Bloodplasma

Vun Wikipedia
Wesseln na: Navigatschoon, Söök

Bloodplasma is de fletige, zellfre’e Deel vun dat Blood, in den normalerwies de Bloodzellen swemmt. Dat Plasma hett en Andeel vun 55% an dat Volumen vun’t Blood. In’n Ünnerscheed to dat Bloodserum sünd in dat Plasma noch all de Stollfakters binnen.

De Protein-Andeel in’t Bloodplasma liggt bi ruchweg 60-80 g/l, wat ungefäähr 8 % vun’t Volumen utmaakt. Na de Beweglichkeit bi de Elektrophorees warrt se ünnerscheedt in Albuminen un Globulinen. Disse warrt noch wieter ünnerscheedt in α1-, α2-, β- und γ-Globulinen.

Funkschoon[ännern | Bornkood ännern]

Dat Bloodplasma hett de Opgaav, verscheedene Stoffen dör den Lief to transporteren, so as Hormonen, Suerstoff un Kohlenstoffdioxid, Lipiden, Glukoos oder de Produkten ut den Stoffwessel. Dorvör sorgt de Plasmaproteinen. De Suerstoff warrt vör allen över dat Hämoglobin in de Roden Bloodkörpers transporteert un man blots wenig över dat Plasma sülvst. Ünner Överdruck kann dat en beten mehr warrn. Dat Bloodplasma spiekert un transportert bito ok de Stollfakters. Un an End is sien Gehalt an Proteinen is nödig, üm den osmotschen Druck vun’t Blood oprecht to hollen, ok dat warrt dör de Proteinen regelt, as ok de Immunafwehr un dat konstant hollen vun den pH-Weert

De Andeel vun’t Bloodplasma maakt vun’n Liefgewicht ungefäähr 5% ut. Dat is üm un bi 3,5 Liter. De dörsnittlich Dicht üm un bi 1028 g/l.

Afscheeden vun Plasma un Bruuk[ännern | Bornkood ännern]

Dat Plasma kann dör Zentrifugeeren vun de annern Bestanddeelen vun’t Blood aftrennt warrn, wenn vörher en Stoff as t. B. Natriumcitrat bimischt worrn is, de dat Klutenbilln vermasselt (Stolltörners; kiek ok bi Bloodstollen). Dat Bloodplasma hett normalerwies en geelgröne Klöör un is klor, so as dat bi de Plasmaspenn wunnen warrt. Wenn dat Plasma mehr in’t dröve geiht, denn snackt man vun „lipaemisch“ (verfett’t). Faken kann dat denn nich mehr för en Transfusion bruukt warrn.

De Oorsaak kann en Problem mit den Fettstoffwessel vun’n Spenner wesen, aver dat maakt ok al veel ut, wenn een kott för de Spennen noch wat eten hett, woneem veel Fett binnen is. Wenn dat Plasma vun de Klöör her mehr in’t rötliche geiht, snackt man vun „hämolytisch“, dat heet denn, dat rote Bloodkörpers platzt sünd.

Bestanddeelen[ännern | Bornkood ännern]

Bloodplasma besteiht to 90-95% ut Water. Dorbinnen sünd de annern Stoffen löst, so ok de Proteine un de anorgaanschen Elektrolyten.

Cheemsche Bestanddeele
Stoff Andeel
Plasmaproteinen 60 bit 80 g/l
Glukoos 4,5 bit 5,5 mmol/l
Nich-Protein-Stickstoff 15 bit 30 mmol/l
    Urea-Stickstoff 3,5 bit 7,0 mmol/l
    Aminosüürn-Stickstoff 3 bit 5 mmol/l
    Kreatinin 70 bit 140 μmol/l
    Kreatin 25 bit 70 μmol/l
    Harnsüür 150 bit 400 μmol/l
Lipiden (tohopen) 4,5 bit 8,5 g/l
    Triglyzeriden 0,6 bit 2,4 mmol/l
    Cholesterin (tohopen) 4,0 bit 6,5 mmol/l
        Free 0,25 bit 0,35 mmol/l
        Verestert 0,65 bit 0,75 mmol/l
    Phospholipiden 2,0 bit 3,0 mmol/l
    Fre’e Fettsüürn 0,3 bit 0,9 mmol/l
Orgaansche Süürn 4 bit 6 mmol/l
    Laktat 1 bit 2 mmol/l
    Pyruvat 0,1 bit 0,2 mmol/l
    Citrat 0,1 bit 0,2 mmol/l
    Ketokörpers 0,3 bit 0,5 mmol/l
Elektrolyten
Ion Andeel
Na+ 136 bit 146 mmol/l
K+ 3,8 bit 5,2 mmol/l
Ca2+ 2,3 bit 2,7 mmol/l
Mg2+ 0,8 bit 1,2 mmol/l
Cl 96 bit 106 mmol/l
HCO3 24 bit 28 mmol/l
Phosphat 1,0 bit 1,4 mmol/l