Roodsnavelpielsteert

Vun Wikipedia
Zur Navigation springen Zur Suche springen
Roodsnavelpielsteert;

Roodbeckpielsteert; Roodsnavelaant(e)

Roodsnavelpielsteert
Systematik
Ünnerstamm: Warveldeerten (Vertebrata)
Klass: Vagels (Aves)
Ornen: Gösevagels (Anseriformes)
Familie: Aantenvagels (Anatidae)
Ünnerfamilie: Echte Aanten (Anatinae)
Tribus: Swemmaanten
Geslecht: Aanten an sik
Oort: Roodsnavelpielsteert (Anas erythrorhyncha)
Wetenschoplich Naam
Anas erythrorhyncha
Gmelin, 1789

De Roodsnavelpielsteert, ok Roodbeckpielsteert oder Roodsnavelaant (Anas erythrorhyncha) is en Aantenvagel ut Afrika. He warrt to de Swemmaanten rekent, un dor nu wedder to dat Geslecht vun de Aanten an sik. Düsse Aart is wohrschienlich de Aart mit de meisten Aanten in ganz Afrika.[1]

Utsehn[ännern | Bornkood ännern]

De Roodbeckpielsteert is middelgroot. Sien Lief is 43 bit 48 cm lang.[2] De rode Snavel un de sunnerlich hellen Backen un Kehl mit ehren Kuntrast to de dunkere Koppkapp un den dunkern Nacken sünd dor de Grund for, datt he in siene natüürliche Heimat nich mit en annere Aantenaard dör'nanner smeten weern kann. Waart un Aante verscheelt sik nich groot un ok mit de Saison ännert de Waart siene Farven nich. De Waarten sünd en lütt beten grötter, as de Aanten. De Stimm twuschen beide Geslechter verscheelt sik düütlich. De Waarten surrt liesen vor sik hen, wieldes de Aanten krakig quarkt.[3]Ruden doot se, wenn de Lütten utkrapen sünd. Roodsnavelpielsteerte könnt denn 24 bit 28 Dage lang nich flegen.[4]

Wo se vorkamen doot[ännern | Bornkood ännern]

De Roodbeckpielsteert leevt in'n Süden un Oosten vun Afrika un up Madagaskar. He is to finnen vun Äthiopien un Sudan in'n Norden bit hendal na Angola un na de Kapprovinz in de Republiek vun Süüdafrika. Meist gellt he as Standvagel un treckt in'n Winter nich weg. Dat gifft avers ok de wecken Populatschonen, de wegtrecken doot, wenn de Umstänn an dat Water, wo se leven doot, slechter weert. Vagels mit Ring sünd al 2.191 km wiet af vun de Stäe funnen wurrn, wo se den Ring kregen hefft.[5]De Roodsnavelpielsteert schient up Madagaskar nich faken to bröden, ofschoonst he up dat Eiland nich just roor to sehn is. Vundeswegen warrt annahmen, Roodsnavelaanten treckt jummers wedder vun Afrika sien Osten ut hen na Madagaskar. En lüttjen Trupp Roodsnavelpielsteerte hett sik vun Juni bit Juli 1968 in Israel up den Kibbuz Ma’agan Micha’el sien Land upholen.

Bestand[ännern | Bornkood ännern]

In veel Gemarken, wo de Roodsnavelpielsteert vorkamen deit, kummt he in grote Tahl vor. Faken is he de Aantenaard, de overhoop an'n meisten vorkamen deit. Dat gellt ok for Madagaskar, ofschoonst dor ehre Tahl vunwegen en bannigen Wannel in de Habitate achterut lopen deit. De Bestand warrt taxeert up 500.000 bit 1 Mio. in Süüdafrika, 100.000-300.000 in Oostafrika un bi 15.000 bit 25.000 Aanten up Madagaskar.[6]

Wo se leven un wat se freten doot[ännern | Bornkood ännern]

De Roodsnavelpielsteert leevt an flacke Seen, in Nattland, Staubecken, Veehdobben un in Gemarken, wo Ebb un Floot overhen gahn doot. De Waters, de he bruken deit, hefft all veel Nehrstoffe. Up Madagaskar leevt he ok an Beeken oder lüttje Strööm. Sien Freten socht he ok up Riesfeller. Wenn nich de Tied to'n Vermehren is, is he in grote Swarms to sehn. De bestaht denn ut mehr as dusend Aanten.[7] Faken is he tohopen mit annere Aantenaarden antodrepen. Ehr Freten finnt de Aanten meist bi't Grünneln, hen un wenn freet se ok Gras an Land. Se freet ok Planten, de bi de Bueree tagen weert un fallt denn in'e Nacht up de Feller in. Tomeist freet se avers Waterplanten, Saat, Wuddeln un Warvellose Deerter.

Wie se sik vermehren doot[ännern | Bornkood ännern]

Eier von de Roodsnavelpielsteert

Roodbeckpielsteerte vermehrt sik over dat ganze Johr hen. De Drifft, um Nakamen to tügen, warrt utlööst dör Ännern vun den Waterstand. Dat geiht opensichtlich bannig fix, datt se denn Lust to'n Bröden kriegt.[8] In'n Süden vun Afrika bröödt de meisten Roodsnavelpielsteerte vun Oktober bit Mai. In de Kapprovinz, de mehr na Westen to liggen deit, bröödt de meisten Aanten avers vun Augustmaand bit Oktober. De Nester weert boot in den Plantengördel vun de Waters, nich wiet af vun't Över. Den Platz socht sik alleen man de Aante ut. Se boot ok dat Nest alleen, de Waart kickt man bloß to.[9] De Eier sünd oval mit gladde Doppen. Se sünd wat hellbruun bit cremefarvt. In'n Döörsnitt gifft dat tein Eier, man ok fiev oder twolf Eier kaamt faken vor. De Eier weert, meist fröh an'n Morgen, leggt mit'n Afstand vun 24 Stunnen. Bröden deit blooß man de Aante. Dor sitt se 25 bit 28 Dage bi. De Lüttjen weert ok bloß vun de Aante tagen, de Waarten finnt sik in düsse Tied in lüttjere Trupps tohopen to'n Ruden. Na een Johr könnt de Lüttjen sülms Nakamen kriegen. [10]

Wie se vun Minschen holen weert[ännern | Bornkood ännern]

Bahamaaante - se sleiht bannig na de Roodbeckpielsteert, man se gellt as smucker un warrt vundeswegen fökener vun Minschen as Smuckvagel holen
Roodsnavelpielsteert

De Roodsnavelpilsteert warrt nich faken in Gehege bi Minschen holen. Dat liggt sunnerlich dor an, datt de Bahamaaante ut Süüdamerika meist liek utsehn deit, man ehre Feddern gellt doch as en beten mooier un se is ok leifiger togange, as de Roodsnavelaante. Vundeswegen befaat sik Lüde, de sik for Smuckvagels intresseern doot, mehr mit de Bahamaaante.[11]To'n eersten Mol is de Roodsnavelpielsteert 1850 in den Zoo vun London wiest wurrn. In den Berliner Zoo weer se to'n eersten Mol 1882 to sehn.

Belege[ännern | Bornkood ännern]

  1. Kolbe, S. 244
  2. Kear, S. 588
  3. Kolbe, S. 243
  4. Kolbe, S. 244
  5. Kear, S. 588
  6. Kear, S. 588
  7. Kear, S. 588
  8. Kolbe, S. 244
  9. Kolbe, S. 244
  10. Kear, S. 590
  11. Kolbe, S. 245

Literatur[ännern | Bornkood ännern]

Kiek ok bi[ännern | Bornkood ännern]