Schippdörperdamm
| Wapen/Flagg | Koort | |
|---|---|---|
 |
| |
| Basisdaten | ||
| ||
| Flach: | 4,53 km² | |
| Inwahners: | 2.489 (30. September 2014) | |
| Inwahnerdicht: | 549,4 Inwahners pro km² | |
| Postleettall: | 27574 | |
| Vörwahl: | 0471 | |
| Geograafsche Laag: | Koordinaten:53° 32′ N, 8° 38′ O53° 32′ N, 8° 38′ O | |
 | ||
|
| ||
Schippdörperdamm (hoochdüütsch Schiffdorferdamm) is en Stadtdeel von Bremerhoben in dat Land Bremen.
Geografie[ännern | Bornkood ännern]
De Naveröörd un -stadtdelen sünd Spaden in’n Noorden, Schippdörp in’n Oosten, Suurheid in’n Süden, Gröönhöben in’n Süüdwesten, de Börgerpark in’n Westen un Buschkämpen in’n Noordwesten. Gröönhöben un de Börgerpark höört to Geestmünn un Buschkämpen to Leh.
Historie[ännern | Bornkood ännern]
Dat Rebeed von Schippdörperdamm hett fröher to dat Dörp Schippdörp tohöört. De Schippdörperdamm weer de Weg twüschen Schippdörp un Geestendörp. De eersten Siedlers langs den Damm hett dat 1780 geven. 1842 sünd dor noch mehr Lüüd hentagen un an’t Enn von dat 19. Johrhunnert sünd dor veel Hüüs boot worrn, von wegen dat Bremerhoben, Leh un Geestmünn temlich wussen sünd un dat Boland dor billig weer. De Oort hett as Deel von de Gemeen Schippdörp vör 1885 to dat Amt Leh tohöört. Na 1885 weer dat in’n Kreis Geestmünn. 1927 is Schippdörperdamm von de Gemeen Schippdörp in de Stadt Wersermünn wesselt, de kort vörher 1924 ut Leh un Geestmünn billt worrn is, un weer dor denn en Oortsdeel. Ut Wersermünn is 1947 Bremerhoben worrn. 1971 is ut den Oortsdeel Schippdörperdamm de Stadtdeel Schippdörperdamm worrn.
Twüschen 1972 un 1976 is dat Zentralkrankenhuus Reinkenheid in Schippdörperdamm boot worrn.
Twee Drüddel von’n Stadtdeel sünd ok vondaag noch Wischen, Feller un Parks.
In de Franzosentied von 1810 bet 1814 hett de Gemeen Schippdörp to de Mairie Wulsdörp in’n Kanton Bremerleh höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
In’n Tweten Weltkrieg sünd 108 Soldaten ut Schippdörperdamm fullen oder vermisst[1]
Inwahnertall[ännern | Bornkood ännern]
| Johr | Inwahners |
|---|---|
| 1. Dezember 1885[2] | 361 Lüüd, 52 Hüüs |
| 1. Dezember 1905[3] | 716 Lüüd, 74 Hüüs |
| 2001 | 2.472 |
| 30. September 2009 | 2.547 |
| 30. September 2014[4] | 2.489 |
Religion[ännern | Bornkood ännern]
Schippdörperdamm is evangeelsch-luthersch präägt un höört to dat Kaspel von de Martinskark in Schippdörp.
För de Kathoolschen is de Hillig-Hart-Jesu-Kark in Geestmünn tostännig.
De Doden ut Schippdörperdamm warrt op’n Karkhoff in Schippdörp begraven oder op een von de annern Karkhööv in Bremerhoben.
Kultur[ännern | Bornkood ännern]
Denkmaals för de Fullenen ut de twee Weltkrieg’ staht bi de Kark in Schippdörp.
Verenen[ännern | Bornkood ännern]
In Schippdörperdamm gifft dat den Schüttenvereen Scheetclub Schippdörperdamm von 1925. De Sportclub Schippdörperdamm von 1971 hett siene Sportanlagen an de Carsten-Lücken-Straat.
Von 1897 bet 1927 weer de freewillige Füürwehr von Schippdörp för Schippdörperdamm mit tostännig. Sietdem is de Beroopsfüürwehr Bremerhoben för den Oort tostännig.
Weertschop un Infrastruktur[ännern | Bornkood ännern]
Verkehr[ännern | Bornkood ännern]
De wichtigsten Straten in Schippdörperdamm sünd de Poristraat na Schippdörp un Sellst, de Schippdörper Schossee na Schippdörp (in’n Oosten) un de Binnenstadt von Bremerhoben (in’n Westen) un de Carsten-Lücken-Straat na Suurheid.
De nächste Autobahn is de Autobahn 27. De Opfohrt 8 Geestmünn liggt direkt in Schippdörperdamm. An’n Noordrand liggt de Opfohrt 7 Bremerhoben-Midd.
De nächste Bahnhoff is so bi dree Kilometer wied weg in’n Westen Bremerhoben Hauptbahnhoff an de Bahnlien Bremen–Cuxhoben.
Scholen[ännern | Bornkood ännern]
De Grundschool Veernschool liggt an de Schippdörper Schossee. An de Karl-Lübben-Straat gifft dat ok noch en Kita.
Footnoten[ännern | Bornkood ännern]
- ↑ http://www.denkmalprojekt.org/2009/schiffdorf_wk1u2_ns.htm
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 164
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 52
- ↑ http://www.bremerhaven.de/pdf/Statistik/Kurzbericht November 2014/
Weblenken[ännern | Bornkood ännern]
Weddewarden | Leherheid | Leh | Midd | Geestmünn | Schippdörperdamm | Suurheid | Wulsdörp | Fischereehaven