Robin Hood: Prince of Thieves
| Filmdaten | |
|---|---|
| Plattdüütsch Titel: | — |
| Originaltitel: | Robin Hood: Prince of Thieves |
| Düütsch Titel: | Robin Hood – König der Diebe |
| Produkschoonsland: | Grootbritannien |
| Johr vun’t Rutkamen: | 1991 |
| Läng: | 137 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Kevin Reynolds |
| Dreihbook: | Pen Densham John Watson |
| Produkschoon: | Pen Densham Richard Barton Lewis John Watson |
| Musik: | Michael Kamen |
| Kamera: | Douglas Milsome |
| Snitt: | Peter Boyle |
| Dorstellers | |
| |
Robin Hood: Prince of Thieves (op Platt so veel as „Robin Hood: De Prinz vun de Deven“; dt. Titel: Robin Hood – König der Diebe) is en Aventüer- un Actionfilm ut dat Johr 1991. De Film baseert op de Geschichten üm Robin Hood, den sien Rull hier vun Kevin Costner speelt warrt.
Inholt
[ännern | Bornkood ännern]De Film fangt in Jerusalem an. In dat Johr 1194, to de Tiet vun de Krüüztöög kann de junge engelsche Adlige Robin vun Locksley ut de Kriegsfangenschop utneihn. Help hett he dorbi vun en instigen Feend, den Mauren Azeem, de ok to’n Dood veroordeelt worrn is. Gemeensom künnt se torüch na England flüchten. Azeem föhlt sik mit Robin op Leven un Dood verbunnen, vun wegen dat he ahn sien Help in’t Gefängnis ümbrocht worrn weer.
Man, in de Heimat finnt Robin nich den Freden vör, den he söcht hett: Sien Vadder is ümbrocht, dat Familienslott is plünnert un daalbrennt un de Lännereen vun’n Sheriff vun Nottingham in Besitt nahmen worrn. De Sheriff hett utnütt, dat König Richard nich invt Land is un föhrt in de Tiet en gresig Regiment. Dat Volk warrt ünnerdrückt un uthungert: mit Help vun sien Vedder Guy vun Gisborne drifft he op brutale Wies hoge Stüern vun de Lüüd in.
Robin will natürlich de Ehr vun sien Vadder wedder herstellen un geiht gegen de Lüüd vun Gisborne un den Sheriff an. As se vör em utneihn mööt, finnt se in de Woolden üm Nottingham Schuul un Toflucht. Dor draapt se op en poor vagelfre’e Rövers un Gesettlose, de jem toeerst allns wegnehmen wüllt. Man se eenigt sik, vun wegen dat Robin un Azeem ok op de Flucht för Nottingham sünd. De Rövers weet nix af vun’t Kämpen, un so maakt Robin ut jem en slagfardige Grupp, de anfangt de Lüüd vun’n Sheriff un sien Anhangers mit viigeliensche Guerille-Attakcen un Överfäll antogriepen un uttoroven. De Büüt geevt so torüch an de Armen, de ünner den Sheriff so to lieden hebbt.
Man, blangen dat Geld kriggt Robin denn ok spitz, wat de wohren Afsichten vun Nottingham sünd: De will neemlich – so lang de König nich dor is – mit eenige troe Lords, de he mit sien Geld köfft hett, den Herrscher afsetten, üm sülvst de Herrschop över England an sik to rieten. Robin un sien Gesettlosen sünd för den Sheriff vun Nottingham en grote Plaag. He beslutt dorüm jem tonichten to maken un schickt jem keltische Söldners op’n Lief. De Gesettlosen warrt swor drapen un eenige vun jem sogor fangen nahmen. Se schüllt apentlich henricht warrn, üm den Wedderstand een för all molen to breken. Aver Robin gifft nich op, man gript mit Azeem un de letzten Kameraden den Sheriff in sien Slott an. Hier kann he em opletzt daalkämpen un sien Leefste Marian ut sien Gewalt befre’en. Sien Teel, för de Gerechtigkeit för’t engelsche Volk to kämpen kann he dörsetten, bit an’t Enn König Richard Löwenhart wedder torüch is.
