Musik vun Kap Verde

Vun Wikipedia
Een vun de bekannsten kapverdischen Morna-Singers: Cesária Évora

De Musik vun Kap Verde is bestimmt dör de Historie vun Kap Verde as en Inselgrupp, de anfangs gor nich bewahnt weer. De Kultur un dormit ok de Musik vun de Eilannen is dorüm prägt dör dat Mischen un Versmölten vun ünnerscheedliche Afstammen un Kulturen.

Grundlagen[ännern | Bornkood ännern]

De Historie vun Kap Verde sett sik tohopen ut de Koloniseren dör Portugal un dat Ankamen vun de afrikaanschen Slaven in’t 15. Johrhunnert. Anriekert warrt disse sünnere Situatschoon mit de Utwirken vun de Emigratschoon, wat mit de kapverdischen Historie verknütt un nich mehr wegtodenken is. Dat geev al jümmer en düchtigen Uttuusch na’t Fastland. Minschen sünd ü.a. na de westafrikaanschen Küst oder op’n amerikaanschen Kontinent togen, vun wegen dat dat in Kap Verde nich noog Arbeit un to Eten geev. Enn vun’t 20. Johrhunnert hebbt veel mehr Lüüd vun Kap Verde in’t Utland leevt as op de Eilannen sülvst.

Disse Ümstand finnt sik ok in de Musik vun dat Land wedder. An dat Inwirken vun de verschedenen Kulturen un Rhythmen kann een nich vörbihören. Batuku hett sien Wörtel in’t Afrikaansche, Morna dorgegen in Portugal. Ok Funaná is düchtig vun Portugal prägt, vun wegen dat ok dat tyypische Funaná-Instrument Gaita (Akkordeon) vun dor herkummt.

Ok de Luden un Kläng vun de Eilannen wirkt op de Musik vun de Kapverden in. Dat is toeerst mal dat Water vun’n Atlantik, de Vagels un de Wind aver ok dat Eko vun de Bargen. De Musikinstrumenten warrt ut natürliche un produzeerte Materialen maakt as Iesen, Kunststoff, Glasbuddels oder Dosen, un jüst so ut Holt, Musseln, dröögte Körbsen oder Schoten.

In Kap Verde gift dat en grote Tall vun Musikrichten (na Bookstaav):

Batuku[ännern | Bornkood ännern]

De Batukugrupp „Batukaderas Delta Cultura“ bi’n Optritt op Santiago.

De Batuku weer wohrschienlich de eerste Musikstil, de op de Kapverden tostannen kamen is. He stammt vun’t Eiland Santiago un is en rituellen Dans mit groten afrikaanschen Andeel. Tomeist warrt vun en Singersche to’n Rhythmus vun de Trummeln Geschichten, ne’e Insichten oder Snackeree vertellt, de mit bekannte Phrasen un Themen anriekert un vun de Trummlersches wedderhollt warrt (Finaçon). Man seggt, de de Stoffgördel, de de Dansersche üm de Hüft driggt as Teken för de Fesseln vun de Slaven steiht. As Trummeln warrt faken eenfacke Plastiktüten bruukt, de mit Stoffresten oder Kledaasch füllt sind un twüschen de Schenkel vun de Trummlersches presst un slahn warrt.

Colá[ännern | Bornkood ännern]

De Colá is en Eerdfruchtborkeits-Ritual, dat in’n Juni mit en bannig afwesselnde Musik begahn warrt. As Instrumenten warrt dorbi Trummeln un Piepen bruukt.

Coladeira[ännern | Bornkood ännern]

Disse Stil hett sik ut Morna entwickelt, hett aver veel mehr Rhythmus. Dorüm kann een dorna ok veel beter dansen. De Texten dorto hebbt Humor und sünd lustig bit hen to sarkastisch. Coladeira wiet Elementen vun’t karibische Zouk un vun de brasilaansche Samba, so dat dorbi ok faken Blaasinstrumenten oder Keyboards insett warrt.

