Rehearsal for Murder
| Filmdaten | |
|---|---|
| Plattdüütsch Titel: | — |
| Originaltitel: | Rehearsal for Murder |
| Düütsch Titel: | Eine Probe für den Mörder |
| Produkschoonsland: | USA |
| Johr vun’t Rutkamen: | 1982 |
| Läng: | 96 Minuten |
| Originalspraak: | Engelsch |
| Öllersfreegaav in Düütschland: | FSK ahn Angaav |
| Filmkru | |
| Speelbaas: | David Greene |
| Dreihbook: | Richard Levinson, William Link |
| Produkschoon: | Robert Papazian |
| Musik: | Billy Goldenberg |
| Kamera: | Stevan Larner |
| Snitt: | Parkie L. Singh |
| Szenenbild: | Lawrence G. Paull |
| Kledaasch: | Dianne Cohoon |
| Dorstellers | |
| |
Rehearsal for Murder (op Platt so veel as „Proov för’n Moord“; dt. Titel: Eine Probe für den Mörder) is de Titel vun en US-amerikaanschen Feernsehfilm ut dat Johr 1982. De Speelbaas vun dissen Kriminalfilm weer David Greene, in de Hööftrull hett Robert Preston speelt.
De för CBS ünner den Arbeitstitel Cold Reading produzeerte Film is in de USA an’n 26. Mai 1982 to’n eersten mol utstrahlt worrn.[1] In’n düütschsprakigen Ruum weer de eerste Sennen an’n 21. Dezember 1989 in’n DFF.[2]
Inholt
[ännern | Bornkood ännern]Alex Dennison schrifft Theaterstücken. Dat is nu een Johr her, dat sien Leefste, de Schauspelersche Monica Wells, sik kort för jemehr plaanten Hochtiet ümbröcht hett. In en Torüchblennen warrt de Tokiekers wies, wat dormols passeert is:
Dat weer an’n Avend na de Premiere vun Alex sien nee Stück, in dat Monica ehr eerste Theater-Hööftrull speelt hett. Wiel sik de Rest vun de Schauspelers op de Fier vergnöögt, warrt de Geldgever Walter Lamb, de Speelbaas Lloyd Andrews un Alex aver gewohr, dat de Kritiken wiet slechter utfallt, as se sik dat vörstellt harrn. De Fier is gau vörbi. Monica lett, as wenn se mit de Kritik klor kummt, fallt aver liekers dör’n sünnerbor Benehmen op. Se harr Alex vertellt, dat se de Nacht lever alleen blieven wull, man midden in de Nacht röpt se em an, he stiggt in sien Auto un föhrt na ehr hen. Aver as he bi ehr ankummt, is Monica doot. För de Polizei is de Fall bald klor: Monica hett sik dat Leven nahmen un hett sik ut’n Finster stört. Alex glöövt aver nich an en Sülvstmoord.
Nu, meist nipp un nau een Johr later, bestellt Alex de Lüüd von dunnemol in dat olle Theater ünner den Vörwand, dat he mit jem en nee Stück dörgahn wull, dat he anfungen hett to schrieven – en Krimi. Gau warrt jem klor, dat Alex mit dat Stück de verleden Tieten oprullt un dorin den Dood vun Monica oparbeit, den he in sien Szenen as’n Moordfall dorstellt. Jeedeen vun de Schauspelers un ok de Geldgever un de Speelbaas mööt nu na un na Szenen spelen, wo se binnen as Personen mit mööglichen realistischen Motiven belast warrt. De Stimmung warrt dordör anheizt.
As se sik utsnacken doot, verkünnt Alex, wat he wirklich vörhett, neemlich mit Help vun sien Skript den Möörder vun Monica in en Fall tappen to laten, üm ruttofinnen, wokeen dat weer. De Schauspelers hollt dor nix vun un wüllt al dat Theater verlaten, as ut’n Schadden vun’n Tokiekerruum en Polizist opduukt, de sik de „Proov“ ankiekt, vun wegen dat Alex em ne’e Henwiesen versproken hett. De Schauspelers laat sik besnacken dortoblieven un de Proov geiht wieter. Wiel Alex mit sien Szenen den Druck op de Lüüd grötter maakt, lett he op de Bühne dat Slaapzimmer vun Monica för de letzte Szeen nabilln.
In de Twüschentiet kummt rut, dat de Polizist gor nich echt is, man de Schauspeler Frank Heller, den Alex as’n Polizist utgeven hett. De Schauspelers hebbt nu de Nees vull, man as se opletzt gahn wüllt, tütt Alex en Pistool un drauht jem. Dat Speel geiht op de Bühne wieter. As nu Leo un Karen jemehr Szeen lesen schüllt, kamt de beiden jümmer mehr ünner Druck, as Alex de Fraag vun’t Alibi in’n Ruum stellt.
Nu warrt klor, dat he Leo ünner Verdacht hett. Un as de swor belast warrt, will Leo weglopen un dat gifft groden Kuddelmuddel op de Bühne. In dat Dörenanner passeert dat nu, dat de verkehrte Polizist, Frank Heller, in de Fall löpt un sik as de Möörder verraadt, vun wegen, dat he sik in dat naboete Slaapzimmer goot utkennt. Nu warrt klor, dat Alex un all de annern tosamen de Fall stellt hebbt, un de Proov blots för Heller inszeneert weer, üm em bi’n Oors to kriegen.
Utteken
[ännern | Bornkood ännern]De Dreihbookschrievers Richard Levinson un William Link sünd för dissen Feernsehkrimi 1983 mit den Edgar in de Kategorie Best Dreihbook för’n Feernsehfilm oder en Minireeg uttekent worrn.
Kritiken
[ännern | Bornkood ännern]Lexikon vun’n Internatschonalen Film: Fürs Fernsehen entstandenes kriminalistisches Kammerspiel, das, obwohl sehr dialoglastig, spannend und intelligent unterhält; auch schauspielerisch und inszenatorisch ansehnlich[3]
Weblinks
[ännern | Bornkood ännern]- Rehearsal for Murder in de Internet Movie Database (engelsch)
Einzelnachweise
[ännern | Bornkood ännern]- ↑ Indrag in’n All Movie Guide, afropen an’n 18. November 2008
- ↑ Indrag in’t LdiF, über filmevona-z.de, afropen an’n 18. November 2008
- ↑ Indrag in’t LdiF, över kabeleins.de, afropen an’n 18. November 2008