Alibi (Kriminalistik)

Vun Wikipedia
Technisch Alibi: Die Tietstempel op en Fohrkoort kann mitünner to’n Alibi warrn.

En Alibi (vun lat. alibi „annerwegens“, ut alius „en annern“ un ibi „dor“ ) is de Nawies dorför, dat een Person, de ünner Verdacht steiht en Straafdaat maakt to hebben, to de Tiet vun dat Verbreken nich an den Daatoort wesen is un he dormit as Deder nich in Fraag kummt. In’t straafrechtliche Ermittlungsverfohren is dorför en Bestätigung dör Bewiesen, Tügen oder Indizien nödig. Dat Rutfinnen vun Alibis is en bedüden Bestanddeel vun de Kriminalistik.

In de Ümgangsspraak warrt Alibi aver ok noch in’n wieteren Sinn bruukt, de sik nich blots op sünnere Öörd betütt. Aver ok hier geiht dat dorüm, de egen Schuld bi Verbreken oder moraalsch verkehrt Verhollen rünnertospelen oder to minnern. Tomeist geiht dat dorbi aver faken üm en Schuulbehauptung.

Verkehrte Alibis sünd Straafdaten vun de Rechtspleeg un künnt för den „Tügen“, de en verkehrt Alibi betüügt hett, en Straafverfohren as Naklapp hebben vunwegen Straafhinnern, Verkehrtutseggen oder Meeneed.

Ünnerscheed warrt twüschen en technisch un en personell Alibi. Dat technische Alibi bedüüt, dat de Person ünner Verdacht to’n Bispeel mit Intrittskorten, Verkehrfotos, Fohrkorten oder so Saken bewiesen kann, dat he to de Tiet vun’t Verbreken nich an den Daatoort wesen is. Vun en personell Alibi warrt snackt, wenn dat Tügen gifft, de bestätigen künnt, dat de Person ünner Verdacht sik to de Daattiet annerwegens ophollen hett (Alibitüüg).