Finaçon[ännern | Bornkood ännern]

To den Rhythmus vun’n Batuku driggt en enkelte Singersche wat vör. Dat sünd Themen utn Alldag, Narichten, Zitaten, Ansichten un Philosophien as ok Naricht vun sünnere Begeevnissen.

Funaná[ännern | Bornkood ännern]

Bino Branco, de Singer vun Ferro Gaita, mit en Ferrinho

Funaná-Musik warrt mit en diatoonsch Akkordeon un en flachen riffelten Iesenstaff (Ferrinho) speelt, de mit en Mess as Perkussionsinstrument reven warrt. Entstahn is de Musik op Santiago. Se is de gauste Musikricht Vun Kap Verde; se warrt in en hoog Tempo mit veel Energie un Andeelnahm speelt, so dat se de Kraft hett, Minschenin Ekstaas to versetten. Ünner de Kolonialherrschop weer dat spelen vun disse Musik op apentliche Plätz verboden, vun wegen dat man bang weer för de Kritik an’t System, de ut de Texten snacken de. Sien hüütigen Platz in de Danshüüs un de Radios vun de Aluguer-Fohrers vun’n Archipel hett de Funaná eerst mit de Unafhangigkeit vun Portugal funnen. De Dans, de dorto höört, is drang un warrt as bannig erotisch ansehn. Aktuelle Funaná-Interpreten sünd to’n Bispeel Ferro Gaita, Raízes, Os Amigos un vele annere.

Morna[ännern | Bornkood ännern]

De Morna is wohrscheinlich op dat Eiland Boa Vista entstahn. De bekannteste Singersche vun’t Morna is Cesária Évora, bedüdene Singers sünd aver to’n Bispeel ok Tito Paris un Lura. De Morna is de Musik vun de Kapverden, de an leevsten höört warrt un ok an’n wietsten verbreedt is. De Stil is prägt vun Moll-Toonorden, de in en langsom Tempo speelt warrt. Faken warrt de Musikricht mit de portugeesche Fado vergleken. Speelt warrt mit Gitarr, Cavaquinho (en lütte veer-saitig Gitarr), Vigelien un Slaginstrumenten. De Morna is tyypscherwies melancholisch un nadenkern un de Texten drückt Lengen, Heimweh un Verlangen ut, wat op de Kapverden as Sodade charakteriseert warrt.

Tabanca[ännern | Bornkood ännern]

Dorbi hannelt sik dat um en Festival mit afrikaanschen Oorsprung dat in’n Mai afhollen weer un traditschonell mit Trummeln un Musseln speelt worrn is. De oorsprüngliche Bedüden vun’t Wort is Lütt Dörp, vundaag steiht dat mehr för „Bröderschop“. Dorbi geiht dat üm en Verbinnen un Versammeln vun en Gemeenschop mit en annere, üm de Vörfohren to ehren. De Deelnehmers verkleedt sik dorbi in bunte Kledaasch (faken anlehnt as de Kledaasch vun de Böveren) un heizt de versammelten Minschen mit jemehr Klatschen, dat Singen un den Dans an.

Jede Tabanka hett en König, den Rei di Tabanka, de faken in witte Uniform kleedtis un sien Tabanka vörut geiht. De driggt dat Teken vun de Versammeln. Dat warrt seggt, dat de Musseln to de Tiet vun de Slaveree as Middel för de Kommunikatschoon ünner de Slaven deent hebbt un de Trummeln för de Spraak vun all Minschen ünner en Gott mit en Schicksal staht.

Vozes[ännern | Bornkood ännern]

As Vozes (Stimmen) warrt A-capella-Kompositschonen betekent, de jemehr Wörteln in de afrikaanschen Kultur hebbt.

Borns[ännern | Bornkood ännern]

Weblenken[ännern | Bornkood ännern]