkschoon: Joshua Donen
Patrick Markey
Allen Shapiro
Musik: Alan Silvestri
Kamera: Dante Spinotti
Snitt: Pietro Scalia
Szenenbild: Patrizia von Brandenstein
Kledaasch: Judianna Makovsky
Dorstellers

The Quick and the Dead (op plattdüütsch so veel as: „De Gaue un de Dode“; dt. Titel: Schneller als der Tod) is de Titel vun en US-amerikaanschen Westernfilm ut dat Johr 1995 vun den Speelbaas Sam Raimi. De Hööftrullen weern mit Sharon Stone, Gene Hackman un Russell Crowe besett. De Film harr sien US-Premiere an’n 10. Februar 1995, in Düütschland keem he an’n 9. November 1995 in de Kinos.

Inholt[ännern | Bornkood ännern]

In de lütte Präriestadt Redemption geiht dat düster to. Dat Seggen hett hier de tyrannische Börgermeester John Herod, de fröher as Gangster un Mörder mit sien Bande ünnerwegens weer. He bestimmt, wat in de Stadt passeert und he befinnt doröver, wokeen leven dröff oder ümbröcht warrt. Jeed Johr finnt in sien Stadt en Wettstriet statt, bi den sik Revolverhelden duelleert. Dorbi is veel Geld to winnen för den, de an’t Enn överblifft. Herod maakt sülvst ok mit. He nütt den Wettstriet, um all Lüüd to verkloren, wo goot he scheten kann. So wiest he de Lüüd in Redemption, wokeen dat Seggen hett.

In de Stadt kummt ok de unbekannte Ellen, de en Geheemnis in sik driggt, dat se aver mit nümms deelt. Ok se will an den Wettstriet deelnehmen, wobi ehr dat nich üm dat Geld to gahn schient. Dör Torüchblennen warrt kloor, dat se mit Herod afreken will, vunwegen dat he ehrn Vadder op’t Geweten hett. An den Wettstriet nehmt sössteihn Lüüd deel. Blangen Herod und Ellen, de as Fro toeerst gor nich eernst nahmen warrt, is ünner annern ok Herod sien Söhn „Kid“ dorbi, as ok de Prediger Cort, de vun Herod sien Mackers in Keden leegt worrn is un nu to’n mitmaken dwungen warrt. Dat stellt sik rut, dat Cort inst to Herod sien Lüüd höör, de aver to sien Gloven funnen hett un keen Colt wedder anfaten will.

So nimmt de Wettstriet sien Loop. Man, as Herod wies warrt, dat ünner de Deelnehmers ok en Koppgeldjäger is, de vun de Inwahners vun Redemption anhürt weer, em an de Siet to maken, ännert he de Regels för dat Duell: Winnen deit nich mehr de, de an’t Enn noch steiht, man de, de noch leevt. Ellen översteiht ehr eerste Runn un warrt vun Herod to’n Eten inlaadt. Se plaant em bi de Gelegenheit üm de Eck to bringen, man ehr Nerven maakt dat nich mit. Eerst will se ut de Stadt utneihn, warrt aver vun den Dokter torüch hollen, de ehr vun fröher kennt un ok üm ehr Geheemnis weet: Ellen is de Dochter vun en Marshall, de vun Herod bi en Överfall fangen nahmen weer un mit’n Strick ophungen weer. Se geiht torüch un sett sik in’n tweeten Dörgang gegen den smerigen Eugene Dred dör. De harr de noch veel to junge Dochter vun den Saloonbesitter Horace najachtert, wat Ellen bannig in Raasch bröcht hett. Herod rümmt den Koppgeldjäger ut’n Weg, un ok „Kid“ un Cort winnt jemehr Duellen.

As dorna Herod vun sien Söhn rutfoddert warrt, vunwegen dat he sik to wenig respekteert föhlt, schütt Herod em mit koolt Hart dood un verkünnt, dat he nich sien Söhn weer, man he em blots en Chance geven harr. Dorna staht sik Cort un Ellen gegenöver, de de Nacht dorför noch tosamen in’t Bett weern. Bit toletzt wegert sik de beiden to scheten, man Herod drauht jüm, dat se beid vun sien Lüüd afknallt warrt, wenn keen vun jem scheten wull. Opletzt drückt Cort af dröpt Ellen, de mit ro’e Dint ehrn Dood simuleert. So staht sik an’t Enn Herod un Cort gegenöver, so as Herod dat plaant harr. Man as dat Duell losgahn schall, kummt dat in de Stadt to mehrere Explosionen. In dat eerste Dör’nanner grippt sik Cort en Revolver un schütt Herod sien Lüüd een na’n anner doot. In’n Rook duukt Ellen wedder op, de dat nu op Herod afsehn hett.

In en letzte Torüchblenn warrt wiest, woans de lütte Ellen ehrn Vaddern bistahn wull, as he vun Herod ophungen warrn schüll. Dorbi is se natürlich sülvst ok in sien Hannen fallen, un Herod hett ehr en Revolver geven, üm dat se versöken schüll, mit dree Schöten den Strick dör to scheten. Se dröpt aver nich den Strick, man schütt ehrn Vadder in den Kopp. As Ellen Herod nu dat Marshall-Afteken vör de Fööt smieten deit, weet he wokeen se is. He seggt ehr to, dat se to langsom tütt un keen Chance hett gegen em. Man, ofschoonst Herod ehr besehrt, blifft he opletzt dood. Ellen smitt Cort den Marshall-Steern to un meent, dat nu wedder dat Gesett in de Stadt weer. Denn sett se sik op’t Peer un ritt weg.

Kritik[ännern | Bornkood ännern]

Dat Lexikon vun’n internatschonalen Film beschrifft den Film as Actionfilm in’t Western-Miljö, de eenigermaten ünnerhollen deit, in sien Beschränken op dat Motiv vun’n Wettstriet aver mehr un mehr vörruttosehn weer[1].

Utteken[ännern | Bornkood ännern]

De Film hett keen Priesen wunnen. Man, 1996 weer Sharon Stone in de Kategorie Beste Schauspelersche för den Saturn-Pries vörslahn.

Borns[ännern | Bornkood ännern]

  1. Kritik to The Quick and the Dead in’t Lexikon vun’n internatschonalen Film op Zweitausendeins; afropen an’n 6. Juni 2019

Weblenken[ännern | Bornkood ännern]