Nicolai-Kark (Bützfleet)

De Nicolai-Kark is de Kark von dat evangeelsch-luthersche Kaspel Bützfleet (Karkenkreis Stood). Ehren Naam hett se von’n Hilligen Nicolaus.

En Kapell in Butesvlete kummt 1132 tooerst in de Oorkunnen vör, in de Stiftoorkunn von dat Jürgenklooster in Stood. Disse eerste Kapeel weer wohrschienlich ut Holt. In dat 13. oder 14. Johrhunnert is denn en Kark ut Steen boot worrn, de noch vör de Reformatschoon dör Rutbreken un wieder na buten Setten von de Süüdwand grötter maakt worrn is. En höltern Klockentoorn is 1671 boot worrn.

De hüdige Altor is bi de Reparatur von de Kark 1770 nee kamen. Boot worrn is he von’n Discher Hans Michael Keßler ut Bossel. De Preddigstohl is 1682 ut Stood kamen un 1770 an sien hüdige Steed stellt worrn.

1832 is en Deel von de Süüdwand instört un de Kark müss denn noch wedder repareert warrn. Wegen Schadens dör Drievmineral is de Kark in de Tied von de Johren 1980 bet 2002 in Etappen bilütten kumplett saneert worrn.

De Kark is vondaag 36,5 m lang, 11,5 m breed un 28 m hoog (dor fallt 13 m von op’n Toorn, de baven op dat Dack sitt).

De Kark hett en oold höltern Kruzifix ut dat 13. Johrhunnert, en Döpelsteen ut dat 16. Johrhunnert un en Epitaph för Pastoor Johannes Hoffmann von 1690.

Op’n olen Karkhoff bi de Kark staht ok twee Denkmaals för de Fullenen ut den Eersten un Tweten Weltkrieg ut dat Kaspel.^[1]

Örgel

De Örgel hett Johann Werner Klapmeyer 1703 bet 1705 boot un is 1724 von Johann Hinrich Klapmeyer utbetert worrn. 1794/1795 hett Georg Wilhelm Wilhelmi ehr ümboot. 1985/1986 hebbt de Bröder Hillebrand de Örgel denn noch eens wedder op’n ne’esten Stand bröcht. De Örgel hett 22 Register un en II/P-Manual.

Kaspel

To dat Kaspel Bützfleet höört de Öörd Bützfleet, Abbenfleet, Bossel, Bützfletermoor, Depenbeek, Götzdörp, Graueroort un Kreuel.

De Naverkaspels sünd Haseldörp op de anner Sied Elv in’n Oosten, St. Cosmae un St. Markus in Stood in’n Süden, Himmelpoorten in’n Süüdwesten un Aßel in’n Noordwesten.