Miegstoff

Strukturformel
Allgemeen
Naam	Miegstoff
Annere Naams	Kohlensüürdiamid, Carbamid, Carbonyldiamid, Urea (lat.), Piagran (granuleert)
Summenformel	CH4N2O
CAS-Tall	57-13-6
Kortbeschrieven	Kristallen ahn Klöör un Röök
Egenschoppen
Molar Masse	60,06 g·mol–1
Phaas	fast
Dicht	1,3230 kg·m–3 (0°C, 1013 mbar)
Smöltpunkt	132,5–134,5 °C (Verfall)
Kaakpunkt	—
Dampdruck	0,2 Pa (75 °C)
Löslichkeit	licht in Water: 1000 g/l, löslich in Ethanol: 50 g/l elk bi 20 °C, swoor in Ether un Chloroform
Sekerheitshenwiesen
Gefahrstoffkennteken
Gefahrenteken keen Gefahrenteken
R- un S-Sätz	R: -
	S: -
Wietere Sekerheitshenwiesen
MAK	8471 mg·kg–1 (Muus, peroral)
Sowiet mööglich un tyypsch, warrt dat SI-Eenheitensystem bruukt. Wenn nich anners anmarkt, gellt de angeven Daten bi Standardbedingen.

Miegstoff (lat. Urea), cheemsch Kohlensüürdiamid, is en orgaansche Verbinnen, de vun vele Deerten as en Endprodukt vun’n Stoffwessel vun Stickstoffverbinnen (t. B. Aminosüren) in’n so nöömten Miegstoffzyklus produzeert un in’n Urin utscheedt warrt. Rein Miegstoff is en witten, kristallinen, ungiftigen un hygieensch unbedenklichen Faststoff, de nich to verwesseln is mit de Miegsüür.

Historie

Miegstoff gellt as de eerste ut anorgaansche Stoffen synthetisch herstellte orgaansche Verbinnen. Se weer 1773 vun Hilaire Rouelle as Stoff opdeckt un 1828 vun Friedrich Wöhler to’n eersten mol dör Reakschoon vun Kaliumcyanat un Ammoniumsulfat künstlich synthetiseert.

Miegstoff-Synthees

Dat pass gor nu gor nich to de dormolige Ansicht, dat orgaansche Stoffen blots vun Leevwesen dör de so nöömte vis vitalis (Levenskraft) herstellt warrn künnen. Nipp un nau hett Wöhler al 1824 dör de Hydrolyys vun Dicyan to Oxalsüür nawiest, dat för de Sythees vun orgaansche Stoffen keen Levenskraft nödig weer.

Physioloogsch Bedüden

Miegstoff warrt in’n Protein- un Aminosüür-Stoffwessel billt un höört to de Miegplichtigen Stoffen. Bi Söögdeerten, Schildpadden, eenige Fisch un bi utwassen Amphibien is de Miegstoff de wichtigste Form to’n Utscheeden vun den sünners in Proteinen vörkamen Stickstoff. Vagels un die mehrsten Reptilien billt an de Steed vun Miegstoff Miegsüür; Kaulquappen, de meisten Fischorden an de annern Waterdeerten scheedt den Stickstoff as Ammoniak ut.

Üm bi’n Afbo vun Aminosüren at Entstahn vun dat giftige Ammoniak (NH₃) ut de Ammonigruppen to ümgahn, warrt dise in de Lebber in’n Rahmen vun’n Miegstoffzyklus op dat nich giftige Miegstoffmolekül överdragen. De warrt denn as Stoffwesselendprodukt över de Neren utscheedt.

Krankheiten, as dat akute oder chroonsche Nerenverseggen, oder en diabeetsch inschränkte Nerenfunkschoon künnt in’t Bloodserum/Bloodplasma to’n högeren Miegstoffweert föhren.

Stören un Sünnerheiten

En stark Toföhren vun Proteinen föhrt ok al bi normale Nerenfunkschoon to högere Miegstoffweerten, wat em to’n slechten Parameter för de Neeren maakt. Bi (prä-)terminale Nereninsuffizienz is de Miegstoffkunzentratschoon in’t Serum aver beter egent to’n Afschätzen, wo swoor de Uraämie is, as de Serumkreatininkunzentratschoon.

