Mango Creek (Stroom)

Vun Wikipedia

De Mango Creek is en üm un bi 14 Kilometer langen Stroom in’n Distrikt Stann Creek von dat Land Belize, de in de Karibische See münnt.

Tohoop mit de Tobringers August Creek un Jenkins Creek hett de Stroom en Afströömrebeed von üm un bi 530 km². Jenkins Creek un Mango Creek tohooprekent sünd so üm un bi 29 Kilometer lang.

De Oort Mango Creek (ok Independence) is na’n Stroom nöömt.

Verloop[ännern | Bornkood ännern]

Mango Creek[ännern | Bornkood ännern]

De Stroom hett sien Born in’n Süüdoosten von San Juan nich wied af von’n Southern Highway. Von dor flütt he na Oosten un an’n Noordrand von’n Oort Independence/Mango Creek langs. Dor nimmt he von links den August Creek un den Jenkins Creek op un münnt denn in de Placentia-Laguun, wat en Deel von de Karibische See is.

De Mango Creek is dat letzte Enn recht breed (üm un bi 40 m an de Münn von’n August Creek, 100 m an de Münn von’n Jenkins Creek un 400 m an de Münn in de Placentia-Laguun). Dat is wohrschienlich de Grund, worüm de mit 14 Kilometer relativ korte Mango Creek dat Stroomsystem sien Naam geven hett, ofschoonst August Creek un Jenkins Creek düüdlich länger sünd.

August Creek[ännern | Bornkood ännern]

De 19 Kilometer lange August Creek hett sien Born in’n Süüdoosten von Red Bank an’n Rand von de Maya-Bargen un flütt von dor na Süüdoosten un ünner’n Southern Highway langs. In’n Oosten von San Juan nimmt he von rechts den good acht Kilometer langen Big Creek op, de sien Born in San Juan hett. De August Creek münnt an’n Noordrand von Independence in’n Mango Creek.

Jenkins Creek[ännern | Bornkood ännern]

De 27 Kilometer lange Jenkins Creek hett sien Born in’n Westen von Maya Mopan an’n Rand von de Maya-Bargen un flütt von dor na Süüdoosten un ünnern Southern Highway dör. In’n Süden von San Roman nimmt he von links den twölv Kilometer langen Santa Maria Creek op un in’n Noorden von Independence von rechts den 6,5 Kilometer langen Flour Camp Creek. De Jenkins Creek münnt in’n Noordoosten von Independence in’n Mango Creek, kort bevör de Mango Creek sülvs in de Placentia-Laguun münnt.


Koordinaten:16° 32′ N, 88° 24′ W