Filmkritik
[ännern | Bornkood ännern]- Lexikon vun’n internatschonalen Film (CD-ROM-Utgaav), Systhema, München 1997: „Die Abenteuer des englischen Volkshelden im Kampf für die Armen und Entrechteten in einer weiteren Filmversion, die ihre Figuren den Leinwand-Idolen und ihre Action den Fantasy-Errungenschaften der 80er Jahre anpasst. Obwohl in der Handlungsführung nicht origineller als viele Vorgänger, unterhält der Film weitgehend mit Tempo und Ironie.“
- Oberösterreichische Nachrichten (OÖN) vun’n 7. September 1991: „Der Aufwand war gewaltig, das Ergebnis gediegen. Prachtvolle Kulissen und Wälder, tolle Stunts und Kampfszenen, durchaus erfrischend-komödiantische Dialoge, äußerst präsente Mitspieler. Abenteuerfilmhandwerk. Hollywood-Routineware. Verkaufbares Konfektionsprodukt. Wer erwartete, die Sehnsucht nach magischer Poesie stillen zu können, war von vornherein Fantast.“
Utteken
[ännern | Bornkood ännern]De Film weer in de Kategorie Best Leed för en Oscar vörslahn. He weer noch för en teemliche Reeg wietere Priesen nomineert; uttekent worrn is de Film mit 13 Priesen:
- 1991: mit de Golden Lienwand
- 1992: mit den Young Artist Award in de Kategorie Best Familien-Speelfilm – Drama
- 1992: mit den Young Artist Award in de Kategorie Best Jungdorsteller in en Speelfilm för Daniel Newman
- 1992: mit den Golden Reel Award in de Kategorie Toonsnitt
- 1992: mit den BMI Film Music Award in de Kategorie Fakenste speelt Leed vun en Speelfilm för Michael Kamen
- 1992: mit den MTV Movie Award in de Kategorie Best Filmleed för Bryan Adams
- 1992: mit den Evening Standard British Film Award in de Kategorie Best Schauspeler för Alan Rickman
- 1992: mit den ALFS Award in de Kategorie Britisch Dorsteller vun’t Johr för Alan Rickman
- 1992: mit den Grammy in de Kategorie Best Leed för en Speelfilm för Robert John Lange, Michael Kamen, Bryan Adams
- 1992: mit den BAFTA Film Award in de Kategorie Best Nevendorsteller för Alan Rickman
- 1992: mit den BMI Film Music Award för Michael Kamen
- 1992: mit den ASCAP Award in de Kategorie Fakenste speelt Leed ut en Speelfilm för Bryan Adams, Robert John Lange
- 1992: mit den Goldene Himbeer in de Kategorie Slechts Dorsteller för Kevin Costner
Parodie
[ännern | Bornkood ännern]To den Film gifft dat en Parodie, de 1993 ünner den Titel Robin Hood: Men in Tights (hoochdüütsch: Robin Hood – Helden in Strumpfhosen) vun Mel Brooks in Szeen sett worrn is. Dorin tüüt Boorks blangen eenige anndere bekannte Kinowarken vör allen över den Costner-Film her.
Anners wat
[ännern | Bornkood ännern]- De Speelfilm weer in England un Frankriek dreiht. In Fackkreisen gellt he vundaag noch as Vörlöper vun Monumentalfilmen as Alexander, Troy oder Gladiator.
- För sien lütten Optritt mit blots twee Dreihdaag, hett Sean Connery 250.000 US-Dollar betogen. Dat Geld hett he för en karitativ Projekt spennt.
- Dat Filmleed „(Everything I Do) I Do It For You“ weer vun Bryan Adams sungen. Dat Leed hett sik mehrere Maanden lang op den eersten Platz vun de Musikcharts hollen un gellt bit hüüt as een vun de an’n fakensten verköfften Singles.
- De meisten Szenen mit Alan Rickman as Sheriff vun Nottingham sünd düchtig kört oder vullstännig rutsneden worrn. Se sünd blots op de Special-Edition-DVD to sehn, vun wegen dat Rickman mehrmols vun’t Script afwieken de un man em naseggt hett, dat he Costner gegen de Wand speelt harr.
- To de glieken Tiet is en annere Robin-Hood-Verfilmen in de Kinos kamen mit den Titel Robin Hood (hoochdüütsch: Robin Hood – Ein Leben für Richard Löwenherz) mit Patrick Bergin, Uma Thurman, Jürgen Prochnow un Jeroen Krabbé. He künn sik aver an de Kinokassen nich een Sekunn gegen dissen Film dörsetten – liekers dat he bannig gote Kritiken kregen hett. In de USA is de annere Film nich mol bit in de Kinos kamen.
DVD
[ännern | Bornkood ännern]In’t Johr 2004 is vun den Film en ne’e „2er-Disc-Special-Edition“ op DVD rutkamen, bi de de oorsprünglich rutsneden Szenen, en Trailer, Biografien un en Making of toföögt weern. Vun wegen dat de sneden Szenen nich bileggt, man in den fardigen Film inföögt worrn sünd, müss disse Faten för den düütschen Markt noch mol vullstännig nee synchroniseert warrn. Dorbi sünd vele annere Synchroonsnackers insett worrn, vun wegen dat eenige vun de Originalbesetten al doodbleven weern oder keen Tiet harrn. Ünner de Föhren Lutz Riedel, de de Spraakregie övernahmen hett un togliek ok de Synchroonstimm vun Alan Rickman weer, is dorbi en vullstännig ne’e Faten entstahn.
Weblenken
[ännern | Bornkood ännern]- Robin Hood: Prince of Thieves in de Internet Movie Database (engelsch)