Anwennen

Wegen sien hogen Stickstoffandeel vun 46 % is Miegstoff weltwiet de bedüdenste Stickstoffdünger. Miegstoff warrt wegen sien starke Anlaag, an Water to binnen, faken ok as Fuchtigkeitsfakter in Kosmetika insett. In de Pharmazie is Miegstoff as Keratolytikum begäng. Disse Egenschop warrt in vele Rezepturen nütt. Hoochkunzentreert (40 %) wirkt dat to’n Bispeel in Pasten tosamen mit en Antipilzmiddel (Antimykotikum) gegen Nagelpilz (Onychomykose), wobi de Miegstoff den Nagel so week maakt, dat sik de befallen Nagel Stück för Stück afdrägen lett. In Salben deent dat wieter ok as Fuchtigkeitsspenner to’n Bekämpen vun atoopsche Ekzemen un Lichenkrankheiten.

Herstellers vun Zigaretten mischt Miegstoff ünner’n Tabak, dat de Nikotin dör den högeren pH-Weert in de Lung beter opnahmen warrn kann. So warrt ut lichte Zigaretten, de op de Packung en sieten Nikotinweert wiest, starke Zigaretten.

Ok an de Steed vun Streisolt künn Miegstoff insett warrn, man dat lohnt sik nich.

Miegstoff warrt för de Redukschoon vun Stickoxiden in’t Afgas vun Kraftwarken un Verbrennmotoren bruukt. In Kraftwarken warrt sünners bi lütte Anlagen dat SNCR-Verfohren (selektive nich-katalytische Redukschoon) anwennt. Bi dat so nöömte SCR-Verfohren (Selektive katalytische Redukschoon), dat in Kraftwarken un jümmer mehr ok in de Fohrtüüchtechnik insett warrt, warrt Miegstoff oder Ammoniak in den hitten Afgasstroom insprütt. De Miegstoff verfallt dorbi to Ammoniak, dat in en naschalten Katalysater de Stickoxiden reduzeert. In de Kraftfohrtüüchtechnik warrt en waterige Lösen mit 32,5 % Miegstoffandeel bruukt, de ünner den Hannelsnaam AdBlue begäng is. De Verbruuk an Miegstofflösen bedriggt ruchweg 2 bit 8 % vun’n Driefstoffverbruuk.

In Levensmiddel warrt Miegstoff as Stabilisater tosett. in de EU is de as Levensmiddeltosatzstoff mit de Beteken E 927b blots för Kaugummi ahn Zuckertosatz tolaten.

Egenschoppen

Miegstoff kondenseert bi’t Hittmaken över den Smöltpunkt ünner Afsplitten vun Ammoniak (NH₃) to Biuret

Biuret-Synthees

Industrielle Produkschoon

Miegstoff warrt in grote Mengden industriell herstellt (2004: 127 Mio t weltwiet) un deent to’n Bispeel as Stickstoffdünger oder as NO_x-Redukschoonsmiddel bi’t SNCR-Verfohren. In Länner mit grote Vörkamen vun Eerdgas, de fröher meist eenfach affackelt worrn sünd, warrt Eerdgas vundaag in Miegstoff ümwannelt. Dorto gifft dat grote Anlagen, de ut Eerdgas, Luft un Water in den Afloop Waterstoffherstellen → Ammoniakherstellen → Miegstoffsynthees opletzt Miegstoff produzeert. Streng nahmen warrt de optellten Edukten in es Vörgangsgas ut H₂, N₂ un CO₂ ümsett, wo dat CO₂ ritnahmen warrt. Waterstoff un Stickstoff warrt denn in Ammoniak ümwannelt. Reinen Waterstoff kummt in disse Keed nich vör. Dat för de Ammoniakherstellen afscheedte CO₂-Gas warrt later in’n Miegstoff bunnen un nich in de Atmosphäär freesett. De Miegstoff, de toeerst in Lösen anfallt, warrt in Granulat ümwannelt un i Säck oder ok loos verköfft. De gröttsten Anlagen op de Welt produzeert ruchweg 4.000 t Miegstoff an’n Dag.

Reakschoonsglieken:

$\mathrm {2\ NH_{3}+CO_{2}\longrightarrow \lbrack H_{2}N{-}CO{-}O\rbrack NH_{4}}$

Ammoniak un Kohlenstoffdioxid reagert to Ammoniumcarbamat.

$\mathrm {\lbrack H_{2}N{-}CO{-}O\rbrack NH_{4}\longrightarrow H_{2}N{-}CO{-}NH_{2}+H_{2}O}$

Ammoniumcarbamat reageert to MIegstoff un Water.

En industrielle Wieterverwennen vun Miegstoff is de Herstellen vun Melamin, dat t. B. mit Formaldehyd to Kunsthorzen verarbeitet warrt, un vun Miegstoff-Formaldehyd-Horzen (Miegstoffhorz, so nöömte UF-Horzen), de t. B. för de Produkschoon vun Spanplatten insett warrt.

Kiek ok

• AdBlue
• Miegstoffnitrat
• ThioMiegstoff