Princess of Thieves
| Filmdaten | |
|---|---|
| Plattdüütsch Titel: | — |
| Originaltitel: | Princess of Thieves |
| Düütsch Titel: | Gwyn – Prinzessin der Diebe |
| Produkschoonsland: | USA Vereenigt Königriek |
| Johr vun’t Rutkamen: | 2001 |
| Läng: | 88 Minuten |
| Originalspraak: | Engelsch |
| Öllersfreegaav in Düütschland: | FSK 6 |
| Filmkru | |
| Speelbaas: | Peter Hewitt |
| Dreihbook: | Robin Lerner |
| Produkschoon: | Jon Cowan |
| Musik: | Rupert Gregson-Williams |
| Kamera: | Andy Collins |
| Snitt: | Sue Wyatt |
| Szenenbild: | Chris Roope |
| Kledaasch: | Oana Paunescu |
| Dorstellers | |
| |
Princess of Thieves (op plattdüütsch so veel as „Prinzessin vun de Deven“; dt. Titel: Gwyn – Prinzessin der Diebe) is de Titel vun en US-amerikaansch-britischen Feernsehfilm ut dat Johr 2001. De Hööftrull vun den Aventüerfilm hett Keira Knightley speelt. Dreiht worrn is de Film in Rumänien. Intwüschen is de Film ok op DVD to kriegen.
Inholt
[ännern | Bornkood ännern]De Film föhrt de Geschicht vun Robin Hood wieter, wobi Robin sien Dochter Gwyn in’n Middelpunkt steiht. Gwyn wasst ahn ehr Öllern op: Ehr Mudder, Lady Marian, is doodbleven un ehr Vadder, Robin vun Locksley is wiet weg bi de Krüüztöög. Een Dag kummt he wedder torüch na Huus, vun wegen dat de König, Richard Löwenhart, in’t Starven liggt. Man, dat gifft Lüüd, de dorvun nich andaan sünd, dat Robin wedder torüch is, vunwegen dat he jem in verleden Tieten bannig tosett harr: de Sheriff vun Nottingham un Prinz John, de Broder vun Richard, de an sien Steed över England heerscht hett. Na den Dood vun sien Broder will John nu König warrn. De eenzige, de em dorbi in’n Weg steiht is de junge Prinz Philipp, en nich-ehlichen Söhn vun Richard, de in Frankriek leevt un nu Anspröök op den Throon hett. Prinz John will em an de Siet maken laten.
Robin vun Locksley warrt utschickt, dat Prinz Philip seker an sien Teel kummt. Gwyn will mit em rieden, warrt von ehrn Vadder aver torüchlaten, vunwegen dat dat to gefährlich is. Rümsitten kann se aver ok nich, also snitt se sik de Hoor af, verkleedt sik as’n jungen Bengel un ritt em achteran – tosamen mit den jungen Froderick, de mit Gwyn tosamen opwossen is un sik in ehr verkeken hett. Robin un sien Fründ Will warrt aver affungen un in’n Kerker sparrt. An sien Steed dröpt sik en Macker vun den Sheriff mit Philipp un stellt em en Fall. Philipp kann aver utneihn, vunwegen dat sien Fründ Conrad sik vör em utgeven hett. Dör en Tofall drapt sik Gwyn in Philipp in’n Woold. He gifft sik aver as sien Dener Conrad ut. Tosamen reist se wieter un verkiekt sik later in’nanner.
Gwyn will ehrn Vadder ut de Hand vun’n Sheriff redden. As se vun en Bagenturneer in Nottingham höört, sütt se en Mööglichkeit, in’t Slott to kamen. In de Endrunn spleet Gwyn en annern Piel un winnt dat Turneer. As Pries warrt se to’n Bankett in’t Slott inlaadt. Dor duukt de Macker vun’n Sheriff op, den Philipp wedder kennen deit. Se neiht ut un drapt in’n Woold op Robin sien Lüüd. Gwyn warrt gewohr, dat Ehr Vadder in’n Tower vun London fangen holen warrt. As dat Gerücht ümgeiht, dat Philipp noch leevt, gifft de sien wohre Identität pries. He versprickt Gwyn, ehrn Vadder to redden, ehr gegen Prinz John bitostahn un em vun’n Throon to verdrieven. Tosamen maakt se sik op na London, woneem se Robin ut’n Kerker befre’en künnt. Un so künnt se ok hinnern, dat John kröönt warrt. Trurig sünd opletzt blots Gwyn un Philipp, de wegen den ünnerscheedlichen Stand nich heiraten künnt.
Kritik
[ännern | Bornkood ännern]Na dat Oordeel vun’t Lexikon vun’n internatschonalen Film weer de Film goot meent wesen, aver nich mehr as blots Ünnerholen för de Familie ahn grote Bedüden. De Film versöcht dat jeedeen recht to maken un mischt opletzt doch blots de Stereotypen vun dat Genre nee.[1]
Utteken
[ännern | Bornkood ännern]De Film is 2001 mit den Filmpries vun’t Santa Clarita International Film Festival uttekent worrn in de Kategorie Best Feernsehspeelfilm – Drama.
Borns
[ännern | Bornkood ännern]Weblenken
[ännern | Bornkood ännern]- Princess of Thieves in de Internet Movie Database (engelsch)