Lowell Bailey

Lowell Bailey (* 15. Juli 1981 in Syler City, North Carolina) is en ehmalger US-amerikaansch Biathlet.

Lowell Bailey ut Lake Placid hörrt den US-Natschonalkader siet 2001 an un wurrn vun Per Nilsson un Armin Auchentaller traineert. Sien eersten grötteren internatschonalen Upträe harr he bi de Juniorenweltmeesterschapen 1999 in Pokljuka, wo he aber kien vördere Platzeeren recken dee. Beter leep dat dorgegen een Johr later bi de Europameesterschapen in Zakopane, wo he as best Ergevnis Platz 10 in' Sprint recken dee. Bi de Europameesterschaften 2001 in Haute Maurienne wunn he Bronze in' Sprint un in de Verfolgung. 2002 geev he sien Debüt in Biathlon-Weltcup. Bi en Eenzel in Antholz keem he up Platz 65, is dornah aber tonächst in' Europacup antreeden. In Chanty-Mansijsk nehm he 2003 eerstmals, aber ahn grooten Spood, an Biathlon-Weltmeesterschapen deel.

Siet de Saison 2005/06 nimmt Bailey regelmatig an Weltcuprennen deel. In Östersund kunn he dorbi as 29. eerstmals Punkte haalen. Bi de Olympisch Winterspeelen 2006 in Turin kemm he in't Eenzel up Platz 27. Mit de Staffel keem he sogor up Platz 9.

Ok dornah keem sien Karriere nicht richtig wieder, weder in' Weltcup, noch den Biathlon-Weltmeesterschapen oder bi de Olympisch Spelen 2010 . 2009 wurr he aber nordamerikaansch Meester in' Sömmerbiathlon över 10 km.

Eerst in de Saison 2011/12 keem Bailey bi Sprintrennen in Östersund un in Kontiolahti up fievte Ränge, womit he sien bit dorhen best Resultate in' Weltcup recken dee.

In de Saison 2012/13 keem he in de Gesamtwertung blots up Platz 28 un blots eenmal ünner de best Teihn (Sprint in Antholz). Bi de Biathlon-Weltmeesterschapen 2013 keem he blots mit dat Mixed-Team vun de USA up Platz 8

För sien Verhältnisse leep de Saison 2013/14 ok bannig good. Nicht blots, dat he bi de Verfolgung in Pokljuka den 10. Platz belegg (nah Platz 12 in' Sprint), sonnern he reck bi de Sprint in Kontiolahti mit Platz 3 den Podestplatz, kunn dissen Platz aber in de Verfolgung nich hollen. An' Enn' vun de Saison stunn he up Platz 19 in den Gesamtweltcup un somit noch vör sien Landsmann Tim Burke. In den Massenstart-Weltcup keem he dorto up Platz 4. Bi de Olympisch Winterspelen keem he in' Eenzel up Platz 8 vör Serhij Semenow un Daniel Böhm un mit de Mixed-Staffel up Rang 8.

In de Saison 2014/15 keem he in de Gesamtwertung vun den Weltcup up Platz un in kien een Rennen ünner de best Teihn. Ok bi de Biathlon-Weltmeesterschapen 2015 keem he mit dat Mixed-Team up Platz 8.

In de Saison 2015/2016 keem he in den Gesamtweltcup immerhen up Platz 17, wobi sien best Ergevnis Platz 10 in den Massenstart vun Oslo weer. Bi de Biathlon-Weltmeesterschapen 2016 keem he in' Massenstart immerhen up Platz 10, mit de Staffel up Platz 8 un in' Mixed up Platz 10.

Ofschons Lowell Bailey nah de Saison 2015/16 torüchtreeden wull, hett he sien Loopbahn fortsett, nahdem hüm sien Fru Erika dorto överreedt harr. Bi de Weltmeesterschapen 2017 in Hochfilzen verpass he mit den 4. Platz in‘ Sprint blots um good söss Sekunnen sien eerst Medaille bi Biathlon-Weltmeesterschapen]]. In dat Verfolgungsrennen gung he as Tweet in de letzt Runn, wurr aber denn ünner annern vun de Medaillenwinner Johannes Thingnes Bø un Ole Einar Bjørndalen överhaalt un keem an‘ Enn‘ up Platz 6. In dat Eenzelrennen gung he mit Startnummer 100 as en vun de letzt Aktiven up de Streck un weer denn een vun blots dree Athleten, de dat Rennen ahn Scheetfehler afsluuten deen. He wunn dat Rennen vör den Tschechen Ondřej Moravec un den Franzosen Martin Fourcade. Dat weer sien eerst Sieg in‘ Biathlon-Weltcup, sien eerst Medaille bi Weltmeesterschapen un ok de eerste Goldmedaille för en US-amerikaansch Biathleten. An‘ 12. März reck he gemeensam mit Susan Dunklee bi de Single-Mixed-Staffel bi den Weltcup in Kontiolahti den tweeten Platz, dat weer de eerste Podiumsplatzeeren för en US-amerikaansch Staffelmannschap siet März 1994 un eerste de tweete Podiumsplatzeeren in en Staffelrennen för en US-amerikaansch Biathleten. De bit dorhen eenzige Podiumsplatzeeren gelung Josh Thompson, Curt Schreiner, Darin Binning un Lyle Nelson mit en darten Platz an‘ 31. Januar 1988 bi den Weltcup in Ruhpolding.

In‘ Eenzelweltcup belegg he an dat Enn‘ vun de Saison Platz 3 un in‘ Gesamtweltcup keem he up den 8. Platz. 2018 hett he sien Loopbahn afslooten.

Sonstiges

Lowell Bailey is en vun de wenig Linksschütten in‘ Weltcup.

Weblenken

Lowell Bailey. Mehr Biller, Videos oder Audiodateien to’t Thema gifft dat bi Wikimedia Commons.

• lowellbailey.com Websteed vun Lowell Bailey
• Lowell Bailey in de Datenbank vun de IBU (engelsch)