Oosterhagen
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 27721 | |
| Vörwahl: | 0421 | |
| Geograafsche Laag: | Koordinaten:53° 12′ N, 8° 43′ O53° 12′ N, 8° 43′ O | |
|
| ||
Oosterhagen (hoochdüütsch Osterhagen) is en lütten Oort in de Gemeen Hu’e in’n Landkreis Oosterholt, Neddersassen. Binnen de Gemeen höört dat Rebeed to’n Oortsdeel Ihlpohl.
Geografie[ännern | Bornkood ännern]
De Oort liggt op de Oosterholter Geest. Dat Water ut dat Rebeed flütt över de Ihl af. In’n Süden liggt dat Naturschuulrebeed Böver Ihldaal un in’n Oosten dat Naturschuulrebeed Heerweger Moor un Born von de Hu’er Beek.
De Naveröörd sünd Arv un Werschenreeg in’n Noorden, Loog un Leessemstotel in’n Noordoosten, Hu’e in’n Oosten, Ihlpohl in’n Süüdwesten un Wollah un Stendörp in’n Noordwesten.
Historie[ännern | Bornkood ännern]
De Oort höört vondaag to de Vöröörd von Bremen. De Grenz na’n Stadtbezirk Bremen-Noord liggt een Kilometer in’n Süden. Oosterhagen höört nu al siet 150 Johr mit Ihlpohl tohoop. In dat 19. Johrhunnert sünd de beiden Öörd noch üm un bi lieker groot ween (Oosterhagen mit veer Hüüs un Ihlpohl mit negen Hüüs). Sietdem is Oosterhagen nich groot wussen (blots de Oortsdeel Vör Oosterhagen, de aver to Hu’e un nich to Oosterhagen höört, hett en Reeg Hüüs tokregen), Ihlpohl aver is as Bremer Vöröörd op en Grött von 2387 Inwahners (Stand 1. April 2014) anwussen.
Verwaltungsgeschicht[ännern | Bornkood ännern]
In de Franzosentied hett de Oort toeerst 1810 bet 1811 binnen dat Königriek Westfalen to de Mairie Werschenreeg in’n Kanton Hu’e höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Hu’e in’n Kanton Oosterholt.
De Oort hett bet 1848 to dat Gericht Hu’e höört. Düt Gericht is 1848 Deel von dat Amt Oosterholt worrn, ut dat 1885 wedder de Kreis Oosterholt worrn is. De Kreis Oosterholt hett sik 1932 mit’n Kreis Blomendal to’n hüdigen Kreis Oosterholt tohoopslaten.
De Oort hett siet dat 19. Johrhunnert tohoop mit Ihlpohl de Gemeen Oosterhagen-Ihlpohl billt, de an’n 1. März 1974 mit de Gemeenreform in Neddersassen Deel von de Gemeen Hu’e worrn is. De Oortsdeel, de sik ut de fröhere Gemeen billt hett, warrt vondaag blots noch Ihlpohl nöömt.
Inwahnertall[ännern | Bornkood ännern]
| Johr | Inwahners |
|---|---|
| 1812[1] | 29 |
| 1824[2] | 3 Füürsteden |
| 1848[3] | 26 Lüüd, 4 Hüüs |
| 1. Dezember 1871[4] | 19 Lüüd, 3 Hüüs |
| 1. Dezember 1885[5] | 18 Lüüd, 3 Hüüs |
Religion[ännern | Bornkood ännern]
Oosterhagen is evangeelsch-luthersch präägt un höört to de To’n-Hilligen-Krüüz-Kark in Werschenreeg. Bevör düsse Kark 1966 trech worrn is, hett de Oort to de Martin-Kark in Leessem höört.
För de Kathoolschen is de Hillige-Familie-Kark in Oosterholt-Scharmbeek tostännig.
Kultur[ännern | Bornkood ännern]
En Denkmaal för de Fullenen ut de twee Weltkrieg’ steiht in Ihlpohl.[6]
Weertschop un Infrastruktur[ännern | Bornkood ännern]
För Oosterhagen is de freewillige Füürwehr Ihlpohl mit tostännig.
Verkehr[ännern | Bornkood ännern]
En Stück in’n Westen von Oosterhagen löppt de Landsstraat 135 langs, de in’n Noorden na Garlst, twüschen Hagen un Braamst dör un na Bremerhoben geiht un in’n Süden na Ihlpohl un dor an de Bundsstraat 74 ran. In’n Noordoosten geiht de Kreisstraat 34 na Leessemstotel an de K 3 un in’n Süüdoosten löppt en lüttjere Straat na Hu’e an de B 74 ran. De B 74 föhrt in’n Noordoosten na Oosterholt-Scharmbeek, Hambargen, Gnarrenborg un Bremervöör.
De nächste Autobahn is de Autobahn 27 (Afsnidd Bremen–Bremerhoben). De Opfohrt 15 Ihlpohl liggt so een Kilometer in’n Süüdwesten von Oosterhagen an de L 135.
De nächste Bahnhoff is so bi dree Kilometer wied weg in’n Süüdoosten de Bahnhoff Hu’e an de Bahnlien Bremen–Bremerhoben.
Footnoten[ännern | Bornkood ännern]
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 105
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 472
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 151
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 157
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 168
- ↑ Onlineprojekt Gefallenendenkmäler